နွေဦးက ပေးသော စိုးရိမ်ကြောင့်ကျမှုများနဲ့ ဖြေရှင်းမှုများ (Part 1)

ပြီးခဲ့တဲ့ နွေဦးက ကျနော်တို့အတွက် တော်တော်လေး ကြမ်းတမ်းခဲ့တယ်။ ဖမ်းဆီးတဲ့သတင်း၊ သေတဲ့သတင်းတွေကို နေရာအနှံ့မှာကြားရ မြင်ရတဲ့အခါ စိတ်မချမ်းမြေ့မှုတွေ ထိတ်လန့်မှုတွေနဲ့ တစ်နေ့တာတွေကို ကုန်ဆုံးကြရတယ်။ Covid ကြောင့် လဲကျသွားတဲ့ စီးပွားရေးတွေ ထမယ်ကြံခါမှ အရှိူက်ကိုခပ်ပြင်းပြင်းထိုးခံလိုက်ရတယ်။ ပိုက်ဆံတောင် ထုတ်ဖို့ နေပူမိုးရွာထဲ တန်းစီစောင့်ဆိုင်းနေကြရတယ်။ ဒီလိုမျိုး တစ်နေ့တာ စိတ်ပင်ပန်းစရာတွေကြောင့် အားလုံးဟာလည်း စိတ်ထွက်ပေါက်ရှာလာကြပါတယ်။ ဒီလို စိတ်ထွက်ပေါက်ရှာတဲ့အခါမှာ အမျိုးမျိုးသော နည်းလမ်းတွေကိုသုံးကြရင်း လမ်းလွဲရောက်သွားပြီး ကိုယ့်ကို ရုပ်ပိုင်း စိတ်ပိုင်း ထိခိုက်စေမယ့်အရာတွေကို လုပ်မိကြတာလည်း ရှိလာပါတယ်။

• 

(၁) Survival guilt လို့ခေါ်တဲ့ ဆက်လက်ရှင်သန်နေရခြင်းအတွက် မိမိကိုယ်ကို အပြစ်ရှိတယ်လို့ ခံစားရတဲ့စိတ်၊ သိမ်ငယ်စိတ်တွေကြောင့် သူတစ်ပါးအပေါ် အလွယ်တကူအပြစ်တင်လိုစိတ်တွေ ဖြစ်ပေါ်လာတဲ့အခါ ချက်ကျလက်ကျ မဟုတ်ဘဲ ပြစ်တင်ဆဲဆိုပြီး ကိုယ့်ရဲ့ စိတ်ကျေနပ်မှုကို ရယူတတ်ကြပါတယ်။ ခံစားချက်တွေကို ပေါက်ကွဲထွက်လိုက်တာ ကောင်းတယ်ဆိုပေမယ့် ကိစ္စတစ်ခုအပေါ်မှာ ခေါင်းအေးအေးနဲ့ ဆင်ခြင်သုံးသပ်နိုင်မှု အားနည်းသွားတာ၊ သွေးဆူပြီး ဆတ်ဆတ်ထိမခံနိုင်ဖြစ်လာတဲ့အတွက် သူတစ်ပါးနဲ့ ရန်များရတာတွေကြောင့် ကိုယ့်ရဲ့ ပူပန်သောကတွေ ၂ဆ ဖြစ်လာတာပဲ အဖတ်တင်ပြီး လက်တွေ့မှာ စိတ်ပြေရာပြေကြောင်းကို မရနိုင်ပါဘူး။

(၂) အရက် ဆေးလိပ် အလွန်အကျွံ သောက်သုံးတာကလည်း ခဏတာစိတ်ထွက်ပေါက်ကိုပေးနိုင်တယ်လို့ ဆိုကြပေမယ့် တကယ်တမ်း စိတ်သက်သာတာကနည်းနည်း ရောဂါဖြစ်ဖို့လမ်းက များများ ဖြစ်ပါတယ်။ အရက်အလွန်အကျွံသောက်တာကြောင့် အသည်းရောဂါ အစာအိမ်ရောဂါတွေဖြစ်နိုင်သလို ဆေးလိပ်သောက်တာကြောင့် အဆုတ် နှလုံးနဲ့ တခြား ရောဂါတွေကိုဆီပဲ ဦးတည်သွားနိုင်ပါတယ်။ ဒါ့အပြင်ကိုမှ မူးယစ်ဆေးတွေပါသုံးလာရင်တော့ ပိုပြီးဆိုးတဲ့ ကျန်းမာရေးကိုပဲ ဖြစ်စေနိုင်ပါတယ်။

(၃) မိမိကိုယ်ကို ထိခိုက်အောင် လုပ်တာ ဒါမှမဟုတ် အဆုံးစီရင်တာကလည်း တွေ့ရလေ့ရှိကြပါတယ်။ အထူးသဖြင့် ကျောင်းကိစ္စ အလုပ်ကိစ္စတွေမှာ ဖိအားအမျိုးမျိုးကြောင့် စိတ်ဖိစီးပြီး ဘာလုပ်ရမှန်းမသိတဲ့အဆုံး မိမိကိုယ်ကို အဆုံးသတ်ဖို့ ကြိုးစားတာတွေက ဖြစ်လာဖို့ရှိပါတယ်။ မန္တလေးက ဆရာဝန်မလေး သတင်းလည်း ကြားရပါတယ်။ ဒီလိုကိစ္စတွေမဖြစ်လာအောင် ကျနော်တို့က ဝိုင်းပြီး လိုအပ်တဲ့ ရုပ်ပိုင်းဆိုင်ရာ စိတ်ပိုင်းဆိုင်ရာ အားပေးမှုတွေ ပေးဖို့အရေးကြီးပါတယ်။

Dr. Jason

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။