72 နာရီဆေးလို့ လူသိများတဲ့ အရေးပေါ်တားဆေးကို မြန်မာနိုင်ငံမှာ အများစုက Ecee2 , Lydia စတဲ့ brand နာမည်တွေနဲ့ အသိများလေ့ရှိပါတယ်။ တခြားသော brand အမျိုးအစားနဲ့ ဆေးတွေလည်း ရှိပေမဲ့ ဒါတွေက လူသိအများဆုံး ဆေးတွေပါ။
ဒီဆေးတွေမှာ ဘယ်ဆေးက ကောင်းလဲလို့မေးရင် လိင်ဆက်ဆံပြီး စောစောသောက်တဲ့ဆေးက အကောင်းဆုံးပါ။ အထူးသဖြင့် လိင်ဆက်ဆံပြီး 24 နာရီအတွင်းသောက်ရင် ကိုယ်ဝန်မရအောင် 95-98% လောက် ကာကွယ်နိုင်ပါတယ်၊ နောက်ကျလေလေ တားဆေးကာကွယ်နိုင်စွမ်းကျလာပြီးတော့ 72 နာရီအတွင်းသောက်ရင် 80-85% လောက်ပဲ ကာကွယ်နိုင်ပါတယ်။
အတိုချုပ်ပြောရရင်တော့ စောစောသောက်လေ ပိုစွမ်းလေ ဖြစ်ပြီး နောက်ကျလေလေ အာနိသင်ကျလေပါ။
ဆေးကို ဘယ်လိုသောက်ရမလဲမေးရင် တချို့ဆေးတွေက ဆေးတစ်လုံးထဲ လာတယ် ၊ တချို့က ဆေး ၂လုံး ပါတတ်ပါတယ်။
တစ်လုံးတည်းပါတဲ့ ဆေးဆိုရင်တော့ တစ်လုံးတည်းကို ခုနကပြောထားတဲ့အချိန်အတွင်းသောက်ပါ။
၂လုံးပါတဲ့ ဆေးကဒ်ဆိုရင် တစ်လုံးကို အခုသောက် ၊ နောက် တစ်လုံးကို နောက် 12နာရီခြားသောက်လို့ရသလို နှစ်လုံးစလုံး တပြိုင်နက်တည်းလည်း သောက်နိုင်ပါတယ် ။
တစ်ခုရှိတာက ဆေးသောက်ပြီးရင် အန်တတ်တာမို့ ဆေးအလုံးလိုက် ပြန်အန်ထွက်ရင်တော့ ဆေးအသစ် အမြန်ဆုံး ပြန်သောက်ရပါမယ်။
အရေးပေါ်တားဆေးဆိုတဲ့အတိုင်း အရေးပေါ်အခြေအနေမှ သောက်သင့်ပါတယ်။ မကြာခဏ သောက်နေရင် တားဆေးအာနိသင်ကျလာပြီးတော့ ကိုယ်ဝန်ကို မကာကွယ်နိုင်တာမျိုး ဖြစ်တတ်သလို နောက်ပိုင်း မီးယပ်ရောဂါတွေ ဖြစ်လာနိင်ချေလည်း ရှိပါတယ်။
မဖြစ်မနေ လိုအပ်ရင် အမြန်သောက် ၊ မလိုအပ်ရင်တော့ မသောက်သင့်ပါ။ ဘယ်လောက်ကြာမှ တခါဆိုရင်တော့ ၂လ ၃လလောက်ကြာမှ တခါသောက်တာကတော့ ပိုကောင်းပါတယ်။
ဆေးကြောင့် ဓမ္မတာမမှန်တာ ဖြစ်တတ်သလို ဆေးသောက်ပြီး ရက်ပိုင်းအတွင်း သွေးဆင်းတတ်တာ ၊ ဓမ္မတာမမှန်တာ လာရမဲ့ ဓမ္မတာနောက်ကျတာတွေကတော့ အဖြစ်များလေ့ ရှိပါတယ်။
ဒါ့ကြောင့် အတိုချုပ်အနေနဲ့ အရေးပေါ်တားဆေးကို မလိုရင် မသောက်နဲ့ ၊ သောက်ရရင်လည်း အမြန်ဆုံးသောက်ပါ။
အောင်ကျော်မြင့်
Science Nuts 