အိပ်မက်ကိုထိန်းချုပ်ကြခြင်း (သို့) Lucid dreaming ဆိုတာဘာလဲ (Part 2)

Lucid dreaming ကို သိပ္ပံပညာရှင်တွေကလက်ခံကြပေမယ့် ဘာလို့ lucid dream ဖြစ်ရတာလဲဆိုတာ သေချာမသိကြသေးပါဘူး။

Lucid dream တွေက ဘယ်လိုအသုံးဝင်သလဲ….ဘာတွေပိုထူးခြားလဲဆိုတာ လေ့လာနေဆဲပါ။

ကျန်းမာရေးအတွက်ရော ပိုကောင်းစေသလား ပိုဆိုးစေသလားကိုလဲ အခုထိ ငြင်းခုန်အဖြေရှာနေကြတုန်းဖြစ်ပါတယ်။

လေ့လာမှုတခုကဖော်ပြချက်အရ
အရွယ်ရောက်ပြီးသားသူတွေရဲ့ ၅၅% က ဘဝမှာ တကြိမ်တခါတော့ lucid dream မက်ဖူးပါလိမ့်မယ်တဲ့။

၂၃% လောက်ကတော့ တလတခါလောက်ကို lucid dream မက်တတ်ကြပါတယ်တဲ့။

သိပ်တော့မရှားလှပေမယ့် ပေါတော့မပေါလှပါဘူး။ တချို့ကလဲ မက်ဖူးသလိုရှိပေမယ့် သိပ်မမှတ်မိကြတာလဲဖြစ်နိုင်ပါတယ်။

ကဲ… ဟုတ်ပြီ Lucid dream ထဲမှာ
ဘာတွေလုပ်လို့ရလဲဆိုတော့….

တချို့က အိပ်မက်ဆိုး nighmare တွေမက်လို့နိုးလာရင်ပြန်အိပ်ပြီး အိပ်မက်ဆိုးကို happy ending ဖြစ်အောင်လုပ်လို့ရပါတယ်တဲ့။

အဲ့တော့ အိပ်မက်ဆိုးတွေကို ကုသလို့ရတဲ့နည်းတမျိုးဖြစ်လာပါတော့တယ်။

တချို့တွေကကျ အိပ်မက်ထဲမှာ တခုခုကိုလေ့ကျင့်နေလို့ရပါတယ်တဲ့။

ဥပမာ – သိပ္ပံပညာရှင်တွေစမ်းထားတာတခုက Lucid dream မက်နေတဲ့သူကို အပြင်ကနေ နည်းလမ်းတခုနဲ့အချက်ပြပြီး အပေါင်းအနုတ်လုပ်ခိုင်းတာပါ။ သင်္ချာတွက်ခိုင်းတဲ့သဘောပေါ့။

တချို့ အားကစားသမားတွေကျတော့လဲ သူတို့ရဲ့အားကစားကို Lucid dream ထဲမှာ လေ့ကျင့်ကြပြီး တကယ့်ပြိုင်ပွဲအစစ်လို ဖန်တီးကာ ပြိုင်ပွဲအတွက် လေ့ကျင့်ပြင်ဆင်တတ်ပါတယ်တဲ့။

တကယ့်တကယ်ပြိုင်ပွဲပြိုင်ရတဲ့အခါ အတွေ့အကြုံကများနေပြီမို့ ကြောက်စိတ်နည်းသွားပါတယ်တဲ့။

တော်တော်တော့ ဆန်းကြယ်တဲ့ကိစ္စပါ။

တချို့ကျတော့ ကိုယ်အလည်သွားချင်တဲ့နိုင်ငံတွေကို lucid dream ထဲမှာ သွားလည်ကြပါသတဲ့။

အဲ့တာလဲတွေးကြည့်ရင် တော်တော်ထူးဆန်းတာပါ။ ကိုယ်မရောက်ဖူးတဲ့နေရာကို Brain ကကြိုသိမြင်နေတယ်ဆိုတာ နေရာဒေသကိုတော့ တနေရာရာမှာမြင်ဖူးထားရမယ်ထင်ပါတယ်။

Lucid dream မက်တယ်ဆိုတိုင်း ပုံစံမတူကြပါဘူးတဲ့။

တချို့က အိပ်မက်မက်နေတယ်ဆိုတာ သိရုံပဲသိလိုက်ပြီး ထိန်းလို့မရခင် ပြန်ပြန်နိုးသွားပါတယ်တဲ့။

Lucid dreamer တိုင်း အိပ်မက်ကို ထိန်းချုပ်လို့ရချင်မှရတာပါ။

အိပ်မက်ကို သူမက်နေတဲ့အတိုင်းလေးပဲ ခံစားစီးမြောပါသွားကြတာများပါတယ်တဲ့။

လိုသလိုထိန်းချုပ်နိုင်တယ်ဆိုရင်တော့ စာဖတ်သူက တော်တော်ရှားပါးတဲ့ Lucid dreamer တယောက်ပါပဲ။

တချို့ကျတော့လဲ ပြန်နိုးလာပြီးမှ အိပ်မက်ကိုစာရွက်ပေါ်မှာ ချရေးရပါတယ်။
ချရေးထားတဲ့ အိပ်မက်အကြောင်းကိုဖတ်ရင်း ပြန်အိပ်ရပါတယ်။
အဲ့လိုလုပ်မှ မက်ချင်တဲ့အိပ်မက်ကိုပြန်မက်ကြတာပါတဲ့။

Lucid dream အကြောင်းကတော့ ပြောလို့ကိုကုန်မှာမဟုတ်လို့ ခဏရပ်ထားပြီး

Lucid dream ကိုလေ့ကျင့်ယူလို့ရလား လုပ်ယူလို့ရလားဆိုတဲ့အပိုင်းကိုသွားရအောင်။

Inception ဇာတ်ကားထဲမှာတော့ ဆေးတမျိုးကိုသုံးပြီးမှ lucid dream ကိုဖန်တီးကြတာ မြင်ဖူးမှာပါ။

ရုပ်ရှင်ထဲမှာ သုံးတဲ့ဆေးနာမည်ကတော့ “Somnacin” လို့ခေါ်ပြီး သွေးကြောထဲကို တိုက်ရိုက် သွင်းရတာမျိုးပါ။
သုံးတဲ့စက်ကိုတော့ Portable automated somnacin Intravenous device လို့ခေါ်ပါတယ်။

လက်တွေ့ဘဝမှာတော့ အဲ့ဆေးက တကယ်မရှိပါဘူး။
ဒါပေမယ့် ဆင်တူတဲ့ ဆေးတမျိုးတော့ရှိပါတယ်။

အဲ့ဆေးကို Galantamine လို့ခေါ်ပြီး အဘိုးအဘွားတွေအသက်ကြီးလို့အတိတ်မေ့တဲ့ရောဂါ အယ်လ်ဇိုင်းမားရောဂါ (Alzheimer’s disease) မှာသုံးတာပါ။

ဒါပေမယ့် အဲ့ဆေးကို သောက်သုံးရင် Lucid dream တွေမက်တယ်လို့ complain လုပ်ရာကနေ နာမည်ကြီးလာတာပါ။ တကယ်လဲ Lucid dream မက်နိုင်ခြေများလာတာက ဆေးရဲ့ side effect တခုဖြစ်ပါတယ်။

ဆေးနဲ့မဟုတ်ဘဲ တခြားလေ့ကျင့်လို့ရတဲ့ နည်းတွေရှိပါသေးတယ်။ အဲ့တာတွေကို နည်းနည်းစီပြောပြသွားပါမယ်။

ပထမနည်းလမ်းတခုကတော့
Reality testing လို့ခေါ်ပါတယ်။

ကိုယ့်ရဲ့တနေ့တာမှာ အားတဲ့အခါတိုင်း မိမိကိုယ်ကို
“ဒါအိပ်မက်လား လက်တွေ့လား” ပြန်ပြန် ဆန်းစစ်တဲ့အကျင့်မွေးရမှာပါ။

မိမိကိုယ့်ကိုယ် ထပ်ခါထပ်ခါ
မေးခွန်းတွေမေးကြည့်နေလို့ရပါတယ်။

“ငါအိပ်မက်မက်နေတာလားပေါ့” ပြီးရင် ပတ်ဝန်းကျင်မှာ တခုခုလွဲနေတာများရှိလား စစ်ဆေးကြည့်ပါ။ တခုခုလွဲနေတာတွေ့ရင် သင်အိပ်မက်ထဲရောက်နေတာဖြစ်နိုင်ပါတယ်။

အဲ့လို ဆန်းစစ်တဲ့ အကျင့်ဖြစ်အောင်မွေးထားရင် ညဖက်အိပ်လို့ အိပ်မက်ထဲရောက်ရင်လဲ အကျင့်ပါပြီး စစ်ကြည့်မိရင်း အိပ်မက်မက်နေတာကို ရိပ်မိသွားပါလိမ့်မယ်။

ဥပမာ inception ရုပ်ရှင်ထဲမှာဆို မင်းသား Leonardo က ဂျင်ကလေးကိုလှည့်ကြည့်ပြီး ဂျင်လည်တာရပ်သွားလား မရပ်ဘူးလားကို ကြည့်ရင်း အိပ်မက်လား လက်တွေ့ဘဝလား ဆုံးဖြတ်သလိုပေါ့။

ဂျင်ကအချိန်တန်လို့ရပ်သွားရင် လက်တွေ့ဘဝပေါ့။

မရပ်တမ်းလည်နေရင်တော့ အိပ်မက်ထဲရောက်နေပါပြီဗျာ။

အဲ့နည်းကို ဒီလို စမ်းကြည့်လို့ရပါတယ်။

စာရွက်ပေါ်မှာ စာတချို့ ချရေးထားပြီး ပြန်ပြန်ဖတ်ကြည့်တယ်။

ဥပမာ – Science nuts လို့ရေးထားပြီး ခဏခဏဖတ်တဲ့အကျင့်လုပ်တယ်။

ဖတ်ရင်းနဲ့ ဖတ်ရင်းနဲ့ တချိန်ကျတော့ Ncience Suts လို့ပြောင်းလာတယ်။

ဒါမှမဟုတ် Nuts science လို့များပြောင်းလာတယ်ဆိုရင်တော့ မိတ်ဆွေ အိပ်မက်ထဲရောက်နေပါပြီဗျာ။

နောက်တခု စမ်းကြည့်လို့ရတာက ပါးစပ်ပိတ်ပြီး လေမှုတ်ကြည့်တာပါ။

လက်တွေ့ဘဝထဲမှာဆို ဘာလေမှမထွက်ပါဘူး။

သင်ပါးစပ်ပိတ်ပြီး လေမှုတ်နေရင်းနဲ့ လေထွက်လာတယ်။ ပူဖောင်းတလုံးပါ လိုက်ကြီးလာတယ်ဆို မိတ်ဆွေ မက်ချင်တဲ့ Lucid dream ထဲရောက်နေပြီဆိုတာ သတိရလိုက်ပါ။

စာကရေးဖို့ကျန်သေးတာမို့ နောက်တပိုင်းခွဲလိုက်ပါမယ်။ နောက်ဆုံးအပိုင်း (Part 3) မှာ နောက်ထပ်လေ့ကျင့်နည်းတွေ ထပ်ပြောသွားပါဦးမယ်။

Thanks for your time!

လင်းမူ

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။