အိပ်မက်ကိုထိန်းချုပ်ကြခြင်း (သို့) Lucid dreaming ဆိုတာဘာလဲ (Part 3)

Lucid dream မက်အောင် နောက်ထပ်လေ့ကျင့်လို့ရတဲ့ နည်းလမ်းကတော့
MILD လို့အတိုကောက် ခေါ်တဲ့ Mnemonic induction of lucid dreams ဆိုတဲ့နည်းပါ။

ဒီနည်းကကျ စိတ်ကိုလေ့ကျင့်ပေးသလိုပါပဲ။
မိမိကိုယ်ကို အိပ်ခါနီး သတိပေးရပါတယ်။

“ငါအိပ်ပျော်သွားလို့ အိပ်မက်မက်တဲ့အခါ ငါသိနေမယ် မှတ်မိနေမယ်” စသဖြင့် ကိုယ့်ဘာသာ သတိပေးရင်း အိပ်သွားတာပါ။
(သိုင်းမချခင် အီးရားးးးဆိုပြီး ကီသွင်းသလိုပေါ့)

တရေးနိုးလာရင်လဲ ပြန်မအိပ်ခင် အဲ့လိုသတိလေးသွင်းရင်း ပြန်အိပ်သွားရင် dream ထဲရောက်တဲ့အခါ သတိရသွားဖို့ chance ပိုများတယ်လို့ဆိုပါတယ်။

တတိယနည်းကတော့ Wake back to bed (WBTB) လို့ခေါ်ပါတယ်။

သိပ္ပံပညာရှင်တွေတွေ့ရှိချက်အရ အိပ်မက်တွေက REM sleep မှာပဲမက်ပြီး ညနက်လာလေလေ မိုးလင်းခါနီးလာလေလေ REM sleep ကပိုပိုကြာလာတယ်လို့ဆိုပါတယ်။

ဆိုလိုတာက မိုးလင်းခါနီး မနက် ၃-၄ နာရီလောက်ဆို အိပ်မက်တွေကပိုကြာကြာမက်တယ်ပေါ့။

ဒီအချက်ကိုအခြေခံပြီး ဘာလုပ်လို့ရလဲဆိုတော့ မနက်အစောကြီး ၃နာရီလောက် alarm ပေးထားပြီး တရေးနိုးအောင်လုပ်လိုက်တယ်။ ပြီးတော့မှ အပေါ်က ပြောထားတဲ့ MILD method နဲ့ “ငါအိပ်မက်ထဲသွားတော့မယ်…ငါအိပ်မက်ထဲရောက်တော့မယ်” စသဖြင့် သတိပေးရင်း ပြန်အိပ်လိုက်တာပါ။

အဲ့လိုဆို မိုးလင်းခါနီး အိပ်မက်မက်တဲ့အခါ lucid dream ပိုမက်တယ်လို့ လေ့လာတွေ့ရှိချက်တွေကဆိုပါတယ်။

(ဒါကြောင့် တချို့ lucid dreamer တွေက တရေးနိုးပြီး ပြန်အိပ်ရင် lucid dream လိုလို ထပ်မက်လို့ရနေတာပါ။)

တချို့ကလဲ တရားထိုင်တဲ့အကျင့် (Meditation) နဲ့လဲ စိတ်ကိုကျင့်လို့ရတယ်လို့ဆိုပါတယ်။

အနောက်တိုင်းမှာတော့ Lucid dream ရအောင် စက်ပစ္စည်းတွေနဲ့ လုပ်ကြတာရှိပါတယ်။

ဒါကလဲ သိပ္ပံတွေ့ရှိချက်တခုကို အခြေခံထားတာပါ။

လူတွေအိပ်ရင်ဖြစ်ဖြစ် နိုးနေရင်ဖြစ်ဖြစ် brain ကို EEG ဆိုတဲ့စက်နဲ့တိုင်းရင် wave လေးတွေမြင်ရပါတယ်။

EEG ဆိုတာအောက်ကပုံလိုမျိုး တိုင်းတဲ့စက်ပါ။

ပုံမှန် မိုးလင်းလို့အလုပ်လုပ်နေရင် beta wave ထွက်ပါတယ်။

မျက်လုံးလေးခဏပိတ်ပြီး အနားယူလိုက်ရင် alpha wave ဖြစ်သွားပါတယ်။

အဲ့လိုပဲ lucid dream မက်တဲ့သူမှာဆို တအားမြန်တဲ့ Gamma wave ဆိုတာထွက်တယ်လို့ တွေ့ရှိတယ်။

အဲ့တော့ အဲ့လို gamma wave ရအောင် အပြင်ကနေ လှုပ်စစ်အပျော့စားနဲ့ လှုံဆော်ပေးရင် lucid dream ရနိုင်တယ်ဆိုပြီး လျှပ်စစ်ဦးထုပ်တွေ၊ မျက်မှန်တွေ ထွင်ပါတော့တယ်။

အဲ့ဦးထုပ်တွေဆောင်း ၊ မျက်မှန်တွေတပ်ပြီး အိပ်ရပါတယ်။ (တော်တော်လေး ကြောင်တဲ့အလုပ်ပါ…လွတ်လွတ်လပ်လပ်ကို မအိပ်ရဘူး)

အိပ်ပျော်သွားရင် REM Sleep ရောက်မရောက်
ဦးထုပ်ကစစ်ဆေးနေတယ်။ မျက်မှန်ဆိုလဲ မျက်လုံးလှုပ်နေပြီလား စစ်ဆေးတယ်။

REM sleep ထဲရောက်ပြီလို့ စက်ကသိရင် ဒီကောင်အိပ်မက်မက်နေပြီဆိုပြီး အပြင်ကနေ လျှပ်စစ်ခပ်ပျော့ပျော့ပေးလိုက်တယ်။

အဲ့လိုဆို brain က နဲနဲနိုးသွားပြီး (အရမ်းကြီးလဲနိုးလာလို့မရဘူး အဲ့ဦးထုပ်တွေ မျက်မှန်တွေနဲ့ တခါပြန်အိပ်နေရမယ်) dream ထဲရောက်နေတာသတိထားမိသွားမယ်ပေါ့

“ခင်ဗျားတို့လိုချင်တဲ့ lucid dreamကြီးရပါပြီပေါ့” ဆိုပြီး ကြော်ငြာထားပါတယ်။

ဒါတွေက တကယ်ရောဖြစ်နိုင်ရဲ့လား Gimmick (ဂျင်း) တွေလားဆိုတာတော့ စာရေးသူလဲမစမ်းဖူးလို့ မသိပါ။

သုတေသနတွေကတော့ ရတယ်ဘာညာရေးပေမယ့် စမ်းထားတဲ့သူကြည့်လိုက်တော့ ၅ယောက်လောက်နဲ့ပဲစမ်းထားတာမို့ ဘာမှယုံလို့မရပါဘူး။

ဝယ်စမ်းချင်ရင်လဲ စျေးကမသေးလှပါဘူး။ US dollar 200 တန်ကနေ ထောင်ဂဏန်းထိရှိတာမို့ (…ဟဲဟဲ ) ကိုယ့်ဘာသာပဲ လေ့ကျင့်ယူတာကမှ ဟုတ်တုတ်တုတ်ရှိဦးမယ်။

တချို့ customer တွေပြောတာတော့ စစချင်းစမ်းတဲ့အခါတော့ သိပ်မရပေမယ့် ကြာလာရင် ပိုရလာတယ်လို့ဆိုတယ်။

လုပ်ယူထားတဲ့ first experience ကတော့ lucid dream မက်ပေမယ့် ငါအောင်မြင်ပြီကွဆိုပြီး အရမ်းပျော်သွားလို့ excited ဖြစ်ကာ ပြန်နိုးလာပါသတဲ့။

နောက်ပိုင်းတော့ lucid dream တွေပိုမက်တယ်လို့ဆိုကြပေမယ့် (စျေးကြီးပေးဝယ်ထားမိလို့ မမက်လဲ ဟန်ပါပါနဲ့ ဂျင်းပြန်ထည့်နေတာလဲဖြစ်နိုင်) ကိုယ်တိုင်စမ်းကြည့်မှပဲ သိမှာပါ။

တချို့ဟာလေးတွေကတော့ အနံ့မွှေးမွှေးလေးထည့်ထားတဲ့ ဖယောင်းတိုင်တို့ ၊ ပန်းရနံ့တို့ ၊ မီးအိမ်တို့စသဖြင့် ရနံ့မွှေးမွှေးနဲ့ အိပ်စက်တဲ့အခါ lucid dream ရတယ်ဘာညာလဲရှိပါတယ်။

ကဲ….ဒီလောက်ဆိုရင် ၃ ပိုင်းခွဲပြီးရေးခဲ့တဲ့ lucid dream အကြောင်း အတော်လေးသိလောက်ပြီလို့ထင်ပါတယ်။

Lucid dream ကိုစမ်းကြည့်လေ့ကျင့်ကြည့်လို့
ရသလို တကယ့် lucid dreamer များကတော့ သူများနဲ့မတူ တမူထူးခြားတဲ့သူတွေဖြစ်ကြောင်း ပြောရင်း အဆုံးသတ်လိုက်ပါပြီဗျ။

Thanks for your time!

လင်းမူ

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။