သင့်ညီလေးကိုရှင်ပြုပေးသင့်သလား?

ညီလေးကို ရှင်ပြုပေးကြတဲ့အလေ့အထကို ဘာသာရေးယုံကြည်မှုအရ တချို့လူမျိုးတွေမှာ လုပ်လေ့ရှိပါတယ်။

အထူးသဖြင့် အစ္စလာမ်ဘာသာဝင်များနဲ့ ဂျူးလူမျိုးက ကလေးဘဝထဲက အမျိုးသားလိင်အင်္ဂါထိပ်ကို ဖြတ်ပြီး ရှင်ပြုပေးတတ်ကြပါတယ်။ ဒါကို circumcision လုပ်တယ်လို့ခေါ်ပါတယ်။ အခုနောက်ပိုင်းမှာ အမေရိကန်နဲ့ သြစတေးလျနိုင်ငံတွေမှာဆိုရင် ဒါက အလေ့အကျင့်တခုလိုဖြစ်နေပါပြီ။

ဒီတော့ ညီလေးကိုရှင်ပြုပေးတာနဲ့ မပြုပေးတာဘာများကွာမလဲ။ ကောင်းကျိုးပိုရှိသလား သို့မဟုတ် ဆိုးကျိုးပိုရှိသလားဆိုတာ ကျန်းမာရေးဗဟုသုတအနေနဲ့ ရှင်းပြပေးသွားပါမယ်။

အမျိုးသားအင်္ဂါထိပ်က အရေပြားလေးက ဆီးသွားတဲ့အပေါက်ကို ကာကွယ်ပေးထားပါတယ်။ ဆီးသွားပြီးလို့ ကျန်တာဖြစ်ဖြစ်၊ မသန့်ရှင်းဘဲထားတာ ကြာရင်ဖြစ်ဖြစ် ချေးညော်တွေ အညစ်အကြေးတွေကပ်နေတတ်ပါတယ်။

အဲ့ အညစ်အကြေးတွေစုလာရင် ဆီးလမ်းကြောင်းပိုးဝင်တတ်တာ၊ အမျိုးသားအင်္ဂါထိပ်ဖူးယောင်ယမ်းတာ၊ မှိုရောဂါစွဲကပ်တာ စတာတွေအပြင် လိင်အင်္ဂါ ကင်ဆာအထိဖြစ်နိုင်ခြေရှိပါတယ်။

ဒါ့အပြင် ညီလေးထိပ်ကအရေပြားက အရမ်းတင်းကြပ်ပြီး အနောက်ကိုဆွဲလှန်မရတဲ့ ပြဿနာ (Phymosis)၊
လှန်ပြီးသား အရေပြားကို ပြန်ဆွဲချလို့မရတဲ့ပြဿနာ (Paraphymosis) စတဲ့ ပြဿနာတွေကြုံတတ်ပါတယ်။

ညီလေးကိုရှင်ပြုပေးလိုက်တဲ့အခါ ဘာကောင်းကျိုးတွေရှိလာမလဲဆိုတော့
အညစ်ကြေးတွေ အလွယ်တကူမစုနေတော့ဘဲ ရေချိုးလိုက်ရုံနဲ့ သန့်စင်ပြီးသားဖြစ်သွားမယ်။
သန့်ရှင်းရေးလုပ်ရတာပျင်းတဲ့သူတွေအတွက်တော့ အိုခေမှာစိုပြေသွားပါတော့တယ်။

အရေပြားထိပ်ဖူးယောင်တာ၊ ဆီးလမ်းကြောင်းပိုးဝင်တာတွေလဲ သက်သာသွားပြီး ပိုကောင်းတာက လိင်တံကင်ဆာဖြစ်နှုန်းလျော့ကျသွားတာပါ။

ဒါတင်မကပဲ မိမိရဲ့လိင်ဆက်ဆံဖော် partner ကိုလဲ သားအိမ်ခေါင်းကင်ဆာ (cancer of cervix) မဖြစ်အောင် ကာကွယ်ပြီးသားဖြစ်သွားပါတယ်။
ဘာလို့လဲဆိုတော့ ညီလေးထိပ်ကအညစ်အကြေးတွေက ကင်ဆာ ဖြစ်စေနိုင်တဲ့ဓာတ်တွေပါနေလို့ဖြစ်ပါတယ်။ ဒါကြောင့် သားအိမ်ခေါင်းကင်ဆာကိုကာကွယ်လို့ရတဲ့ နည်းလမ်းတခုက အမျိုးသားကို circumcision လုပ်ခိုင်းတာပါ။

ဒါပေမယ့် အသက်ကြီးမှတော့ ဘယ်သူမှ ရှင်မပြုချင်တော့ပါ။
ခွဲရစိတ်ရ နာရကျင်ရနဲ့ အလုပ်ပျက်အကိုင်ပျက်ဖြစ်လို့ပါ။ အကောင်းဆုံးကတော့ ကလေးဘဝထဲကလုပ်ထားခြင်းဖြစ်ပါတယ်။

ညီလေးကိုရှင်ပြုလိုက်ရင် လိင်ဆက်ဆံတဲ့အခါ အရသာပိုတိုးလာတယ်တို့ အရသာမကောင်းတော့ဘူးလို့ အယူမှားတတ်ကြပါတယ်။ တကယ်တမ်းက အဲ့လောက်မသိသာပါဘူး။
ညီလေးက ပုံမှန်ရုပ်ပဲဖြစ်ဖြစ် ထိပ်ကတုံးပဲဖြစ်ဖြစ် sex ကိုအဲ့လောက်မသိသာစေပါဘူး။

တချို့ကလဲ အာရုံခံနေရာတွေကိုပါ ဓားနဲ့ဖျက်ဆီးမိရင် ဒုက္ခရောက်မှာ sex ကိုမသာယာမှာကြောက်ကြပါတယ်။ တကယ်ကျွမ်းကျင်တဲ့ဆရာဝန်နဲ့ဆို ဘာပြဿနာမှမရှိပါဘူး။

အပြာသိုင်းကားတွေထဲက ဆရာကြီးတွေကိုကြည့်ကြည့်ရင် အတော်များများရှင်ပြုထားကြပြီး အေးအေးဆေးဆေး သိုင်းချနေကြတုန်းပါပဲ။

ခွဲစိတ်ရတဲ့ကိစ္စတခုဖြစ်လို့ သွေးမတိတ်တဲ့ရောဂါရှိတာတို့ဆိုရင် မခွဲစိတ်သင့်ပါ။ ခွဲစိတ်ပြီးပိုးဝင်တာ၊ ဆီးမသွားနိုင်တာ စတဲ့ အပရိက ပြဿနာလေးတွေတော့ရှိတတ်ပေမယ့် ဆိုးဆိုးရွားရွားပြဿနာမရှိတတ်ပါ။

မခွဲစိတ်ခင် ဆရာဝန်နဲ့ သေချာတိုင်ပင်ပြီးမှ ခွဲစိတ်သင့်ပါတယ်။ မဖြစ်မနေလုပ်စရာတော့မလိုပါ။ အရပ်ထဲက ဓားသမားများနဲ့တော့ ညီလေးကို မကစားသင့်ပါဘူး။

ဒါဆို ညီလေးကို မဖြစ်မနေရှင်ပြုပေးရတော့မှာလားလို့ မေးရင် မိမိဆန္ဒပဓာနပါပဲ။ ပုံမှန်သန့်ရှင်းရေးလုပ်ရုံနဲ့ အပေါ်ကရောဂါတွေ မဖြစ်အောင်ကာကွယ်လို့လဲရပါတယ်။

ဒါကြောင့် ရှင်ပြုခြင်းမပြုခြင်းက မိမိရွေးချယ်မှုပါပဲ။
ကောင်းကျိုးတွေပိုရလာမှာဖြစ်ပေမယ့် ခွဲစိတ်ရတဲ့ဒဏ်ကိုတော့ ခဏတာ ခံစားရမှာပါ။

ကဲဒီလောက်ဆိုရင် ညီလေးကိုရှင်ပြုပေးသင့်လား မပြုသင့်ဘူးလားဆိုတာ ရေးရေးမျှသိသွားလောက်ပြီထင်ပါတယ်။

Min Ko Gyi

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။