အိမ်မြှောင်ပုံမပါသော မောင်အိမ်မြှောင့်ပုံပြင်

စာဖတ်သူတွေထဲက တခါလာမေးဖူးတဲ့ကိစ္စလေးကို ဖတ်မိသွားလို့ ရေးပေးလိုက်တာပါ။

အိမ်မြှောင်အကြောင်း ထူးဆန်းတဲ့အချက်လေးတွေပဲဖြစ်ပါတယ်။ အိမ်မြှောင်က ကိုယ့်အမြီးကိုပြန်စားတာ တွေ့ဖူးလို့… အဲ့တာဟုတ်လားလို့ စာဖတ်သူတယောက်ကလာမေးထားတာပါ။

အဲ့အကြောင်းကိုပြောဖို့ဆို အိမ်မြှောင်နဲ့သူ့အမြီးကိစ္စကို စပြောရပါမယ်။ အိမ်မြှောင်က သူအတိုက်ခိုက်ခံရတဲ့အခါ ထွက်မပြေးခင် သူ့အမြီးကို အရင်းကဖြတ်ချ ထားခဲ့ပါတယ်။

ကျန်ခဲ့တဲ့အမြီးက တဆက်ဆက် ခုန်နေလို့ ရန်သူကအမြီးကိုပဲ အာရုံစိုက်နေတဲ့အချိန် အိမ်မြှောင်က တချိုးတည်းလစ်ပြေးသွားပါပြီ။ အဲ့လို မိမိ ခန္ဓာကိုယ်ကို မိမိဘာသာဖြတ်ချနိုင်တဲ့အစွမ်းရှိတာကို Autotomy လို့ခေါ်ပါတယ်။ Auto- ဆိုတာ self (မိမိဘာသာမိမိ) ဖြစ်ပြီး -tomy ဆိုတာက amputation (ဖြတ်တောက်ခြင်း) ဖြစ်ပါတယ်။

အိမ်မြှောင်သာမက တခြားသော ဖွတ်မျိုးနွယ်ဝင်တွေ ပုတ်သင်မျိုးနွယ်ဝင်တွေမှာလဲ ဒီလို autotomy အစွမ်းရှိကြပါတယ်။ ထူးခြားချက်က အိမ်မြှောင့်အမြီးက ခန္ဓာကိုယ်နဲ့ တဆက်ထဲမဟုတ်ဘဲ အဆစ်ကလေးတွေနဲ့ချိတ်ထားတာမို့ အလွယ်တကူအဆစ်ဖြုတ်ချလိုက်လို့ရတာပါ။

မြင်အောင်ပြောရရင် လက်ပတ်နာရီမှာ ကြိုးအတိုအရှည်ညှိသလိုပဲ အဆစ်ကလေးတွေနဲ့ အမြီးကိုလိုသလိုဖြုတ်ချလို့ရတာမျိုးပါ။ အမြီးနားက ကြွက်သားတွေကလဲ လျော့တွဲတွဲဖြစ်နေတာမို့ အလွယ်တကူဖြတ်ချလိုက်လို့ရနေတာပါ။

ဖြတ်လိုက်လို့ကျန်ခဲ့တဲ့ အသားစ အဖတ်က သူ့ဘာသာပြန်ကပ်သွားပြီး သွေးထွက်လွန်မှာလဲစိတ်ပူစရာမလိုပါဘူးတဲ့။ အဲ့တော့ အိမ်မြှောင်က အသက်နဲ့ အမြီးကိုလဲလိုက်ရတဲ့သဘောပါ။

ဒီလို အမြီးကို စတေးလိုက်ရတဲ့ အိမ်မြှောင်တကောင်ရဲ့ နောက်ကွယ်မှာကြီးမားတဲ့ ဘေးဒုက္ခတွေကစောင့်ကြိုနေပါတော့တယ်။ ပထမဆုံးတချက်ကတော့ တခြားအိမ်မြှောင်တွေက သူ့ကို အိမ်မြှောင်အရာ မသွင်းတော့တာပါ။

အမြီးမပါတဲ့ကောင်ကို တခြားအကောင်တွေက သိပ်ပြီးမေးထူးခေါ်ပြောမလုပ်ကြတော့ပါဘူးတဲ့။ အထီးကျန်ဘဝကိုရောက်သွားတဲ့အိမ်မြှောင့်ဘဝပါ။

ဒါအပြင် မိတ်လိုက်တဲ့အခါမှလဲ အိမ်မြှောင်မလေးတွေက မကြည်တော့ပါဘူးတဲ့။ ခန္ဓာကိုယ်မစုံလင်တော့တဲ့ အကောင်ကို အိမ်မြှောင်အမတွေက ပလစ်ထားကြပါသတဲ့။ အိမ်မြှောင်အမဆိုရင်လဲ ဥအုတဲ့အခါ မိတ်လိုက်တဲ့အခါ အရင်ကလိုအဆင်ပြေမနေပါဘူးတဲ့။

ဒါပေမယ့် ကံကောင်းတာတခုက အိမ်မြှောင်အမြီးက ပြန်တော့ပေါက်ပါတယ်။ တသက်လုံး အပယ်ခံဘဝတော့ရောက်မသွားတော့ပါဘူး။ အမြီးမရှိရင် အိမ်မြှောင်က သွားတာလာတာနှေးသွားပါတယ်။ အမြင့်တက်ရတဲ့အခါမျိုးမှာလဲ ပုံမှန်ထက်အားနည်းသွားတယ်လို့ဆိုပါတယ်။

ပိုပြီးအရေးကြီးတာက အမြီးမှာ ခန္ဓာကိုယ်အတွက်လိုအပ်တဲ့အဆီတွေနဲ့ စွမ်းအင်တွေကို သိမ်းထားတာရှိပါတယ်။ ဒါကြောင့် အိမ်မြှောင်တွေဆောင်းခိုတဲ့အခါပဲဖြစ်ဖြစ်၊ အစာရှာမကောင်းတဲ့အချိန်ဖြစ်ဖြစ် စုထားဆောင်းထားတာတွေကို အမြီးကနေ ပြန်ထုတ်စားစရာမရှိတော့ပါဘူး။

အမြီးက energy source တခုဖြစ်လို့ အမြီးမရှိတော့တဲ့အခါ အစာအာဟာရတွေချို့တဲ့လာတတ်ပါတယ်။ ဒါကိုသိတဲ့ အိမ်မြှောင်တွေက သူတို့ဖြတ်ချခဲ့တဲ့အမြီးကို ပြန်သွားရှာပြီး ပြန်စားတတ်ပါတယ်တဲ့။

အမြီးကိုရသလောက်ပြန်စားလိုက်တော့မှ အသားဓာတ် အဆီဓာတ်တွေပြန်ရလာပြီး ပိုရက်ကြာကြာအသက်ရှင်နိုင်ပါသတဲ့။ ဒီလိုအမြီးကို ပြန်သွားရှာတာက အခန့်မသင့်ရင် ရန်သူနဲ့ပြန်ပက်ပင်းတိုးပြီး နောက်ဘဝကူးသွားနိုင်ပါသေးတယ်။ အတော်လေးမလွယ်တဲ့အလုပ် စွန့်စားရတဲ့အလုပ်တခုပဲဖြစ်ပါတယ်။

အမြီးကို အသက်ရှင်ဖို့ ဖြတ်ချလိုက်ပေမယ့် ဒါဟာ တခါပဲအလုပ်ဖြစ်မှာပါ။
အမြီးမရှိတော့တဲ့ကာလတလျှောက် ရန်သူနဲ့ထပ်မတွေ့ဖို့အရေးကြီးပါတယ်။
အမြီးပြန်ပေါက်ဖို့လဲ ရက် ၆၀ လောက် ပြန်စောင့်ရဦးမယ်ဆိုတော့ အမြီးဖြတ်ချတာက ရေတိုအတွက်ပဲ အသုံးဝင်ပြီး ရေရှည်ပင်ပန်းကြမ်းတမ်းတဲ့အလုပ်တခုပါပဲ။ ဒါကြောင့် အဆင့်မြင့်တဲ့သတ္တဝါတွေမှာ ဒီ function ဆက်ပါမလာတာဖြစ်နိုင်ပါတယ်။

ဒီလောက်ဆိုရင် အိမ်မြှောင်တွေရဲ့ အပြုအမူနဲ့ ဘဝရပ်တည်ရေးကို သဘောပေါက်လောက်ပြီထင်ပါရဲ့။ သိချင်နေတဲ့အဖြေလဲရသွားလောက်ပြီထင်ပါရဲ့။

Thanks for your time!

လင်းမူ

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။