ပင့်ကူက သူ့အမျှင်နဲ့သူဘာလို့ ပြန်မကပ်ရတာလဲဆိုတဲ့ ပင့်ကူပုံပြင်

ဒီတခါမှာလဲ မောင်ပင့်ကူအကြောင်း ထူးဆန်းတာလေးတွေဖတ်မိလို့ ပင့်ကူပုံမပါဘဲ ရေးပေးလိုက်ပါတယ်။

ပင့်ကူဆိုတာနဲ့ spiderman ကိုပြေးမြင်မိကြမှာပါ။ Spiderman ဆိုရင် ကြိုးမျှင်တွေထုတ်ထုတ်ပြီး လိုတဲ့ပစ္စည်းလှမ်းယူလို့ရတာတို့ ၊ အဆောက်အအုံတွေကို ခုန်ကူးပြီး သွားလို့ရတာတို့ကို မြင်ရတိုင်း spiderman ဖြစ်ချင်ခဲ့တာ ကလေးဘဝရဲ့အိပ်မက်ပါပဲ။

ပင့်ကူကို ထူးခြားအောင်လုပ်ပေးတဲ့အထဲမှာ သူ့ရဲ့အမျှင်လဲပါဝင်ပါတယ်။ ပင့်ကူမျှင်ကို လုံလောက်တဲ့အရွယ်အစားသာ ထုတ်လုပ်နိုင်မယ်ဆိုရင် steel ကြိုးထက်ပိုပြီး ခိုင်ခံ့မယ်…တခြားအရာဝတ္ထုတွေထက် ပိုပြီးအကြမ်းခံမယ်လို့ယူဆကြပါတယ်။

တချိန်မှာ ပင့်ကူမျှင်တွေကို ကြိုးအဖြစ်သုံးလာနိုင်ဖို့ တီထွင်လေ့လာနေကြပါတယ်။

ပင့်ကူအိမ်တွေကို အိမ်ထဲမှာ အခန်းထဲမှာတွေ့တဲ့အခါ အကောင်လေးတွေ ကပ်ငြိနေတာကိုမြင်ဖူးကြမှာပါ။
ပင့်ကူအမျှင်မှာလာကပ်တဲ့ အကောင်ပလောင်တွေကို ပင့်ကူကအေးအေးဆေးဆေး ဖမ်းစားလိုက်ရုံပါပဲ။

ဒါဆိုမေးစရာရှိတာက ဘာလို့ပင့်ကူမျှင်တွေက ပင့်ကူကိုယ်တိုင်ကို ပြန်မကပ်တာလဲ။ ပင့်ကူအိမ်မှာ ပင့်ကူကဘယ်လို လျှောက်သွားနေနိုင်တာလဲပေါ့။

ဒီအကြောင်းကိုစပြောရရင် ပင့်ကူက အစွမ်းသတ္တိမတူညီတဲ့ ပင့်ကူမျှင် ၇မျိုးလောက်ကိုထုတ်နိုင်ပါတယ်။

ပင့်ကူအိမ်မှာရှိတဲ့ ကြိုးမျှင်တိုင်းက ကပ်စီးစီးဖြစ်မနေပါဘူးတဲ့။
ပင့်ကူအိမ်ရဲ့အလယ်ကနေဖြာထွက်နေတဲ့ ကြိုးမျှင်အဖြောင့်တွေကို ထောက်တိုင်ကြိုးမျှင် (Major ampullate silk) လို့ခေါ်ပြီး တခြားအမျှင်တွေထက်ပိုတောင့်တင်းပါတယ်။
ဘာနဲ့တူလဲဆိုတော့ စက်ဘီးစပုတ်တံအချောင်းတွေနဲ့တူပါတယ်။ အဲ့ထောက်တိုင်ကြိုးမျှင်တွေမှာ ကော်လို့ကပ်စီးစီးတွေမပါပါဘူးတဲ့။

ပင့်ကူကအများအားဖြင့်တခြားကြိုးမျှင်တွေပေါ်က လမ်းမလျှောက်ဘဲ ကော်မပါတဲ့ကြိုးမျှင်ကပဲလမ်းလျှောက်တတ်ပါတယ်။

ပတ်ပတ်လည်ဝန်းရံထားတဲ့ ကြိုးမျှင်တွေကတော့ ကပ်စီးစီးဖြစ်နေပါတယ်။
ဒီအမျှင်တွေကိုတော့ Flagelliform silk လို့ခေါ်ပါတယ်။ အိမ်ပိုင်ရှင်ဖြစ်တဲ့ ပင့်ကူကတော့ ဘယ်အမျှင်ကကပ်တယ် ဘယ်အမျှင်ကတော့ မကပ်ဘူးဆိုတာ သေချာသိပါတယ်။

တခြားအကောင်ပလောင်တွေကတော့ သေချာမသိတဲ့အတွက် ထောင်ချောက်မိပြီး ရုန်းထွက်မရဖြစ်ရပါတော့တယ်။

ဒါပေမယ့် ပင့်ကူက ပင့်ကူအိမ်စဆောက်တဲ့အခါမှာတော့ ကပ်တဲ့ကြိုးမျှင်တွေကိုလဲ နင်းပြီးဆောက်ရပါတယ်။ အဲ့အခါကျ ပင့်ကူရဲ့ ခြေထောက်နင်းပုံက ပညာပါလာပါတယ်။

ပင့်ကူခြေထောက်မှာ ချိတ် ၃ချောင်း (3 hooks) ပါပါတယ်။ ချိတ်၂ချောင်းကို လမ်းလျှောက်ဖို့အတွက်သုံးပြီး တတိယအချောင်းကိုတော့ ကပ်ရင်ပြန်ခွာဖို့အတွက်သုံးပါတယ်။

အောက်ကပုံလေးမှာကြည့်ရင် ခြေ၂ချောင်းက ကြိုးပေါ်မှာကပ်နေတဲ့အခါ ချိတ်နဲ့ပြန်တွန်းပြီး ခွာချလို့ရတာကိုတွေ့ရမှာပါ။

အဲ့လိုပုံစံနဲ့ အထာကျကျလမ်းလျှောက်ပါတယ်။ နောက်ပြီး ပင့်ကူက ခြေချောင်းထိပ်မှာ အဆူးသေးသေးလေးတွေပါပါသေးတယ်။ ဘာနဲ့တူလဲဆိုတော့ ကျနော်တို့ ခြေချောင်းလေးတွေနဲ့တူပါတယ်။

လူတွေက မသိမသာသွားချင်ရင် ခြေဖျားထောက်ပြီးလမ်းလျှောက်သလိုပဲ ပင့်ကူတွေကလဲ ကပ်တဲ့အမျှင်တွေပေါ်မှာ လမ်းလျှောက်ရင် သူတို့ရဲ့ခြေဖျားကအစူးတွေနဲ့ ဖွဖွလေးလျှောက်ပါတယ်။ အဲ့အစူးတွေနဲ့ ခြေဖျားထောက်ပြီးလျှောက်တဲ့အခါ ပင့်ကူမျှင်တွေမကပ်တော့ဘူးလို့ဆိုပါတယ်။

တချို့ပင့်ကူတွေကတော့ ပင့်ကူမျှင်မှာ ကော်မသုတ်ထားဘဲ electrostatic forces နဲ့ကပ်အောင်လုပ်တာမျိုးလဲရှိပါသေးတယ်။

ဘယ်လိုပဲကပ်အောင်လုပ်လုပ် အိမ်ပိုင်ရှင်ဖြစ်တဲ့ပင့်ကူတွေကတော့ အေးအေးဆေးဆေး အလှမပျက်ဘဲ ပင့်ကူအိမ်မှာကူးလူးသွားလာနိုင်ပါသေးတယ်။

Thanks for your time!

လင်းမူ

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။