ကြောင်တွေ ခွေးတွေက သခင်နဲ့အပြင်လောကကို ဘာအရောင်တွေအနေနဲ့မြင်ရသလဲ?

Colourblind အကြောင်းရှာဖတ်ရင်းနဲ့ ရုတ်တရက်သိချင်လာတာက ခွေးလေးတွေ ကြောင်လေးတွေကရော သူတို့သခင်နဲ့ ပတ်ဝန်းကျင်ကို ဘယ်လိုအရောင်နဲ့မြင်ရသလဲဆိုတာ တွေးမိပြီး ရှာဖတ်မိပါတယ်။ ခွေးတွေကြောင်တွေကရော colour blind များရှိကြသလားပေါ့။

အရင်ဆုံး ကြောင်လေးတွေအကြောင်း ပြောပြချင်ပါတယ်။

ကြောင်နဲ့ လူတွေရဲ့ colour vision ကခပ်ဆင်ဆင်တူပါတယ်။ လူတွေရဲ့ မြင်လွှာ (retina) မှာ အလင်းရောင်ကိုသိတဲ့ ဆဲလ် ၂မျိုးရှိပါတယ်။ တုတ်ချောင်းနဲ့တူတဲ့ဆဲလ်တွေကို rod receptors လို့ခေါ်ပါတယ်။ rods တွေက အလင်းအားနည်းတဲ့အခါမှာ ကြည့်လို့မြင်အောင်ကူညီပေးပါတယ်။

ကန်တော့ခွက်ပုံနဲ့တူတဲ့ ဆဲလ်တွေကိုတော့ cone receptors လို့ခေါ်ပါတယ်။ Cone receptors တွေကတော့ အရောင်ကိုသိပြီး colour vision မှာအသုံးကျပါတယ်။

ကြောင်တွေမှာက rods တွေပိုများလို့ ညဖက်အလင်းရောင်နည်းတဲ့အခါ night vision ပိုကောင်းပါတယ်။
ဒါပေမယ့် ကြောင်တွေမှာ cone receptor ကျတော့ လူတွေထက်ပိုနည်းလို့ အရောင်တွေကို လူတွေလောက် စိုစိုပြေပြေမမြင်ရပါဘူး။

လူတွေမှာ နီစိမ်းပြာဆိုပြီး cone receptors ၃မျိုးရှိလို့ trichromats လို့ခေါ်ပါတယ်။ ကြောင်တွေကလဲ trichromats ဖြစ်တယ်လို့ဆိုပေမယ့် အရောင်တိုင်းကိုတော့ လူလောက်မမြင်ရပါဘူး။

အောက်ကပုံမှာ လူမြင်ရတဲ့အရောင်နဲ့ ကြောင်တကောင်မြင်ရတဲ့အရောင်ကို ယှဥ်ပြထားပါတယ်။

လွယ်အောင်ပြောရရင် ကြောင်တွေရဲ့ အမြင်က လူတွေ colour blindရောဂါအပျော့စားတခု ဖြစ်သလိုမြင်ရတာပါ။ အပြာနဲ့အစိမ်းကိုတော့ မြင်ရပေမယ့် အနီစွက်တဲ့အရောင်တွေကိုတော့ ရောပြီးမြင်ရပါတယ်။

ကြောင်တွေရဲ့အမြင်က အစိမ်းကိုအများဆုံးမြင်ရတာဖြစ်လို့ မြင်မြင်သမျှ စိမ်းဖန့်ဖန့်ကြီးပဲဖြစ်နေမှာပါ။

ဒါ့အပြင် ကြောင်တွေက အဝေးမှုန်ပြီး လူတွေလောက် အဝေးကိုမမြင်ရပါဘူးတဲ့။

ကြောင်တွေရဲ့အားသာချက်ကတော့ ကြောင်ရဲ့မြင်ကွင်းက ၂၀၀ဒီဂရီပတ်ပတ်လည်မြင်ရလို့ လူတွေထက် မြင်ကွင်းအနည်းငယ် ပိုကျယ်ပါတယ်။ နောက်ပြီး ညဖက်မှာ night vision လဲပိုကောင်းပါတယ်။

ကြောင်မျက်လုံးအကြောင်းကိုရေးထားတဲ့ post အပြည့်စုံဖတ်ချင်ရင် အောက်က link မှာဖတ်ကြည့်ပါ။

ကြောင်မျက်လုံးများ ညဖက်တွင် အရောင်တောက်ရခြင်း နှင့် ကားလမ်းပေါ်က Cat Eyes များ
https://ouo.io/Jp8Z1k

ခွေးတွေကကျတော့ တမျိုးပါ။

ခွေးတွေက လူတွေလို Trichromats မဟုတ်ဘဲ Dichromats တွေဖြစ်ပါတယ်။

ခွေးတွေရဲ့ မြင်လွှာ (retina) က cone receptors ၂ မျိုးပဲရှိပါတယ်။

ဘယ်အရောင်တွေကို မြင်ရလဲဆိုတာ အတိအကျမသိရပေမယ့် လေ့လာသူတွေကတော့ အပြာရောင်နဲ့ အဝါရောင် ဖြစ်မယ်လို့ ယူဆကြပါတယ်။ တချို့ထင်သလို ခွေးတွေက အဖြူအမည်းပဲမြင်ရတယ်ဆိုတာမဟုတ်ပါဘူး။ ခွေးတွေလဲ အရောင်နဲ့မြင်ရပါတယ်။ဒါပေမယ့် ခွေးတွေမြင်ရတာက လူတွေ colour blind ဖြစ်နေသလိုပါပဲ။ အရောင်မွဲခြောက်ခြောက်တွေပဲ မြင်ရတာပါ။

လူတချို့က ခွေးတွေကို အနီရောင် အရုပ်တွေဝယ်ပေးတတ်ကြပါတယ်။ မြက်ခင်းမှာဆော့တဲ့အခါ အစိမ်းရောင်ကြားထဲ အနီရောင်ဆိုထင်းနေမယ်လို့တွေးကြတာပါ။

ဒါပေမယ့် ခွေးလေးတွေကတော့ အနီရောင်ကို အနီလို့မမြင်ဘဲ ဝါညိုညို ဝါညစ်ညစ်အရောင်အနေနဲ့ပဲ မြင်ရမယ်လို့ဆိုပါတယ်။

ခွေးတွေကို အရုပ်ဝယ်ပေးချင်ရင် အရောင်စုံပါတဲ့ multicolour အရုပ်တွေကပိုသင့်တော်ပြီး shade အမျိုးမျိုး pattern အမျိုးမျိုုးပါရင် ပိုပြီးမြင်ရလွယ်တယ်လို့ဆိုပါတယ်။ အဲ့လိုမှမဟုတ်လဲ တရောင်ထဲရွေးပါဆိုရင်အပြာရောင်အရုပ်က အဆင်ပြေဆုံးပဲလို့ဆိုပါတယ်။

ခွေးတွေက ကြောင်တွေလိုပဲ ညဖက်မှာပိုမြင်ရပြီး အာရုံလဲပိုစိုက်ရလွယ်ပါတယ်။

ဒီလောက်ဆိုရင် အိမ်ကခွေးလေး၊ ကြောင်လေးတွေ သင့်ကိုဘယ်လိုမြင်နေရမလဲဆိုတာ သိလောက်ပြီထင်ပါတယ်။

Thanks for your time!

လင်းမူ

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။