ဘုရားပုံတော်ကိုမြင်ရင် ပြစ်မှားချင်လာသော စိတ်အခြေအနေ

ခေါင်းစဥ်ကို စိတ်ဝင်စားအောင်ပေးထားတာဖြစ်ပါတယ်။ တကယ်တမ်းပြောရရင် ဒီလိုစိတ်ဝေဒနာမျိုးက ဗုဒ္ဓဘာသာတခုတည်းမှာကြုံရတာမဟုတ်ပါဘူး။

ဘာသာတရားတိုင်းမှာလိုလို ဘာသာရေးနဲ့ စိတ်အစွဲတွေရောပြီးဖြစ်တတ်တဲ့ စိတ်ရောဂါအုပ်စုကိုခြုံပြီးဆိုလိုချင်တာဖြစ်ပါတယ်။

အဲ့လိုဖြစ်တဲ့ရောဂါကို Scrupulosity လို့ခေါ်ပါတယ်။ ဘာသာရေးအရဖြစ်ဖြစ် ကျင့်ဝတ်အရဖြစ်ဖြစ်မသင့်လျော်တဲ့ ကိစ္စတွေကို တွေးမိ လုပ်ချင်မိတဲ့စိတ်ရောဂါဆန်းဖြစ်ပြီးတော့ OCD (Obsessive Compulsive Disorder) ရဲ့အခွဲရောဂါတခုပါပဲ။

OCD အကြောင်းကိုတော့ အောက်က link မှာဖတ်ကြည့်လို့ရပါတယ်။

https://ouo.io/JHL0t7

ဒီရောဂါကဘာဖြစ်တာလဲဆိုတော့ ဘုရားဆင်းတုတွေမြင်ရင် ဆဲချင်လာတာတို့၊ ဘုရားပုံတော်ကိုမြင်မိရင် လိင်ပိုင်းဆိုင်ရာအတွေးတွေဝင်လာတာတို့၊ ဘုရားနဲ့ ညစ်ညမ်းတဲ့ပုံတွေကိုတွဲမြင်နေတာတို့ စတာတွေပါဝင်ပါတယ်။

တခါတုန်းက facebook မှာ အဲ့အကြောင်းဝန်ခံထားတဲ့ post တခုတောင်ဖတ်မိပါသေးတယ်။
Post ပိုင်ရှင်အမျိုးသမီးက သူ့စိတ်ကြောင့် သူစိတ်ညစ်ရပုံကို ရေးထားတာပါ။

သူရေးထားတာကိုမှတ်မိသလောက်ပြန်ပြောပြရရင် သူကဘာသာတရား လိုက်စားပါတယ်။
ဒါပေမယ့် ဘုရားရှိခိုးနေရင်း ဘုရားကိုအာရုံပြုနေရင်း ညစ်ညမ်းတဲ့ပုံတွေနဲ့ ဘုရားကိုတွဲမြင်မြင်မိနေပါတယ်တဲ့။ သူကမကောင်းမှန်းသိပေမယ့် စိတ်ကလုံးဝဖျောက်လို့မရဘဲ အဲ့လိုဖြစ်ဖြစ်နေလို့ သူရူးနေပြီလားဆိုပြီး မေးထားတာပါ။

ကျနော်ရှာဖတ်ကြည့်သလောက်တော့ ဒီလိုကိစ္စက ရှားတော့မရှားလှတာကို တွေ့ရပါတယ်။ အနောက်နိုင်ငံတွေမှာလဲ သူတို့ဆိုင်ရာဘာသာရေးအရ အဲ့လိုပြဿနာဖြစ်တာတွေရှိပါတယ်တဲ့။

အထူးသဖြင့် church ကျောင်းမှာဘုရားစာဆိုနေတုန်း ဆဲချင်လာတာတို့၊ သင်းအုပ်ဆရာကို စိတ်ကပြစ်မှားမိနေတာတို့ စသဖြင့် မကောင်းတဲ့စိတ်တွေဝင်ဝင်လာတယ်လို့ဆိုပါတယ်။ သူတို့ကိုယ်တိုင်လဲ မလုပ်သင့်မှန်းသိပေမယ့် စိတ်ကိုထိန်းမရလေတော့ အပြစ်ရှိတယ်လို့ အမြဲခံစားနေရပါတော့တယ်။

ငါတော့ ငရဲအိုးထဲ စောက်ထိုးကျတော့မယ် ဆိုပြီးတွေးကာ တနေ့တနေ့လန့်နေတတ်ကြပါတယ်။ ဒီလို အစွဲလမ်းတွေဖြစ်လာတဲ့အတွက် သူတို့ထပ်လုပ်တတ်တဲ့ အပြုအမူတွေက compulsive ဖြစ်လာပါတော့တယ်။

ငရဲကြီးမှာကြောက်လို့ အရင်ကထက်ပိုပြီး ဘုရားရှိခိုးတာ၊ ဘုရားစာရွတ်တာ စတာတွေပိုလုပ်ကြသလို တချို့ကျတော့လဲ ဘုရားသွားရင် ဘုရားကိုမြင်နေမှာစိုးလို့ ဘုရားရှိမယ့်နေရာတွေ ဝေါင်ဝေါင်ရှေး ဝေးဝေးရှောင်ကြပါတော့တယ်။

ခရစ်ယာန်ဘာသာမှာတော့ အပြစ်ဝန်ခံခြင်းဆိုတဲ့သဘောတရားရှိလို့ ဒီလိုလူတွေက မကြာမကြာ အပြစ်ဝန်ခံပြီး (အာပတ်ဖြေတယ်ပဲခေါ်မလား) အပြစ်ကျေအောင်လုပ်တတ်ပါတယ်။

ဗမာအယူအဆကတော့ အောက်လမ်းကပြုစားတာတို့ မကောင်းတဲ့ဝိညာဥ်ပူးကပ်နေလို့ စိတ်တွေရိုင်းဝင်နေတာဆိုပြီး ယတြာချေတာ ၊ ဘာသာရေးအစီရင်လုပ်တာတွေ ရှိကြပါတယ်။ စိတ်ပညာအရကတော့ ဒါက OCD ရောဂါမူကွဲတခုပဲဖြစ်လို့ OCD ရောဂါကို ကုသ သလိုပဲ ကုသကြပါတယ်။

ဘာကြောင့်ဒီလိုဖြစ်ရသလဲဆိုတော့ ဘာသာရေးအစွဲအလမ်းကြီးလွန်းသူတွေ၊ ဘာသာတရားကို ကြောက်ရွံစိတ်နဲ့ ယုံကြည်သူတွေ၊ ဘာသာတရားရဲ့အဓိကအနှစ်သာရကို တန်ဖိုးမထားဘဲ လူတွေပါးစပ်ပြောကိစ္စတွေကိုပဲ ယုံကြည်ကြသူတွေမှာ တွေ့ရတတ်ပါတယ်။

ဒီဝေဒနာရှင်တွေက ဘာသာတရားပိုကိုင်းရှိုင်းတယ်လို့ပြောလို့မရသလို ဘာသာတရားနဲ့ကင်းဝေးနေတာမျိုးလဲမဟုတ်ပြန်ပါဘူး။

တခြားသောအကြောင်းအရာတွေကြောင့်လဲ ဖြစ်တတ်ပါတယ်။ ဥပမာ နေ့တိုင်းဘုရားရှိခိုးတတ်တဲ့သူက တရက်မရှိခိုးမိရင် ဘုရားကသူ့ကို ပစ်ပယ်တော့မယ်တွေးပြီး ဘုရားကိုကြောက်စိတ်နဲ့ ကိုးကွယ်လာတာမျိုးကြောင့် ဖြစ်နိုင်တယ်လို့ ယူဆကြပါတယ်။

ဒီရောဂါက လူသိပ်မသိကြသလို ကုသရတာလဲမလွယ်ကူပါဘူး။
စိတ်ကြောင့်ဖြစ်တဲ့ရောဂါဖြစ်လို့ စိတ်ကိုဦးစားပေးကုသလေ့ကျင့်ရမှာပါ။

ဆေးဝါးနဲ့ကုသကြသလို CBT လို့ခေါ်တဲ့ Cognitive Behavioural therapy နဲ့ စိတ်ကိုပြုပြင်ကုသပေးခြင်းဖြင့် ဝေဒနာသက်သာနိုင်ပါကြောင်း ရေးသားလိုက်ရပါတယ်။

Thanks for your time!

လင်းမူ

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။