လူ

လူဆိုတာ ဘာလဲ။ ဇီဝပညာရှင်တွေက သက်ရှိလို့ခေါ်မယ်။ ခြေနှစ်ချောင်းလို့ ပြောမယ်။ ဓာတုဗေဒ ပညာရှင်တွေက ဓာတ်အစုအဝေးလို့ ခေါ်မယ်။ ခေါ်ချင်တဲ့သူ မျိုးစုံခေါ်နေကြတာပဲ။

ဒါပေမယ့် လူဆိုတာက ဘာလဲ။ ဘယ်အရာကို လူလို့ ခေါ်တာလဲ။ ပတ်ဝန်းကျင်က ကိုယ်နဲ့ ဆင်တူတဲ့ သက်ရှိကို ဆွဲခေါ်ပြီး လူပါလားလို့ မေးရင် လူပေါ့လို့ဖြေမယ်။

ဒါပေမယ့် တခါတလေ “မင်းလုပ်ရပ်က လူနဲ့တောင် မတူတော့ဘူးကွ” ဆိုသလို…
“မင်းက လူစိတ်ပျောက်နေတာပဲ” ဆိုသလို…
“သူတို့လုပ်နေတာ လူမဆန်တော့ဘူး” ဆိုသလို…
အမျိုးမျိုး ပြောကြပါတယ်။

ဒါဖြင့်ရင် လူဆိုတာ တကယ်တမ်းဘာလဲ။ တိရိစ္ဆာန်နဲ့ လူကြားက ကွာခြားမှုက ဘာလဲ။

လက်တွေ့ကျကျနဲ့ ဓမ္မဓိဌာန်ကျကျ တွေးကြည့်ရအောင်။

လူနဲ့ အခြားသက်ရှိတွေက လွန်ခဲ့တဲ့ နှစ် ၅၀၀၀ ပတ်ဝန်းကျင်အထိ ဘာမှမကွာဘူး။ စားမယ်၊ အိပ်မယ်၊ မျိုးပွားမယ် ဒါပဲ ရှိတယ်။ ဒီ ၃ခုဟာ တကယ်တော့ ခံစားချက် အသားပေး လုပ်ရပ်တွေပဲ။ ခံစားချက်တစ်ခု ဖြစ်ပေါ်လာတဲ့အခါ ခံစားချက်ကို ပြည့်အောင် ဖြည့်စွမ်းလိုက်တယ်။ သိပ်အေးချမ်းတာပဲ။

ဒါပေမယ့် ပြီးခဲ့တဲ့ နှစ် ၅၀၀၀ ကနေစပြီး လူတွေဟာ ကနဦး ပြည့်စုံခြင်း အဆင့် (အစာကို သိုလှောင်နိုင်၊ နေစရာ အကာအရံရလာ၊ ကြင်သူ သက်ထား ရှိလာ) ကို ရောက်လာတယ်။ အဲ့မှာ တွေးတောခြင်းနဲ့ မှတ်တမ်းတင်ခြင်းကို စလုပ်လာတော့တာပဲ။ တွေးရာကနေ တိုးတက်လာတယ်။ မှတ်တမ်းတင်ရာကနေ သမိုင်းဖြစ်လာတယ်။ အဲ့အချိန်ကစပြီး လူတွေကို ကပ်ဆိုက်တော့တာပဲလို့ ယူဆလို့ရတယ်။

• 

သင်ချစ်ရတဲ့ ကြောင်လေးဟာ သူရဲ့ ကြောင်မျိုးကြောင်နွယ် တိုးတက်ဖို့ ဘာမှလုပ်မှာ မဟုတ်ဘူး။ သူ့ရဲ့နောက်မျိုးဆက်တွေ ဖတ်ဖို့ သမိုင်းလည်း ချန်ထားခဲ့မှာ မဟုတ်ဘူး။ ဘာဖြစ်လို့လဲဆိုရင် ကြောင်တွေဟာ အခုထိ ကနဦးပြည့်စုံခြင်း အဆင့်ကို မကျော်သေးဘူး ဖြစ်နေလို့ပဲ။ အစားအတွက် ကုန်းရုန်းရှာရတယ်၊ မဟုတ်ရင် ဟူးမန်းတွေက ကျွေးရတယ်။ အိပ်ဖို့ကို အမြဲတစေ ရုန်းရတယ်။ ကိုယ်လိုတဲ့အချိန် မျိုးပွားဖို့ မျိုးစိတ်က အသင့်ရှိမနေဘူး။

အဲ့တာကြောင့် လူနဲ့ ကြောင်ဟာ ကြီးမားတဲ့ ကွာခြားမှု ဖြစ်လာပြီး လူဟာ သက်ရှိလောကမှာ အရာရာကို လွှမ်းမိုးချုပ်ကိုင်လာနိုင်ခဲ့တယ်။

ဒါကြောင့် လူလို့ပြောတဲ့နေရာမှာ တွေးတောခြင်းနဲ့ မှတ်တမ်းတင်ခြင်းက သိပ်ကိုအရေးပါတယ်။ ဒါပေမယ့် အနီးစပ်ဆုံး နှစ် ၃၀၀၀ ပတ်ချာလည်က လူတွေဟာ တွေးတောခြင်းရဲ့ ကျေးကျွန်တွေ ဖြစ်နေကြပြီ။

ဒါဟာ လူတွေအနေနဲ့ ကိုယ့်တိုးတက်မှုမှာ ကိုယ်ပြန်ပြီး အကျဥ်းချခံနေရတာပဲ ဖြစ်တယ်။ ဒီလို အကျဥ်းကျနေတဲ့ အနေအထားက လွတ်မြောက်အောင် လူဟာ တွေးရင်းနဲ့ပဲ ကြိုးပမ်းရတယ်။

ဒါကြောင့် လူဟာ အတွေးမရှိရင် လူမဟုတ်ဘူးလို့တောင် ပြောလို့ရတယ်။ Philosopher စကား ငှားသုံးပါမယ်။ ဆင်ခြင်သိလို့ ပြောပါတယ်။ Rationalization လို့ သုံးကြပါတယ်။

ဒီအတွေးတွေက လူဆိုတဲ့ သက်ရှိမှာ စိုးမိုးလာတဲ့အချိန်က စပြီး လူဟာ ကိုယ့်ရဲ့ နဂိုဗီဇဖြစ်တဲ့ ခံစားချက် (Nature) ကို ဖိနှိပ်တာတွေ ဖြစ်လာတယ်။ စည်းမျဥ်း စည်းဘောင်တွေ ကန့်သတ်ပြီး နင်က ဘာမလုပ်ရဘူး၊ နင်ကတော့ ဘာပဲလုပ်တွေ ဖြစ်လာတယ်။

ဒါကြောင့် လူဆိုတာ စိတ်ရှိတိုင်း လုပ်ခွင့်မရတဲ့ ကိုယ်တိုင် အကျဥ်းချ သက်ရှိ အမျိုးအစားတစ်ခုပဲ ဖြစ်ပါတယ်။

Lucifer

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။