အဆောင်မှာဖြစ်ဖြစ် အိမ်မှာဖြစ်ဖြစ် အမျိုးသမီးများစုပေါင်းနေထိုင်ကြတဲ့အခါ ရာသီစက်ဝန်းစတင်သည့်ရက်များ တူလာတတ်ကြတာကို သတိထားမိကြပါလိမ့်မယ်။
ဒါဟာ ဘာကြောင့်ပါလဲ။
ဒီလိုဖြစ်တာကို သာမန်ပြည်သူများသာမက သိပ္ပံပညာရှင်များကပါ သတိထားမိကြပြီး ဆွေးနွေးငြင်းခုန်စရာ ခေါင်းစဥ်တခုဖြစ်လာရပါတယ်။
အထင်ရှားဆုံး Theory တခုကတော့ “Pheromones” သီအိုရီပဲဖြစ်ပါတယ်။
Pheromones ဆိုတာ မျိုးစိတ်တူ သတ္တဝါအချင်းချင်း ထုတ်လွှတ်အသိပေးသော အချက်ပေး အမှုန်လေးများ (odorant particles) ဖြစ်ပါတယ်။
ဒီအချက်ပေးအမှုန်လေးတွေက လူနဲ့ပရိုင်းမိတ်တွေထက် အဆင့်နိမ့်တဲ့တိရစ္ဆာန်တွေမှာ အလွန်အရေးပါလှပါတယ်။
မျိုးစိတ်တူ အချင်းချင်း အဆိုပါ အမှုန်များထုတ်လွှတ်ကာ အန္တရာယ်ကိုအချက်ပေးခြင်း ၊ မိတ်လိုက်ဖို့ လှုံ့ဆော်ခြင်း ၊ အုပ်စုအချင်းချင်းအသိပေးခြင်း ၊ လမ်းပြခြင်း စတဲ့လုပ်ငန်းတွေကိုလုပ်ဆောင်ပါတယ်။
အဆိုပါ တိရစ္ဆာန်တွေရဲ့ နှာခေါင်းအတွင်းဖက်မှာ
Vomeronasal organ (VNO) ဆိုတဲ့ အစိတ်အပိုင်းပါရှိပြီး အနံ့ခံတဲ့နေရာတခု အပိုပါနေသလိုဖြစ်နေပါတယ်။ (accessory olfactory bulb)
အဲ့ဒီ အပိုပါတဲ့ အနံ့ခံနေရာက သူများတွေထုတ်လွှတ်လိုက်တဲ့ Pheromones တွေကို detect လုပ်ပြီး အချင်းချင်းဆက်သွယ်လို့ရပါတယ်။
တချို့က Pheromones တွေကိုနှာခေါင်းကပဲ အာရုံခံလို့ အနံ့အသက်အမှုန်လို့ခေါ်ကြပေမယ့်
တကယ်တမ်းက pheromones တွေက အနံ့ဆိုပြီး ဦးနှောက် (cerebral cortex) အထိရောက်မလာပါဘူး။
ရှင်းအောင်ပြောရရင် Pheromones တွေကို နှာခေါင်းကအာရုံခံပေမယ့် သူတို့က အနံ့အသက်မရှိပါဘူးတဲ့။ (Pheromones are distinct from consciously perceived odorants)
မျိုးစိတ်မတူတဲ့ သတ္တဝါတွေက ထုတ်လွှတ်တဲ့ အချက်ပြအမှုန်ကိုတော့ Kairomones လို့ခေါ်ပြီး
သူတို့သည်လဲ လေထဲမှာပြန့်ကာ ရန်သူကိုအချက်ပေးနိုင်ပါတယ်။
အမဲလိုက်တဲ့အခါမှာလဲသုံးလို့ရပါတယ်။
ဥပမာ – ကြွက်ရဲ့ Kairomones ကို ဇီးကွက်က အာရုံခံမိရင် ကြွက်ကိုလိုက်ဖမ်းရလွယ်သွားပါတယ်။
ပြန်ချုပ်ပြောရရင် တိရစ္ဆာန်တွေရော လူတွေကပါ Pheromones တွေထုတ်လွှတ်တတ်ပေမယ့်
လူတွေမှာ Pheromones ကိုအာရုံခံတဲ့ organ က evolution မှာ ပါမလာတော့ပါဘူး။
သို့သော် Pheromones တွေပတ်ဝန်းကျင်မှာရှိလာတဲ့အခါ တနည်းနည်းနဲ့ သိပြီး Brain က တမျိုးတဖုံ တုံ့ပြန်တတ်ပါသတဲ့။
ဒါကြောင့် အမျိုးသမီးတယောက် ရာသီစလာတဲ့အခါ Pheromones တွေထုတ်တတ်ပြီး အဲ့ Pheromones တွေကြောင့်များ အတူနေအမျိုးသမီးရဲ့ brain (hypothalamus) ကို ပြောင်းလဲစေကာ menstrual cycle တူလာနိုင်တယ်လို့ ယူဆကြပါတယ်။
ဒါကလဲ ယူဆချက်တခုသာဖြစ်လို့ အတည်ယူလို့မရနိုင်သေးပါ။
နောက်ထပ် ဖြစ်နိုင်ချေတခုကတော့
သင်္ချာသဘောတရားအရ စတင်တဲ့ရက်မတူတဲ့ စက်ဝန်း ၂ခုဟာ တဖြည်းဖြည်း လနဲ့ချီကြာလာရင် စက်ဝန်းတွေပြန်ပြန် ထပ်လာပြီး နီးလာတတ်ပါတယ်။
သူ့ဘာသာ cycle သဘောအရ ရက်တွေကပ်လာပြီး နီးလာသလို တူလာသလိုဖြစ်တာကြောင့် အတူနေတာကြာလေ ပိုတူနိုင်ခြေများပါတယ်။
ဒါကို သတိထားမိတဲ့သူက တိုက်ဆိုင်စွာ သတိထားမိတာလို့လဲ ယူဆကြပါတယ်။
ဒီကိစ္စဟာ ရေပန်းစားပေမယ့် အခုထိ တိကျတဲ့ရှင်းပြချက်မတွေ့ရသေးဘဲ theory များသာရှိသေးကြောင်း တင်ပြလိုက်ရပါတယ်။
Thanks for your time!
လင်းမူ
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။
