သင် ကိုယ့်အကြောင်းကိုယ် ဘယ်လောက်သိပြီလို့ထင်ပါသလဲ။

ဒီ post ကို မဖတ်ခင် Id, Ego နဲ့ Superego အကြောင်းရေးထားတဲ့ post ကိုအရင်သွားဖတ်သင့်ပါတယ်။
အောက်မှာ link တခါထဲထည့်ပေးလိုက်ပါတယ်။

သင့်ပခုံးထက်မှာ အမြဲရှိနေတဲ့ Angel တပါး နဲ့ Devil တကောင်အကြောင်း
https://ouo.io/BVg03o

သင့် ကိုယ်သင် မေးခွန်းတခွန်းပြန်မေးကြည့်ရအောင်။

သင့်အကြောင်း သင်ဘယ်လောက်သိထားလဲ။

သေချာတာတခုကတော့ ဘယ်သူမှ ရာနှုန်းပြည့် ကိုယ့်ကိုယ်ကို မသိကြပါဘူး။

ဘာဖြစ်လို့လဲဆိုတော့ အသိစိတ်မှာ အဆင့် ၃ဆင့်ရှိနေလို့ပါ။

1. Conscious mind (သိစိတ်)
2. Preconscious or subconscious mind (တိမ်မြုပ်နေသော စိတ်)
3. Unconscious mind (မသိစိတ်) ဆိုပြီး ၃ဆင့်ရှိနေပါတယ်။

ကျနော်တို့ တကယ်သိရတာက Conscious mind ဆိုတဲ့ အပေါ်ယံ အပိုင်းလေးပါပဲ။

Subconscious နဲ့ Unconscious mind တွေက ရေခဲကျောက်ဆောင်ရဲ့ အောက်ခြေမှာ နစ်မြုပ်နေပါသတဲ့။

ဒါကို ice-berg metaphor လို့ခေါ်ပြီး psychologist ဆရာကြီး Sigmund Freud ကပဲစတင် တင်စားပြခဲ့တာပါ။

• 

ပုံမှာပြထားတဲ့အတိုင်း ကျနော်တို့အားလုံးရဲ့ နေ့စဥ်လှုပ်ရှားသွားလာပြောဆို သိမြင်နေတာတွေက ရေခဲကျောက်ဆောင်ရဲ့ ထိပ်ကလေးလောက်ပဲရှိပါတယ်။

ကိုယ့်ကိုယ်ကို မသိလောက်တဲ့ Dark side တွေ၊ hidden personality တွေက ဟိုးရေခဲအောက်ခြေမှာ နစ်မြုပ်နေတာပါ။

Preconscious or Subconscious mind ကတော့ ရေအောက်အရမ်းမရောက်သေးဘဲ ခပ်တိမ်တိမ်မှာ ရှိနေတဲ့ အပိုင်းပါ။

Preconscious mind ထဲမှာဘာတွေရှိနေလဲဆိုတော့ ခပ်ငယ်ငယ် ကလေးဘဝက အကြောင်းအရာလေးတွေ ၊ ငယ်သူငယ်ချင်းအကြောင်းတွေ ၊ ငယ်ငယ်က ကျောင်းတက်ရတဲ့ကိစ္စတွေ ၊ ဖုန်းနံပါတ်အဟောင်းတွေ စတာတွေ သိမ်းထားပါတယ်တဲ့။

အတိတ်ကဖြစ်ရပ်တွေကို Preconscious mind ထဲမှာ သိမ်းထားတတ်တာမို့ အိပ်မွေ့ချကုထုံး (Hypnosis) နဲ့ အဲ့ဒီအရာတွေကို ပြန်ဖော်ထုတ်လို့ရပါတယ်။

ဒါပေမယ့် သိပ်ကိုအောက်နက်နက်မှာရောက်နေတဲ့ မသိစိတ် (unconscious mind)ကိုတော့ ရောက်ဖို့ခက်ခဲလှပါတယ်။

မသိစိတ်ပါ ဆိုကထဲက မိမိကိုယ်တိုင်တောင် သတိမထားမိ မသိနိုင်တဲ့နေရာတခုပါ။

မသိစိတ်ထဲမှာ ဘာတွေရှိနေနိုင်သလဲဆိုတော့

ကျနော်တို့ရဲ့ ကြောက်စိတ်တွေ (Fear)

ပြင်းပြတဲ့ ဆန္ဒအာသီသတွေ (immoral urges)

ရှက်စရာကောင်းတဲ့ အတွေ့အကြုံ ခံစားချက်တွေ (shamful experience)

လိုချင်တပ်မက်လောဘစိတ်တွေ (irrational wishes)

တကိုယ်ကောင်းဆန်တဲ့ အတွေးတွေ လိုအင်တွေ (selfish needs)

ညစ်ပတ်ရိုင်းစိုင်းတဲ့ လိင်စိတ်ဆန္ဒတွေ (unacceptable sexual desires) တွေကို မြှုပ်နှံ သိမ်းဆည်းထားပါသတဲ့။

• 

ခပ်ရှင်းရှင်းပြောရရင် လူတွေရဲ့ Dark side ဆိုတာမျိုးကို unconscious mind ထဲမှာတွေ့ရမှာပါ။

ဒီ အဆင့် ၃ဆင့်ကို ကျနော်အရင်ကပြောခဲ့တဲ့ Id, Ego, Superego တို့နဲ့ ပြန်ချိတ်ကြည့်ရအောင်။

Id ကတော့ စိတ်ဆန္ဒလောဘတွေကို ကိုယ်စားပြုလို့ Unconscious mind ထဲမှာ Id ကိုတွေ့ရမှာပါ။

Ego ကတော့ ကျနော်တို့ ကိုယ်တိုင်ပဲဖြစ်ပြီး အများအားဖြင့် Conscious mind နဲ့ Preconscious mind ထဲမှာ တွေ့ရတတ်ပါတယ်။

Superego ကိုတော့ Preconscious mind ထဲမှာ အဓိကတွေ့ရနိုင်ပြီး တခါတခါ unconscious ထဲရောက်လိုက် conscious ထဲရောက်လိုက်ဖြစ်နေတတ်ပါတယ်။

• 

• 

ဒါဆို ကျနော်တို့စိတ်တွေကို ကျနော်တို့တောင် သေချာ ပြည့်ပြည့်ဝဝ မသိနိုင်သေးတာ သတိထားမိလောက်ပါပြီ။

သူတပါးနဲ့ ပေါင်းသင်းဆက်ဆံတဲ့အခါ တခါတခါ “မင်းငါ့အကြောင်းမသိပါဘူးကွာ…” ဆိုပြီး ပြောရင်း စကားနိုင်လု ရန်ဖြစ်မိတဲ့အခါ…

သူများတွေ ငါ့စိတ်ကိုလဲ ကိုယ်ချင်းမစာကြဘူး… နားမလည်ပေးကြဘူး လျစ်လျူရှုခံရတယ်လို့ တွေးမိတဲ့အခါ….

ကိုယ်တောင် ကိုယ့်စိတ်အကြောင်း သိဖို့မလွယ်တာမို့ သူများတွေ ကိုယ့်အကြောင်းကိုမသိလို့ နားမလည်လို့ ဆိုပြီး သူများကိုချည်း အပြစ်တင်မစောဘဲ
ခွင့်လွှတ်ပေးတတ်ဖို့ အရေးကြီးပါတယ်။

ပေါင်းသင်းဆက်ဆံရေး ပိုမိုတိုးတက်ပြီး စိတ်ရဲ့ဆန်းကြယ်ပုံကို ပိုမိုသဘောပေါက်လာကြပါစေဗျာ။

Thanks for your time!

လင်းမူ

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။