ညီကိုတို့ နှမတို့…
လူငယ်သဘာဝ ချစ်ကြိုက်ကြပြီဆိုရင် ချစ်ခြင်းမေတ္တာတွေယိုဖိတ်ပြီး စည်းကျော်ဘောင်ကျော်အဆင့်ကို ရောက်လာတတ်ကြပါတယ်။
ချစ်သူရည်းစားဘဝကို သန့်သန့်ရှင်းရှင်း စောင့်ထိန်းသွားကြတဲ့ ညီကိုတွေ နှမတွေရှိသလို “သဒ္ဒါလွန်တော့ တဏာကျွန်” ဆိုပြီး ထိတွေ့သာယာမှုနောက် လိုက်မိကြသူတွေ၊ နယ်ကျွံမိသူတွေလဲ ရှိကြမှာ ကိုကြီးနားလည်ပါတယ်။
ချစ်လို့ဖြစ်ကြတဲ့ သာယာမိလို့ဖြစ်ကြတဲ့ ဒီကိစ္စတွေကို မှန်တယ် မှားတယ် မဆိုချင်ပါဘူး။
ချစ်မိကြတာလဲ ရှက်စရာမဟုတ်သလို
အတူနေမိသွားတာကလဲ (ဒီခေတ်ကြီးထဲမှာ) ရှက်စရာမဟုတ်တော့ပါ။
မိမိဆန္ဒ ပဓာနပဲမို့ မိမိချစ်သူနဲ့ မိမိကြည်ဖြူရင် အသက်လဲပြည့်ရင် ဒါဟာ ဓမ္မတာပါပဲ။
အသက်မပြည့်သေးဘဲနဲ့တော့ (၁၈နှစ်ကိုဆိုလိုသည်) ဒီလိုကိစ္စတွေတော့ မဖြစ်သင့်ဘူးလို့ ဆိုပါရစေ။
ဒါက ယောကျာ်းမှန်ရင် သတိထားသင့်တဲ့ ရှောင်သင့်တဲ့ကိစ္စပဲ။ ညီကိုတို့…။
အတူနေတဲ့အခါ စိတ်တူကိုယ်တူ ကြည်ဖြူဖို့လိုတယ်။
ရောဂါမရဖို့ နဲ့ ကိုယ်ဝန်မရဖို့လဲလိုတယ်။
တာဝန်မယူနိုင်သေးခင်မှာ တာဝန်တွေမပိဖို့တော့ လိုလိမ့်မယ် ညီကိုတို့ နှမတို့။
အတူနေတာကရှက်စရာမဟုတ်ပေမယ့် မလိုချင်ဘဲ ဗိုက်တလုံးရလာတာ ရောဂါကူးကုန်တာတွေကတော့ အတော် ဉာဏ်တိမ်တဲ့အဖြစ် ၊ ရှက်စရာကောင်းတဲ့အဖြစ်ပါပဲ။
ဒီလို ကိုယ်ဝန်မရဖို့နဲ့ ရောဂါမကူးဖို့ ကွိုင်ဆောင်ဖို့ (condom) သုံးဖို့ လိုကိုလိုပါတယ်။
ကွမ်းယာဆိုင်တို့၊ ABC ဆိုင်တို့မှာ Condom သွားဝယ်ဖို့ကို မရှက်စမ်းပါနဲ့။
တာဝန်သိလို့ သွားဝယ်ရဲတာ ၊ ကိုယ့်ချစ်သူကို ဂရုစိုက်လို့ သွားဝယ်ရဲတာဆိုတာကို သတိပြုမိပါစေ။
ကိုယ်ဝန်ရလာတော့မှ ဖျက်ချဖို့ အရပ်လက်သည်ဆီသွားတာကမှ ရှက်စရာပါ။
တော်တော်လဲ သောက်ဖြစ်မရှိတဲ့ အဆင့်နိမ့်တဲ့အလုပ်ပါ။
စားပြီးနားမလည်တဲ့ အလုပ်တွေ မလုပ်မိပါစေနဲ့ ညီကိုတို့။
မတော်တဆ condom မသုံးမိဘူး… သွားဝယ်လို့မရလိုက်ဘူး… ကွိုင်သုံးပေမယ့် သေချာမသုံးမိလို့ ပေါက်သွားတယ် … ပြဲသွားတယ်…
ဒီလိုဖြစ်လာရင်တော့ တိုင်စပြီးပတ်ပါပြီ။
အရေးပေါ်တားဆေးဆိုတာ သောက်ဖို့လိုလာပါပြီ။
မှတ်ထားဖို့က အရေးပေါ်တားဆေးဆိုတာ မဖြစ်မနေမှသောက်ရတာပါ။
ကိုယ်ဝန်ကိုပဲတားပေးတာပါ။
ရောဂါကိုမကာကွယ်ပါ။
“A” ကိုက်မှာကို လုံးဝ(လုံးဝ) မကာကွယ်ပါ။
အရေးပေါ်တားဆေးအကြောင်း သိထားရင် တခါမှားသွားတဲ့ အခါ ခြေချော်လက်ချော်ဖြစ်တဲ့အခါ ပြန်ပြင်လို့ရအောင် တိုက်ရတာပါ။
အတူနေပြီးတိုင်း ပဲကြီးလှော်ဝါးသလို အမြဲတိုက်နေရင်တော့ ညီကိုက တဖက်သားကို တန်ဖိုးမထားရကျလွန်းပါတယ်။
ငါ့နှမတွေကို စော်ကားရာကျပါတယ်။
ဒါဆို အရေးပေါ်တားဆေးအကြောင်း သိသင့်တာတွေ စပြောပြမယ်နော်။
၁။ အတူနေပြီးတာနဲ့ ချက်ချင်း စောနိုင်သမျှစောစောသောက်ပါ။
အရေးပေါ်တားဆေးကို Morning After Pill လို့လဲခေါ်တယ်။
နာမည်အတိုင်း နောက်တနေ့မနက်မှ အေးဆေးသောက်မယ် ဆိုပြီး အချိန်မဆွဲပါနဲ့။ လူဆိုတာမေ့တတ်တယ်။
ဒီဆေးက စောစောသောက်နိုင်မှ အစွမ်းရှိတယ်။
၂၄နာရီအတွင်း သောက်တာ အကောင်းဆုံးနဲ့ စိတ်အချရဆုံးပဲ။
အလွန်ဆုံး sex ဖြစ်ပြီး ၇၂ နာရီအတွင်း (၃ရက်အတွင်း) ဝင်အောင် သောက်ကိုသောက်ရမယ်။
ဆေးသောက်တာနောက်ကျလေလေ ကိုယ်ဝန်ရနိုင်ခြေများလေလေပဲ။
ဆေးကို ဆိုင်မှာ
Ecee 2 တို့
Postinor တို့
Pill 72 တို့
Lydia (လေဒီယာ) တို့
Amor တို့
ဆိုပြီး အလွယ်မေးဝယ်လို့ရတယ်။
တချို့ဆေးတွေက တလုံးပဲပါလို့ တလုံးပဲသောက်ရတာ ကိစ္စမရှိဘူး။ ဥပမာ – လေဒီယာ ဆို တလုံးပဲသောက်စရာလိုတယ်။
Ecee 2 ဆိုရင် ၂ လုံးပါတယ်။
တလုံးကို ချက်ချင်းသောက်ပါ။
နောက်တလုံးကို ၁၂နာရီအကြာမှာ ထပ်သောက်ပါ။
၂လုံးလုံးသောက်မှ ကိုယ်ဝန်ကိုကာကွယ်တာပါ။
တလုံးပဲသောက်မိပြီး နောက်တလုံးကိုမေ့သွားလို့မရပါ။
သောက်ပြီးရင် တခါတခါ ပျို့တတ်တယ် အန်တတ်တယ် ငါ့နှမတို့။
အန်လိုက်ပြီဆို ဆေးက အန်တဲ့အထဲပါသွားမှာမို့လို့ အာနိသင်မရှိဖြစ်မယ်။
အဲ့တော့ ဆေးသောက်ပြီးလို့ ၂နာရီအတွင်း ပြန်အန်ရင် အသစ်တလုံးပြန်သောက်ရပါမယ်။
ဆေးသောက်ပြီး တော်တော်ကြာမှ အန်တာ (၂နာရီလဲကျော်သွားပြီဆို) ပြန်သောက်ဖို့မလိုဘူး။
ကိုယ်က နဂိုထဲက တခုခုဆို ပျို့တတ်အန်တတ်ရင် အအန်ပျောက်ဆေးကို နာရီဝက်ကြိုသောက်
ပြီးမှ တားဆေးသောက်လဲရတယ်။
ကဲ ကျန်တာတွေကို နောက်တပိုင်းမှာ ဆက်ပြောပြသွားမယ်နော်… အားလုံးပဲ ဆက်စောင့်ဖတ်ပေးကြပါဦး။
Min Ko Gyi
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။
Science Nuts 