Drone အကြောင်း သိသမျှ (Part 2)

ဒီတစ်ခေါက်မှာတော့ drone အခြေခံ သဘောတရား၊ drone တစ်ခုမှာ ပါဝင်တဲ့ အစိတ်အပိုင်းတွေနဲ့ သူတို့ရဲ့ လုပ်ဆောင်ချက်တွေအကြောင်းကို ပြောပြသွားမှာဖြစ်ပါတယ်။

Drone တစ်ခုဟာ သဘောတရား ၃ မျိုးနဲ့ အလုပ်တွေကိုလုပ်ဆောင်ပါတယ်။

(၁) Fixed wing အမျိုးအစားတွေမှာ Bernoulli’s principle ကို အသုံးချပြီး တည်ဆောက်ထားတဲ့ တောင်ပံတွေနဲ့ လေထဲမှာ ပျံဝဲနိုင်အောင် လုပ်ဆောင်ပါတယ်။

Bernoulli’s principle အရ လေထုကို pressure နည်းအောင်လုပ်ခြင်းအားဖြင့် speed များအောင် စွမ်းဆောင်နိုင်ပါတယ်။ လေယာဥ် တောင်ပံတွေရဲ့ တည်ဆောက်ပုံမှာ တောင်ပံရှေ့ပိုင်း (leading edge) နဲ့ အနောက်ပိုင်း (trailing edge) ဆိုပြီးရှိပါတယ်။

• 

တောင်ပံတွေရဲ့ အပေါ်ပိုင်းကို ခုံးထားခြင်းဖြင့် လေဟာ leading edge ကို တိုးဝင် တောင်ပံအပေါ်ပိုင်းမှာ မြန်မြန်ဆန်ဆန်နဲ့ ဖြတ်သွားမှာ ဖြစ်ပြီး trailing edge မှာ တောင်ပံအပေါ်ပိုင်းနဲ့ တောင်ပံအောက်ပိုင်းက လာတဲ့ လေကို ပြန်ပေါင်းဆုံစေပါတယ်။

တောင်ပံအပေါ်ပိုင်းမှာ လေရဲ့ speed က များတာကြောင့် စောနက principle အရ pressure နိမ့်သွားပါတယ်။ Pressure များရာက pressure နည်းရာကို ရွေ့လျားလေ့ရှိတဲ့ သဘောအရ လေထုက တောင်ပံကို ပင့်တင်ထားသလို ဖြစ်လာပါတယ်။ ဒီလိုနည်းအားဖြင့် လေယာဥ်တွေနဲ့ drone တွေကို လေထဲမှာ ရှိနေအောင် ပျံသန်းနိုင်အောင်လုပ်ကြပါတယ်။

(၂) Multi-rotor လို့ခေါ်တဲ့ drone တွေမှာမြင်ရလေ့ရှိတဲ့ ဒလက်မော်တာတွေကို အသုံးပြုပြီး အထက်အောက် အတက်အဆင်းလုပ်နိုင်အောင် ပြင်ဆင်ထားပါတယ်။ ဒလက်မော်တာတွေက လေကိုတွန်းကန်လေလေ လေထုက ဒလက်မော်တာတွေကို ပြန်တွန်းကန်လေလေ ဖြစ်ပါတယ်။

အဲ့တာကြောင့် ဒလက်မော်တာတွေ လည်အားများလေလေ ပိုမြင့်မြင့် တက်နိုင်လေ ဖြစ်ပါတယ်။ ဒလက်မော်တာတွေဟာ drone ရဲ့ balance ကိုလည်း တူညီတဲ့ speed နဲ့လည်ပြီး ထိန်းညှိပေးရပါတယ်။

• 

ပုံမှာပြထားတဲ့အတိုင်း M1 နဲ့ M4 နဲ့က နာရီလက်တံအတိုင်း လည်ပြီး M2 နဲ့ M3 နဲ့ နာရီလက်တံပြောင်းပြန်လည်ပါတယ်။ ဒီလိုနည်းနဲ့ အထက်အောက် ဘယ်ညာကို ရွေ့လျားပါတယ်။

(၃) VTOL (vertical takeoff and landing) ကတော့ အပေါ်က သဘောတရား ၁နဲ့၂ ကို ပေါင်းစပ်ပြီး အလုပ်လုပ်ပါတယ်။ သဘောတရား ၂ အတိုင်း အတက်အဆင်းလုပ်ပြီး သဘောတရား ၁ အတိုင်း လေထုထဲမှာ ရွေ့လျားပါတယ်။

• 

အခြေခံ Drone တစ်ခုမှာ ပါဝင်လေ့ရှိတဲ့အစိတ်အပိုင်းတွေကတော့
(၁) Propeller လို့ခေါ်တဲ့ ဒလက် နဲ့ ဒလက်ကိုလည်စေတဲ့ motor (အရေအတွက်ကတော့ အမျိုးအစားအလိုက် ကွာပါတယ်)
(၂) Power Supply အတွက် Battery
(၃) Radio transmission အတွက် အဝေးထိန်းခလုပ်
(၄) Radio wave ကို လက်ခံမယ့် Recevier Antenna
(၅) Camera ကလာတဲ့ ရုပ်သံမှတ်တမ်းတွေကို wifi, 4G စတာတွေနဲ့ ထိန်းချုပ်သူရဲ့ ဖုန်းနဲ့ ကွန်ပြူတာထဲကို record လုပ်ပါတယ်
(၆) GPS နဲ့ တခြား sensor တွေ LED မီးတွေလည်း ပါပါတယ်။

အမျိုးအစားအပေါ်လိုက်ပြီးတော့ ထပ်တိုးတဲ့ ပစ္စည်းနဲ့ အရေအတွက်တွေကတော့ ကွာခြားကြမှာဖြစ်ပါတယ်။

Drone တွေကို ပေါ့ပါးနေအောင် light weight material တွေအသုံးပြုတည်ဆောက်ရပြီးတော့ ဆင်းသက်ရလွယ်ကူစေဖို့ ထောက်တိုင်တွေလည်း တပ်ဆင်ပေးထားပါတယ်။

Drone တွေရဲ့အားနည်းချက်ကတော့ power supply နဲ့ သွားနိုင်တဲ့ range အကန့်အသတ်ရှိတာပဲဖြစ်ပါတယ်။ အမျိုးအစားအပေါ်မူတည်ပြီး ပျံသန်းချိန်နဲ့ သွားနိုင်တဲ့အကွာအဝေး နဲ့ကတော့ ကွာခြားမှာပဲဖြစ်ပါတယ်။

ဒါပေမယ့် ကောင်းတာတစ်ခုကတော့ battery က ကုန်တော့မယ်လို့ အချက်ပြရင်ဖြစ်ဖြစ် သွားနိုင်တဲ့အကွာအဝေးထက် ပိုသွားမိရင်ပဲဖြစ်ဖြစ် ထိန်းချုပ်တဲ့သူဆီကို သူ့အလိုလို ပြန်လာနိုင်အောင် လုပ်ထားတဲ့ system ရှိပါတယ်။

ဆိုတော့ကာ သင့်ပတ်ဝန်းကျင်မှာ သင့်ကို ဒုက္ခပေးမယ့် Drone တွေရှိရင် သင်ဘာလုပ်မလဲ။ ဘာတွေလုပ်လို့ရမလဲ။ အဲ့တာတွေကို သိချင်ရင်တော့ ကျွန်တော် part 3 မှာ ဆက်လက်ပြောပြပေးသွားမှာဖြစ်ပါတယ်။

Dr. Jason

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။