လက်တွေ့ဘဝထဲက ဂါလီဗာရဲ့ ခရီးစဥ်နဲ့ လီလီပုတို့တိုင်းပြည်

ကျနော် ကလေးဘဝတုန်းက ဂါလီဗာရဲ့စွန့်စားခန်းများပုံပြင်က အိပ်ရာဝင်ပုံပြင်ကောင်းတပုဒ်ဖြစ်ခဲ့ပါတယ်။

Gulliver’s Travels ဆိုတဲ့ လူတိုင်းကြားဖူးတဲ့ ပုံပြင်လေးက လက်တွေ့မှာရောတကယ်ဖြစ်နိုင်လောက်သလား။
စိတ်ကူးယဥ်သက်သက်ပဲလားဆိုတာ ဆက်ဖတ်ကြည့်ရအောင်။

ပုံပြင်လေးအကျဥ်းလေးကတော့ ဂါလီဗာဆိုတဲ့ သင်္ဘောသားက သင်္ဘောပျက်ပြီး ထူးဆန်းတဲ့ကျွန်းကိုရောက်သွားပါတယ်။

အဲ့ကျွန်းကလူတွေကို လီလီပု (Lilliput) လို့ခေါ်ပြီး ဂါလီဗာနဲ့ ယှဥ်ရင်အလွန်သေးငယ်တဲ့လူလေးတွေဖြစ်နေပါတယ်။ ဂါလီဗာက လူကောင်အဆမတန်ကြီးနေတာမဟုတ်ဘဲ လီလီပုတွေကိုက အရမ်းသေးနေတာပါ။

ဂါလီဗာက လီလီပုတို့တိုင်းပြည်မှာနေရင်း အကူအညီတွေပေးခဲ့သလို လီလီပုတို့ကလဲ ဂါလီဗာ အိမ်ပြန်ဖို့ကူညီပေးခဲ့ပါတယ်။

ဂါလီဗာအိမ်ပြန်ရောက်တော့ လီလီပုတို့တိုင်းပြည်အကြောင်းပြောပြတော့ ဘယ်သူမှသူ့ကိုမယုံကြပါဘူးတဲ့။

စာဖတ်သူတို့ရော ဂါလီဗာပုံပြင်လေးက တကယ်ဖြစ်နိုင်တယ်လို့ထင်ပါသလား?

ဆေးပညာအရ ဂါလီဗာပုံပြင်ထဲက ရောဂါက Alice in the Wonderland syndrome နဲ့ဆင်တူနေပါတယ်။

AWS လို့အတိုခေါ်တဲ့ Alice in the Wonderland syndrome ဆိုတာ
ကိုယ့်အနားကလူတွေက သေးသေးလေးလို့ မြင်တာ (သို့) အကြီးကြီးဖြစ်လာတယ်လို့ မြင်ရ ခံစားရတဲ့ ရောဂါတမျိုးပါ။

Alice’s adventures in Wonderland ဆိုတဲ့ ဇာတ်လမ်းထဲက ဇာတ်ကောင်ကိုအစွဲပြုပြီး နာမည်ပေးထားတာဖြစ်ပါတယ်။

AWS ဆိုတဲ့ ဒီရောဂါကို Todd’s syndrome လို့လဲခေါ်ပါတယ်။

ကိုယ့်ဘေးကလူတွေက ရုတ်တရက် ပုစိညောင့်တောင့်လေးဖြစ်သွားတယ်လို့ မြင်ရတာ (micropsia)

ဘေးလူတွေ အကြီးကြီးဖြစ်လာတယ်လို့ ခံစားရတာ (macropsia) စတာတွေ အပြင်

အနီးကလူတွေက အဝေးကြီးကိုရောက်သွားတယ်တို့… အဝေးကလူတွေက အနီးကပ်ရှိနေသလိုခံစားရတယ်တို့ ပြောလေ့ရှိပါတယ်။

အချိန်တွေနှေးကုန်တာ အရမ်းမြန်တယ်လို့ခံစားရတာ စတာတွေလဲ AWS လူနာတွေမှာတွေ့ရတတ်ပါတယ်။

ကိုယ်တွေ့မြင်ခံစားနေရတာတွေ အကုန်လုံးက ကမောက်ကမတွေဖြစ်ပြီး သေးလာလိုက် ကြီးသွားလိုက် နီးလာလိုက် ဝေးသွားလိုက်ဖြစ်ကုန်တာပါ။

ဥပမာပြောရရင် ဟိုးအရင်ခေတ်က တီဗီအစုတ်တွေကြည့်ရသလိုပါပဲ။ တီဗီအစုတ်နဲ့ မြန်မာ့အသံ ကြည့်ကြတဲ့အခါ လိုင်းတွေ အစင်းတွေထလာလိုက်…ရုပ်တွေကကြီးလာလိုက် ပြန်သေးသွားလိုက်…အသံတွေကတိုးလာလိုက် ကျယ်သွားလိုက်….မြင်ကွင်းတွေကနီးလိုက် ဝေးလိုက် အဲ့လိုဖြစ်ကုန်တာပါ။

ဘာကြောင့်ဘယ်လိုဖြစ်ရတယ်ဆိုတာ တိတိကျကျပြောရခက်ပါတယ်။

အတက်ရောဂါ (epilepsy), migraine (ခေါင်းတခြမ်းကိုက်ခြင်း), ဦးနှောက်အကျိတ် (brain tumor), ဦးနှောက်ထိခိုက်မိခြင်း (brain injury) စတာတွေနဲ့လဲ ပတ်သက်မှုရှိတာကိုတွေ့ရပါတယ်။

အထူးသဖြင့် လူငယ်တွေမှာဆို စိတ်ကြွဆေးအပြင်းစားတွေသုံးရင်း အာရုံတွေမှားယွင်းကုန်တာကြောင့်လဲ ဒီလိုလက္ခဏာတွေပေါ်လာတတ်ပါတယ်။

ရှားပါးရောဂါတခုဖြစ်ပြီး ဖြစ်တတ်တဲ့အကြောင်းရင်း အတိအကျကိုမသိသေးသလို ကုသဖို့နည်းလမ်းလဲ သေချာမတွေ့ရသေးပါ။

တချို့ပညာရှင်တွေက AWS ကို ဦးနှောက်ရောဂါလို့ မသတ်မှတ်ကြဘဲ အာရုံခံစားမှုကို တနည်းနည်းနဲ့ အနှောင့်ယှက်ခံရလို့ဖြစ်တဲ့ distortion of perception လို့ယူဆကြပါတယ်။

AWS သမားတွေက အမြဲတမ်းခံစားနေရတာမဟုတ်ဘဲ တချီတချီ episode အလိုက် ထ ထဖြစ်ပြီး တခါဖြစ်ရင် မိနစ်အနည်းငယ်ကနေ နာရီပိုင်းအထိကြာတတ်ပါတယ်။

ဂါလီဗာပုံပြင်ကိုပြန်စဥ်းစားကြည့်ရင် ဂါလီဗာက သင်္ဘောပျက်ပြီး brain ကိုတနည်းနည်းနဲ့ထိခိုက်သွားလို့များ လီလီပုတွေကို အရမ်းသေးတယ်လို့မြင်နေတာဖြစ်ကောင်းဖြစ်နိုင်ပါတယ်။

ဒါကတော့ ယူဆချက်မျှသာဖြစ်ပြီး ပုံပြင်နဲ့ လက်တွေ့ဘဝထဲကရောဂါကို ချိတ်ဆက်ပြတာဖြစ်ပါတယ်။

စိတ်နဲ့ဆိုင်တဲ့ ဝေဒနာတွေ၊ ဦးနှောက်နဲ့ဆိုင်တဲ့ရောဂါတွေက အလွန်ဆန်းကြယ်တာမို့ စိတ်ဝင်စားရင် ဆက်လေ့လာကြည့်ကြပါလို့ တိုက်တွန်းပါရစေ။

Thanks for your time!

လင်းမူ

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။