ဒီခေါင်းစဥ်ကိုပြောပြဖို့အတွက် အရင်ဆုံး Touch screen တွေဘယ်လို အလုပ်လုပ်သလဲသိဖို့လိုလာပါပြီ။
Touch screen တွေအလုပ်လုပ်ပုံက အဓိက ၂ မျိုး၂စားရှိပါတယ်။ ပထမတမျိုးက Resistive touchscreen ပါ။
သူက ထိတွေ့မှုရဲ့ pressure ကိုသိပြီးအလုပ်လုပ်တာပါ။ ဒီစနစ်မှာ ကြည်လင်တဲ့အလွှားပါး၂ချပ်ရှိပြီး သူတို့ကြားမှာ နေရာသေးသေးလေး ဟထားပါတယ်။ လူကထိတွေ့လိုက်တဲ့အခါမှ အလွှာ၂ချပ်ကပူးကပ်သွားပြီး လျှပ်စစ်စီးသွားပါတယ်။ အဲ့လိုနည်းနဲ့ ထိတွေ့တဲ့နေရာသိတာဖြစ်ပါတယ်။
Resistive touchscreen တွေက ဘာနဲ့ပဲထိထိ pressure ရရင်ကိုအလုပ်လုပ်ပါတယ်။ လက်ချောင်းပဲဖြစ်ဖြစ်၊ လက်အိတ်ပဲဝတ်ထားထား၊ တုတ်ချောင်းနဲ့ပဲထိထိ ဘာနဲ့ထိထိ အလုပ်လုပ်ပါတယ်။
ဒီဟာက ဘယ်နေရာတွေမှာသုံးလဲဆိုတော့ စက်ရုံအလုပ်ရုံတွေမှာဖြစ်ဖြစ်၊ လူအများသုံးတဲ့ Atm စက်လိုမျိုးနေရာဖြစ်ဖြစ် စတဲ့စက်ပစ္စည်းတွေမှာ အသုံးများပါတယ်။ အားသာချက်က ဘာနဲ့ထိထိ ထိမှန်းသိလို့ လက်အိတ်စွပ်ထားလဲ ATM စက်တွေကိုသုံးလို့ရပါတယ်။
အားနည်းချက်ကတော့ Multi-touch မရတာပါ။ တနေရာထိရင် တနေရာပဲသိတာပါ။ လက်ချောင်း၃ ၄ချောင်းပြိုင်ထိလို့ မသိတော့ပါဘူး။ အရင်ဖုန်းအဟောင်းတွေမှာတော့ Resistive နည်းပညာသုံးခဲ့ပေမယ့် multi-touch မရတော့ အဆင်မပြေပါဘူး။
နောက်ပိုင်းသုံးလာတဲ့နည်းကတော့ Capacitive touchscreen နည်းပညာဖြစ်ပါတယ်။ သူ့ရဲ့သဘောတရားကတော့ screen ပေါ်ကို လျှပ်စစ်ဓာတ်လွှတ်ထားပြီး လူကထိလိုက်တဲ့အခါ လျှပ်စစ်ဓာတ်အနည်းငယ်က လက်ကိုစီးသွားပါတယ်။
အဲ့လို လျှပ်စစ်လမ်းကြောင်းပြောင်းသွားတာကိုအာရုံခံပြီး ထိမှန်းသိတာပါ။ ဒီနည်းက muti-touch လဲရလို နောက်ပိုင်းဖုန်းတွေ tablet တွေမှာ ဒီနည်းပညာကိုပဲသုံးလာပါတယ်။
မကောင်းတဲ့အချက်က လျှပ်စစ်စီးလွယ်တဲ့ conductive ဖြစ်တဲ့အရာနဲ့ထိတွေ့မှပဲရတာပါ။ လူ့အရေပြားကတော့ ရေဓာတ်ရော electrolyte တွေရော ပါဝင်နေတာမို့ အလွယ်တကူ လျှပ်စစ်စီးပါတယ်။ တွေ့ကရာ တုတ်ချောင်းတို့ ၊ စက္ကူလိပ်တို့နဲ့ ထိရင်အလုပ်မလုပ်ပါ။
ဒါကြောင့် stylus တိုင်းကလဲ ဖုန်းတွေမှာအလုပ်မလုပ်တာကိုကြုံဖူးမှာပါ။ ပိုဆိုးတာက လက်အိတ်ထူထူဝတ်ထားရင်ဖြစ်ဖြစ်၊ လက်မှာဖုန်တွေကပ်နေတာဖြစ်ဖြစ် touchscreen က သိပ်အလုပ်မလုပ်တော့ပါဘူး။
ဒါပေမယ့် လက်အိတ်အထူအပါးနဲ့၊ လက်အိတ်ကိုလုပ်ထားတဲ့ပစ္စည်းပေါ်လဲမူတည်ပါသေးတယ်။ သိုးမွေးလက်အိတ်အထူဆိုရင် အလုပ်မလုပ်ပါ။ ပလတ်စတစ်လက်အိတ်တွေဆိုရင်လဲ touch လုပ်လို့မရပါ။
ထူးခြားတာက surgical gloves လို့ခေါ်တဲ့ ဆေးရုံသုံးရာဘာလက်အိတ် (latex gloves)တွေကတော့ အလုပ်လုပ်တာကိုတွေ့ရမှာပါ။ အကြောင်းကတော့ လက်အိတ်တွေပါးလို့ရယ်
နောက်ပြီး ရာဘာရဲ့ relative permittivity ကြောင့်လဲဆိုင်နိုင်ပါတယ်။ Relative permittivity တန်ဖိုးမြင့်လေလေ touch screen အလုပ်လုပ်နိုင်လေဖြစ်ပါတယ်။
Air ရဲ့ relative permittivity က 1 ပဲရှိပါတယ်။
Cotton (ချည်စ) ရဲ့ relative permittivity က 2 ပဲရှိပြီး ရာဘာ (latex) ကတော့ 24 အထိရှိပါတယ်။ လူ့အရေပြားကတော့ relative permittivity 70 အထိရှိပါတယ်။
လက်အိတ်အမျိုးအစားနဲ့ သင်ကိုင်တဲ့ဖုန်းအမျိုးအစားပေါ်မူတည်ပြီး လက်အိတ်နဲ့ သုံးလို့ရမရကွာခြားနိုင်လို့ ကိုယ်တိုင်လက်တွေ့စမ်းကြည့်မှပဲ သေချာသိရမှာပါ။ ကိုဗစ်ကာလမှာ လက်အိတ်ဝတ်ပြီးအလုပ်လုပ်တဲ့သူများလာတာမို့ လက်အိတ်ဝတ်ရင်း ဖုန်းသုံးရတာ အခက်ကြုံနေကြတတ်ပါတယ်။
ဒီစာလေးကိုဖတ်ကြည့်ပြီးရင် touchscreen အကြောင်း အနည်းနဲ့အများ ဗဟုသုတရသွားစေမယ်လို့ ယုံကြည်ပါတယ်။
Vector
Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။
