ဒီစာကိုဖတ်နေတဲ့သင်ဟာ တကယ်ပဲသင်လို့သေချာရဲ့လား?

ပုံပြင်လေးတပုဒ်နဲ့ အစပြုချင်ပါတယ်။

တခါတုန်းက တိုင်းပြည်တပြည်မှာ Theseus လို့နာမည်ရတဲ့ ဘုရင်တပါးရှိပါတယ်။ ဘုရင်ကြီးဆီမှာ တိုက်သင်္ဘောကြီးတစင်းရှိပြီး အဲ့သင်္ဘောကြီးနဲ့ တိုက်ပွဲအလီလီဝင်ခဲ့ဖူးပါတယ်။ တိုက်သင်္ဘောကြီးမှာ လှော်တက်အချောင်း ၃၀ရှိပြီး သင်္ဘောကိုယ်ထည်ကြီးကို သစ်သားပျဥ်ပြားတွေနဲ့ အဓိကဆောက်လုပ်ထားပါတယ်။ Thesus ဘုရင်ပိုင်ဆိုင်တဲ့ သင်္ဘောကြီးမို့ The ship of Theseus လို့အစွဲပြုခေါ်ပါတယ်။

တိုက်ပွဲမဝင်ခင်ဆိုရင် သင်္ဘောကြီးကို လိုအပ်တာတွေပြုပြင်ရပါတယ်။
ကြမ်းပြင်ကသစ်သားတွေဆွေးနေရင် ပျဥ်ပြားတွေအသစ်လဲရတယ်။ ရွက်တိုင်တွေကျိုးနေရင် ရွက်တိုင်အသစ်လဲရတယ်။
အကုန်ပြင်ဆင်ပြီးမှ တိုက်ပွဲဝင်ပါတယ်။

ဒီလိုပဲတိုက်ပွဲကပြန်လာရင်လဲ အပျက်အစီးတွေကို ပြုပြင်မွမ်းမံရတယ်။ လှော်တက်တွေကျိုးကုန်လို့ အသစ်လဲတပ်ရတယ်။ သံဆူးကြိုးတွေအသစ်တပ်ရတယ်။ ပိုခိုင်ခံ့အောင် ရေနဲ့ထိတွေ့ရတဲ့နေရာက ပျဥ်ပြားတွေကို ထပ်ထပ်လဲရတယ်။

ဒီလိုနဲ့ တိုက်ပွဲဝင်လိုက် ပြုပြင်လိုက် တိုက်ပွဲဝင်လဲ ပြုပြင်လိုက်နဲ့ နှစ်တွေကြာလာရင် အခုမြင်နေရတဲ့သင်္ဘောကြီးက the ship of Theseus ရောဟုတ်သေးရဲ့လား။

ပျဥ်ပြားတွေရော ရွက်တိုင်တွေရော တဖြည်းဖြည်းအသစ်လဲလာလိုက်တာ နဂိုမူလအစက သင်္ဘောမှာပါခဲ့တဲ့ အစိတ်အပိုင်းတွေအကုန် အသစ်လဲလိုက်ရတော့ ဒီသင်္ဘောဟာ သင်္ဘောအသစ်ဖြစ်မသွားဘူးလား။

ဘုရင် Theseus ပိုင်တဲ့သင်္ဘောလို့ရော ခေါ်လို့ရသေးရဲ့လား။ သူပိုင်တဲ့သင်္ဘောဆိုတာ ပျဥ်ပြားအဟောင်းတွေထဲ တဖြေးဖြေးပါသွားပြီမဟုတ်ဘူးလား။

ဒီလို စဥ်းစားစရာဖြစ်လာတာကို Identity crisis လို့ခေါ်ပါတယ်။

သင်္ဘောကြီးက အခုအချိန်မှာ အရင်သင်္ဘောက အရာတွေမရှိတော့ဘူးဆိုရင် သင်္ဘောအသစ်ဖြစ်သွားမလား။ သင်္ဘောအဟောင်း နာမည်အဟောင်းပဲဆက်ရှိနေတာလားဆိုတာ တွေးစရာဖြစ်လာပါတယ်။

ဒီ The ship of Theseus အကြောင်းကို စပြီးမေးခွန်းထုတ်ခဲ့တာကတော့ လွန်ခဲ့တဲ့ နှစ်ပေါင်း ၂၀၀၀ခန့်က ဂရိသမိုင်းပညာရှင် Plutarch ဆိုသူဖြစ်ပါတယ်။

အလားတူပုံစံမျိုး identity crisis တွေအများကြီးရှိပါသေးတယ်။
ဥပမာ စမ်းချောင်းလေးတခုကိုအခုမြင်ယောင်ကြည့်ပါ။

သင်ကြည့်နေတုန်းမှာပဲ ရေတွေကတသွင်သွင်စီးဆင်းသွားလို့ သင်စောနကကြည့်နေတဲ့စမ်းချောင်းက အခုကြည့်နေတဲ့စမ်းချောင်းနဲ့မတူတော့ပါဘူး။ အရာရာဟာ ပြောင်းလဲနေ ပြောင်းလဲလတ္တံ့ပါပဲ။

သင်ကိုယ်တိုင်လဲ သင့်အမေမွေးလိုက်တုန်းက သင်နဲ့ ယခုသင်ဟာ လုံးဝမတူနိုင်တော့ပါဘူး။ လူသားတွေရဲ့ ဆဲလ်တွေက အသစ်မွေးလာလိုက် ပြန်သေသွားကြလိုက်နဲ့ ဖြစ်နေပါတယ်။ မျက်စိတမှိတ်အတွင်းမှာပဲ ဆဲလ်တွေသေလိုက် ရှင်လိုက် အသစ်အစားထိုးလိုက်ဖြစ်နေတာပါ။

သိပ္ပံပညာရှင်တွေရဲ့အဆိုအရ အချိန် ၇နှစ်ကြာတိုင်း သင့်ကိုယ်ပေါ်က ဆဲလ်အဟောင်းတွေ အကုန်အသစ်လဲကုန်ပါတယ်တဲ့။ ဒါဆို ၇နှစ်တခါ သင်ဆိုတာ ပြောင်းလဲနေတာပေါ့။

တစ်နှစ်တခါ မွေးနေ့ကျင်းပမယ့်အစား ၇နှစ်တခါမှ ကျင်းပရင် တကယ့်လူသစ်စိတ်သစ်နဲ့ သင်ကိုတွေ့ရမှာလို့ ယူဆနိုင်ပါတယ်။ သင်အခုဒီစာကိုဖတ်နေတာ သင့်ဆိုတာရော သေချာရဲ့လားလို့ မေးခွန်းထုတ်စရာရှိလာပါတယ်။

Neuroscience အရတော့ သင်ကသင်ပဲလို့ယူဆနိုင်စရာရှိပါတယ်။ ဘာလို့လဲဆိုတော့ သင့်ခန္ဓာကိုယ်ထဲက ဆဲလ်တွေသေကြပေမယ့် မသေတဲ့ဆဲလ်ကတော့ သင့်ဦးနှောက်ဆဲလ်တွေပါပဲ။

မွေးကထဲကစပြီး တသက်လုံး သင့်ဦးနှောက်ဆဲလ်တွေက အသစ်အစားမထိုးတော့ပါဘူး။
ဆဲလ်အလုံး ၁သန်းရှိရင် အဲ့ ၁သန်းကဒီအတိုင်းပါပဲ။
အရေအတွက်ထပ်ပြီးမတိုးလာတော့ပါဘူး။

အသက်ကြီးလာရင်တော့ ဦးနှောက်ဆဲလ်တချို့သေကုန်တာဖြစ်တတ်ပေမယ့် မွေးကထဲက ရှိနေမယ့် ဦးနှောက်ဆဲလ်တွေက ဆက်ရှိနေဦးမှာပါ။ ဒါဆိုသင်က တကိုယ်လုံးပြောင်းလဲနေပေမယ့် ဦးနှောက်ကလိုက်မပြောင်းလို့ သင်ဟာသင်အဖြစ် ခံစားလို့ရနေဦးမှာပါ။

သင့်အရေပြား၊ သင့်ဆံပင်၊ သင့်အရိုးဆဲလ်တွေ ၊ သင့်သွေးဆဲလ်တွေကတော့ အချိန်ပြည့်ပြောင်းလဲနေမှာပါ။ ဒီအကြောင်းလေးကို သိလိုက်ရရင် သင့်ဘဝမှာ စိတ်ညစ်စရာတွေကြုံလာတဲ့အခါ အရာရာက ပြောင်းလဲနေတဲ့သဘောကို တွေးတောဆင်ခြင်မိမှာပါ။

အရာရာမမြဲတဲ့လောကကြီး… အရာခပ်သိမ်းပြောင်းလဲနေတဲ့လောကကြီးမှာ… ဒါဟာငါ့အပိုင်… ငါပိုင်တဲ့ဟာ… ငါပဲအတော်ဆုံး… ငါပဲယူမယ်… ငါချမ်းသာဖို့ပဲကြည့်မယ်… ငါကောင်းဖို့ပဲလုပ်မယ်… စတဲ့ ငါစွဲများကို ခဏမေ့ထားနိုင်စေဖို့ ရေးသားလိုက်ရပါတယ်။

ငါ ပိုင်တယ်ဆိုတာ တကယ်တော့ ဘာမှမရှိပါဘူး။ စမ်းချောင်းလေးလိုပဲ… Theseus သင်္ဘောလိုပါပဲ…။

Vector

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။