အမြင်အာရုံကိုလာလာရှုပ်နေတတ်တဲ့ တီကောင်လေးများ (သို့) floaters များအကြောင်း

တခါတခါ လင်းနေတဲ့မျက်နှာပြင် ကိုကြည့်မိရင် မြင်ကွင်းထဲမှာအောက်ကပုံထဲကလို တီကောင်လိုအကောင်လေးတွေရှိနေတာကို ခံစားဖူးပါသလား။

အဲ့အကောင်လေးတွေက မျက်စိကြည့်တဲ့အခါ လာလာရှုပ်နေတတ်ပြီး သူတို့ကိုမြင်အောင်လှမ်းကြည့်လိုက်ရင် ပျောက်သွားတတ်ပါတယ်။
တခြားနေရာကိုပြောင်းကြည့်လိုက်တော့မှ သူတို့တဖန်ပြန်ပေါ်လာပြန်ပါတယ်။

အများအားဖြင့် ရှည်မျောမျောပုံစံရှိပြီး အစက်အပြောက်ပုံစံ၊ အခက်အလက်ပုံစံ၊ ချည်လုံးပုံစံ စသဖြင့် ပုံစံအမျိုးမျိုးပြောင်းနေတတ်ပါတယ်။ ဒီလိုအကောင်လေးတွေကို Floaters လို့ခေါ်ပါတယ်။

ဒီ floaters လေးတွေက အပြင်လောကမှာရှိနေတာမဟုတ်ဘဲ သင့်မျက်လုံးထဲမှာရှိနေတာပါ။ ဒီလိုပြောလို့မလန့်သွားပါနဲ့ဦး။
ဒီလို floaters တွေက တကယ့်တီကောင်အစစ်တွေမဟုတ်ပါဘူး။ Floaters တွေကဘာတွေလဲဆိုတာ ရှင်းပြပါ့မယ်။

Floaters ရဲ့ သိပ္ပံနာမည်ကတော့ Muscae Volitantes ဖြစ်ပြီး Flying flies လို့အဓိပ္ပာယ်ရပါတယ်။

ကျနော်တို့မျက်လုံးထဲမှာ အခန်းငယ်လေးတွေရှိပြီး အရှေ့ခန်းထဲမှာ Aqueous humour လို့ခေါ်တဲ့အရည်တွေရှိပြီး အနောက်ခန်းထဲမှာတော့ vitreous humour လို့ခေါ်တဲ့ အရည်တွေပြည့်နေပါတယ်။ အဲ့ Vitreous humour လို့ခေါ်တဲ့အရည်တွေက ရေလိုကျဲကျဲကြီးမဟုတ်ဘဲ ကျောက်ကျောကျိုထားသလို ခပ်ပျစ်ပျစ်အနေအထားရှိပါတယ်။

ပုံမှန်ဆိုရင် အဲ့အရည်က ကြည်လင်ပြီး အမိုက်တစတောင်မှမရှိပါဘူး။ အသက်နည်းနည်းကြီးလာတဲ့အခါ အဲ့အရည်ထဲမှာ အနည်မှုန်လေးတွေဖြစ်လာပါတယ်။
အနည်လေးတွေက အများအားဖြင့် တစ်ရှူးအစအနလေးတွေ ၊ သွေးနီဥလေးတွေ ၊ ပရိုတိန်းအခဲလေး စတာတွေပဲဖြစ်ပါတယ်။

သူတို့တွေက အရည်ထဲမှာ ပေါလောမျောနေလို့ ပုံစံပြောင်းပြီး အသက်ရှိနေသလိုထင်ရတာပါ။ တကယ့်သက်ရှိအကောင်တွေရှိနေတာမဟုတ်ပါဘူး။

ဒီ floaters တွေက လူတိုင်းလိုလိုမြင်ဖူးတတ်ပြီး အလင်းများတဲ့နေရာတွေကို ကြည့်မိရင် ပိုသိသာပါတယ်။
ဥပမာ တိမ်တွေကင်းစင်ပြီး ပြာလဲ့နေတဲ့ မိုးကောင်းကင်ဟင်းလင်းပြင်ကို ကြည့်တဲ့အခါမျိုး၊ ဖုန်း screen လင်းလင်းကြီးကိုကြည့်တဲ့အခါမျိုး၊ ကွန်ပြုတာ home screen ဖြူဖြူကြီးကို စိုက်ကြည့်တဲ့အခါမျိုးမှာ ပိုပေါ်လာတတ်ပါတယ်။

အကြောင်းကတော့ အလင်းရောင်ပြင်းလေ သူငယ်အိမ်ကျဥ်းလေ ဖြစ်ပြီး အလင်းတန်းပိုစုဆုံကာ ပိုထင်ရှင်းလာတဲ့သဘောပါ။ အထူးသဖြင့် အသက်ကြီးလာတဲ့အခါ floaters တွေကိုပိုမြင်ရတတ်ပြီး အဝေးမှုန်သမားတွေ၊ မျက်မှန်သမားတွေမှာလဲ ဒါမျိုးခဏခဏကြုံရတတ်ပါတယ်။

ဒါ့အပြင် လှဲအိပ်နေတဲ့အခါ အနည်ဖတ်လေးတွေက မျက်စိအနောက်ကို အနည်ထိုင်လာပြီး မြင်လွှာ (retina) နဲ့ပိုနီးလာလို့ ဒီ floaters တွေပိုထင်ရှားလာတတ်ပါတယ်။

အများအားဖြင့်တော့ ဒီ floaters တွေမြင်ရတာက Normal ပါပဲ။ ဘာကျန်းမာရေးပြဿနာမှမရှိတတ်ပါဘူး။အဓိကက floaters တွေကိုမြင်မြင်နေရတာ မျက်စိဆံပင်မွေးစူးနေသလိုပါပဲ။ မြင်ရတာ အလွန်အာရုံနောက်ပါတယ်။

သူတို့ကိုအာရုံစိုက်ပြီးကြည့်လေ သူတို့ကတခြားနေရာကိုရောက်သွားလေ၊ မကြည့်ပြန်ရင်လဲ ပြန်ပေါ်လာလေ အဲ့လိုဖြစ်နေတာပါ။ စစမြင်ချင်းမှာတော့ နေရခက်ပေမယ့် တဖြေးဖြေး အသားကျလာတဲ့အခါ အဲ့ floaters တွေမရှိတော့သလိုဖြစ်လာပါလိမ့်မယ်။

အကောင်းဆုံးကုသနည်းကတော့ အလင်းများများကိုခဏခဏမကြည့်ဖို့ရယ် အဲ့ floaters တွေကိုတတ်နိုင်သမျှ လျစ်လျူရှုထားဖို့ရယ်ပါပဲ။ မြင်ကွင်းရှေ့ရောက်ရောက်လာရင်တော့လဲ မကြည့်မိအောင်နေရတာ အတော်လေးခက်ခဲပါတယ်။

အသက်ငယ်တဲ့သူတွေမှာ floaters တွေကဘာပြဿနာမှမရှိပေမယ့် အသက်ကြီးတဲ့သူတွေမှာတော့ floaters တွေအများကြီးမြင်နေရရင် မျက်စိရောဂါတခုခုရှိနေတတ်ပါတယ်။ မျက်လုံးကောင်းကောင်းမမြင်တော့တာ၊ ဝါးလာတာ၊ မျက်လုံးအောင့်တာ၊ ရုတ်တရက်လင်းရာကနေ မှောင်ကျသွားတာ၊ ခေါင်းခဏခဏကိုက်တာ စတဲ့လက္ခဏာတွေနဲ့တွဲနေရင်တော့ မျက်စိဆရာဝန်နဲ့ပြသင့်ပါတယ်။ ပုံမှန်လူတွေမှာတော့ Floaters တွေကဘာဒုက္ခမှမပေးတတ်ပါဘူး။

နောက်ပြီး floaters နဲ့ဆင်တူတဲ့ အလားတူပြဿနာတခုရှိပါသေးတယ်။ သူကကျ အပြာရောင်နောက်ခံကိုကြည့်မိရင်ဖြစ်လာတတ်ပြီး အဖြူရောင်အကောင်သေးသေးလေးတွေပြေးနေတဲ့ ခံစားချက်မျိုးပါ။ ဒါကို Blue field entoptic phenomenon လို့ခေါ်ပါတယ်။

ဒါကဘာလို့ဖြစ်တာလဲဆိုတော့ မျက်လုံးအိမ်ထဲက သွေးကြောမျှင်လေးတွေမှာ သွေးဖြူဥတွေဖြတ်စီးသွားလို့ပါ။ သွေးဖြူဥတွေကအရွယ်အစားကြီးတော့ သွေးကြောမျှင်ထဲမှာ လမ်းပိတ်ပြီးစီးနေသလိုဖြစ်ပါတယ်။ သူ့နောက်ကနေ သွေးနီဥတွေကဖြေးဖြေးချင်းလိုက်လာရပါတယ်။ ရထားတွဲလိုဖြစ်နေတာပါ။

သွေးဖြူဥက ရထားခေါင်းတွဲ ဖြစ်ပြီး သွေးနီဥတွေက ရထားနောက်တွဲလေးတွေသဘောပေါ့။ ပုံမှန်ဆိုရင် သွေးနီဥတွေကပဲ အပြာရောင်ကိုစုပ်ယူပြီး သွေးဖြူဥတွေကမစုပ်ယူပါဘူး။

ဒါကြောင့် အမြင်အာရုံထဲမှာ အရောင်ကွာဟမှု window လေးတွေဖြစ်ပြီး အကောင်လေးတွေပြေးနေသလိုခံစားရတာပါတဲ့။

ပိုပြီးမြင်အောင်ကြည့်ချင်ရင် အောက်က ၄မိနစ်စာ youtube link ထဲမှာ ဝင်ကြည့်ကြည့်ပါလို့ တိုက်တွန်းပါရစေ။

http://youtu.be/Y6e_m9iq-4Q

Thanks for your time!

လင်းမူ

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။