၂၀၂၁ ခုနှစ် ဇွန်လတုန်းက ပင်တဂွန်ဟာ UFO တွေအကြောင်းကို သတင်းစာရှင်းလင်းပွဲမှာ ချပြခဲ့ပါတယ်။ သူတို့ Navy Pilot တွေပျံသန်းနေတဲ့အချိန်မှာ တွေ့ခဲ့ရတဲ့ UFO တွေရဲ့ Video ၃ခုကို ထုတ်ပြန်လိုက်တာပါ။ UFO ဆိုတာ အမျိုးအမည်မသိတဲ့ ယာဉ်ပျံများ (Unidentified Flying Objects) လို့ ဘာသာပြန်ရမယ်ထင်ပါတယ်။
UFO တွေဟာ လူတွေကို ခေါင်းစားစေတာ နှစ်ပေါင်း ၈၀ လောက်ရှိနေပါပြီ။ သူတို့ကို မီပြီးတော့ Science Fiction မှာ ဂြိုလ်သားဇာတ်လမ်းတွေ ပေါ်လာတာပါ။
![](https://sciencenuts.science.blog/wp-content/uploads/2021/07/ufo.jpg?w=1024)
ဒါကြောင့် ပင်တဂွန်ကတော့ သတင်းစာရှင်းလင်းပွဲမှာ ဒီယာဉ်ပျံတွေကို UFO လို့မခေါ်ပါဘူး။ UAP လို့ခေါ်လိုက်ပါတယ်။ အရှည်က Unidentified Aerial Phenomena ပါ။ ဒီလိုထုတ်ပြန်လိုက်တော့ Aliens တွေ UFO တွေကိစ္စက ပိုရှင်းမသွားပါဘူး။ နည်းနည်းတောင် ပိုရှုပ်ထွေးသွားပါတယ်။ ဘာလို့လဲဆိုတော့ သူတို့ထုတ်ပြန်တဲ့ Video တွေ၊ Data တွေက လွယ်လွယ်နဲ့ အဖြူအမဲသဲကွဲအောင် ပြောမရလို့ပါ။
![](https://sciencenuts.science.blog/wp-content/uploads/2021/07/pentagon.jpg?w=1024)
ဒါကို ဆက်မပြောခင် UFO သမိုင်းကိုအရင်ပြောချင်ပါတယ်။ ၁၉၄၇ ခုနှစ်တုန်းက Kenneth Arnold ဆိုတဲ့ပုဂ္ဂိုလ်ဟာ ပျောက်ဆုံးနေတဲ့ လေယာဉ်ပျံတစ်စီးကို သူ့လေယာဉ်နဲ့ လိုက်ရှာခဲ့ပါတယ်။ အဲ့ဒီအချိန်မှာ သူ့အဆိုအရ ကောင်းကင်မှာ “V ပုံစံ” ပျံသန်းနေတဲ့ လေယာဉ်ပျံ ၉ စီးကိုမြင်လိုက်ပါတယ်။ ဒါပေမယ့် လေယာဉ်တွေက သူမြင်ဖူးတဲ့လေယာဉ်တွေနဲ့ လုံးဝမတူပါဘူး။ ဘယ်လောက်တောင်မှ မြန်လဲဆိုတော့ ၁နာရီကို ၂၇၀၀ ကီလိုမီတာ နှုန်းလောက်ရှိမယ်လို့ သူက ခန့်မှန်းပါတယ်။ အဲ့ဒီခေတ်ကာလမှာ ရှိတဲ့ လေယာဉ်ပျံတွေရဲ့ မြန်နှုန်းထက် ၃ဆလောက် ပိုမြန်ပါတယ်။
![](https://sciencenuts.science.blog/wp-content/uploads/2021/07/news-about-ufo-1947.jpg?w=1000)
ဒီယာဉ်တွေဟာ ဘာနဲ့တူသလဲဆိုတော့ ပန်းကန်ပြားတစ်ပြားကို ရေပေါ်မှာ ရှုပ်ပြေးအောင် လုပ်လိုက်သလိုပဲ (Saucer Skipping on Water) လို့ပြန်ပြောပြပါတယ်။
ဒီကိစ္စက သတင်းမီဒီယာတွေကြောင့် တော်တော်နာမည်ကြီးသွားပါတယ်။ ဒီလူဟာ Reliable Witness တစ်ယောက်ဖြစ်တယ်ဆိုတာကို တော်တော်များများက လက်ခံကြပါတယ်။ ဒါပေမယ့် Media တွေရဲ့ထုံးစံအတိုင်း Saucer Skipping on Water လို့ပြောတာကို Flying Saucer လို့သတင်းမှာ ရေးကြပါတယ်။ ဒါက ရှင်းရှင်းပြောရရင် သောက်တလွဲလုပ်တာပါ။
ဒါပေမယ့် အမေရိကမှာတော့ Flying Saucer ဆိုတာ ပန်းကန်ပြားပျံအဖြစ် နာမည်ကြီးသွားပါပြီ။
![](https://sciencenuts.science.blog/wp-content/uploads/2021/07/flying-saucer.jpg?w=624)
ဒါကိစ္စဖြစ်ပြီးနောက်ပိုင်းမှာ လူတွေက ကောင်းကင်ကို ကြည့်ပြီး ပန်းကန်ပြားပျံတွေ ရှာဖို့ကြိုးစားလာကြပါတယ်။ တိမ်တွေသူ့ဘာသာ ရွေ့နေတာတောင် တိရစ္ဆာန်ပုံ၊ ဘုရားပုံ မျိုးစုံမြင်တတ်တဲ့သူတွေဆိုတော့ သူတို့စိတ်ထဲက တွေ့ချင်တဲ့အရာကိုတွေ့တာ သိပ်တော့မဆန်းပါဘူး။ ဒါကြောင့် ၁၉၄၇ ခုနှစ် တစ်နှစ်တည်းမှာတင် UFO ကိုတွေ့တယ်ဆိုပြီး ပြောတာ ၈၅၃ ခုရှိပါတယ်။
![](https://sciencenuts.science.blog/wp-content/uploads/2021/07/report-ufo.jpg?w=640)
ဒီကနေမှ UFO တွေကို ဂြိုလ်သားတွေနဲ့ ချိတ်ဆက်လိုက်ပါတယ်။ အဲ့တော့ Aliens တွေအကြောင်း နာမည်ကြီးလာပြန်ပါတယ်။ အဓိကကတော့ Hollywood မှာပါ။ ဇာတ်လမ်းတွေ၊ ဝတ္ထုတွေရဲ့ချဲ့ကားမှုကြောင့် သာမန်လူတွေရဲ့ အတွေးထဲမှာ ဂြိုလ်သားတွေနဲ့ ပန်းကန်ပြားပျံတွေက နေရာယူလာပါတယ်။
![](https://sciencenuts.science.blog/wp-content/uploads/2021/07/slap-hollywood.jpg?w=500)
ဒါပေမယ့် ကောင်းကင်မှာ ယာဉ်ပျံတွေတွေ့တာ ၁၉၄၇ မှစတာတော့ မဟုတ်ပါဘူး။ ဘီစီ ၄၄၀ တုန်းက အီဂျစ်ပြည်မှာ မီးလောင်ပြီး လေပေါ်မှာပျံနေတဲ့ အရာတစ်ခု တွေ့ဖူးတယ်လို့ မှတ်မ်းတွေအရပြောကြပါတယ်။
ဒါ့အပြင် ၂၁၈ ဘီစီတုန်းကလည်း ရောမမှာ တွေ့ဖူးပါသေးတယ်။ ဒါကိုတော့ တစ္ဆေသင်္ဘောကြီးတွေ ကောင်းကင်မှာ အရောင်တောက်နေတယ် (Phantom Ships Gleaming in the Skies) လို့ပြောခဲ့ကြပါတယ်။ (အခြားအထောက်အထားတွေ အများကြီးရှိသေးပေမယ့် စာရှည်မှာကြောက်လို့ ဒီလောက်ပဲပြောပါတော့မယ်)
ဒီတော့ UFO တွေက အရင်ထဲက ရှိခဲ့သယောင်ယောင်ပါပဲ။ အမေရိက ကလူတွေတော်တော်များများကလည်း UFO တွေရှိတယ်ဆိုပြီး လက်ခံကြပါတယ်။ ၂၀၁၉ တုန်းက ကောက်ထားတဲ့စစ်တမ်းအရ အမေရိကန် ၃၃% ဟာ ဂြိုလ်သားတွေဟာ UFO တွေကိုစီးပြီး လူတွေဆီရောက်နေတယ်လို့ ယူဆထားကြပါတယ်။ နောက် Survey တစ်ခုအရ အမေရိကန်အစိုးရဟာ တစ်ခုခုကို ဖုံးကွယ်ထားတယ်လို့ အမေရိကန် ၅၀% ကယုံကြည်နေကြပါတယ်။
![](https://sciencenuts.science.blog/wp-content/uploads/2021/07/hiding-something.jpg?w=400)
၂၀၀၄ ခုနှစ်တုန်းက ချီကာဂိုမှာ လူပေါင်း ၇၇ ယောက်က ကောင်းကင်မှာ တစ်ခုခုကို တွေ့လိုက်တယ်ဆိုပြီး သတင်းပို့ပါတယ်။ ၂၀၀၉ ခုနှစ်တုန်းကလည်း နယူးဂျာဆီမှာ လူပေါင်း ၇၅ ယောက်က UFO ကိုတွေ့လိုက်တယ်လို့ ပြောပါတယ်။ ဒါတွေကို ဘယ်လိုသိလဲဆိုတော့ National UFO Reporting Center တစ်ခုကို အစိုးရက တည်ထောင်ထားလို့ပါ။ ဒီအဖွဲ့အစည်းက UFO Sightings မှန်သမျှကို မှတ်တမ်းယူထားပါတယ်။
UFO တွေ့တဲ့အချိန် တော်တော်များများက ပိတ်ရက် (Weekends) တွေမှာဖြစ်ပါတယ်။ တွေ့တဲ့အချိန်ကလည်း ညနေ ၆နာရီနဲ့ ၁၂နာရီကြား အရက်မူးနေလောက်မယ့် အချိန်ဆိုပြီး ငြင်းကြတာရှိပါတယ်။ တချို့ကလည်း UFO တွေက မှောင်မှပိုမြင်ရတာဆိုပြီးလည်း ပြန်ငြင်းကြပါတယ်။
![](https://sciencenuts.science.blog/wp-content/uploads/2021/07/argue-ufo.jpg?w=499)
ဒီလိုတွေ့တယ်လို့ သတင်းပို့တဲ့ Case တော်တော်များများဟာ Weather Balloons တွေ၊ တိမ်တွေ၊ လေယာဉ်ပျံတွေဖြစ်နေပါတယ်။ ဒါ့အပြင် ဥက္ကာပျံတွေ၊ ဂြိုလ်တွေကိုလည်း လွဲမှားပြီး UFO လို့ပြောတာတွေ ရှိပါတယ်။ ဒီတော့ သိပ္ပံနည်းကျ ရှင်းပြလို့ရပါတယ်။
သို့ပေမယ့် ရှင်းပြလို့မရတဲ့ ကိစ္စတွေလည်း ရှိနေပြန်ပါတယ်။ ၁၉၅၄ ခုနှစ်တုန်းက အီတလီက ဘောလုံးပွဲတစ်ခုမှာ UFO တစ်စင်းပျံသန်းလာတာကို တစ်ကွင်းလုံးက ပရိသတ်သောင်းချီပြီး မြင်လိုက်ရပါတယ်။ ဘောလုံးပွဲတောင် ခဏရပ်သွားတယ်လို့ ဆိုပါတယ်။ တော်တော်များများကတော့ “ဥ” လိုခပ်ချွန်ချွန်အရာတစ်ခု ကောင်းကင်ပေါ်ကနေ ဆင်းလာတယ်လို့ ပြောကြပါတယ်။ ဒါက Case တစ်ခုကို ပြောပြတာပါ။ ဒီလိုပဲ ရှင်းမရသေးတဲ့ Case တွေကျန်ပါသေးတယ်။
![](https://sciencenuts.science.blog/wp-content/uploads/2021/07/ufo-news.jpg?w=624)
ပြင်သစ်က UFO Research လုပ်တဲ့အဖွဲ့တစ်ခုကတော့ UFO တွေ့တယ်လို့ပြောတဲ့ Case တွေရဲ့ ၃.၅% ဟာ ဘာကြောင့်မှန်း ဖြေရှင်းလို့မရသေးဘူးလို့ ဆိုပါတယ်။
အရင်က ထင်ခဲ့ကြတာတော့ အမေရိကန်တို့၊ ဆိုဗီယက်တို့က နည်းပညာတွေ တိုးတက်အောင် ကြိတ်လုပ်နေပြီး စမ်းသပ်နေတာပေါ့။ ဒါပေမယ့် အမေရိကန်က UFO တွေကို လေ့လာဖို့ Project ပေါင်း ၁၂ ခုကို ငွေထောက်ပံ့ပေးခဲ့ပါတယ်။ UK ကလည်း UFO တွေကို လျှို့ဝှက်လေ့လာဖို့ Project ၂ခု လုပ်ခဲ့ပါတယ်။ ဆိုဗီယက်ယူနီယမ် မပြိုခွဲခင်တုန်းက ဆိုဗီယက်တွေဟာလည်း Project ၁ခုကို Fund ထုတ်ပေးခဲ့ပါတယ်။
![](https://sciencenuts.science.blog/wp-content/uploads/2021/07/china-is-behind.jpg?w=666)
သူတို့တွေလေ့လာမှုတွေအရ နောက်ဆုံးပိတ် Conclude လုပ်လိုက်တာကတော့ UFO တွေရှိတာ အမှန်ပါပဲ။ ဒါပေမယ့် ရန်လိုတာမျိုးတော့ မရှိဘူးလို့ ပြောကြပါတယ်။
နောက်တစ်ချက်က UFO တွေဟာ ကမ္ဘာက ဟုတ်ချင်မှဟုတ်မယ်… ဒါပေမယ့် သူတို့ဟာ ဂြိုလ်သားတွေဖြစ်နေဦးတော့ လူတွေနဲ့ ဆက်သွယ်ဖို့ စိတ်မဝင်စားဘူးလို့ ဆိုကြပါတယ်။
တချို့ကလည်း UFO တွေဟာ ရူပဗေဒရဲ့ဥပဒေသတွေကို ကျော်လွန်ပြီးပျံသန်းနိုင်အောင် လူတွေဖန်တီးထားတာလို့ ပြောကြပါတယ်။
ဘယ်လိုတွေပြောနေပြောနေ… ပညာရှင်တွေကတော့ UFO ထဲမှာ ဂြိုလ်သားတွေပါတယ်လို့ မပြောကြပါဘူး။
ဒါဟာ အရင်က ကိစ္စပါ။ NASA ရဲ့သတင်းစာရှင်းလင်းပွဲအပြီးမှာတော့ ရှုတ်ထွေးမှုတွေ စတင်လာပါတယ်။ အမေရိကန်ရဲ့ ဒီမိုကရက်တွေနဲ့ ရီပါဗလစ်ကန်တွေဟာ UFO ကိစ္စကို Seriously ကိုင်တွယ်ဖို့ သဘောတူထားကြပါတယ်။
![](https://sciencenuts.science.blog/wp-content/uploads/2021/07/mendiscussingthings26072021070401.jpg?w=755)
NASA ရဲ့ Report ကို အကျဉ်းပြောပြချင်ပါတယ်။ “Data တွေက Limited ဖြစ်တယ်… လူတွေပြောတာတွေမှာ မကိုက်ညီမှုတွေရှိနေတယ်။ UAP တွေ့တယ်လို့ ပြောတဲ့အချို့ Case တွေဟာ လူတွေရဲ့ထင်ယောင်ထင်မှား ဖြစ်မှုဖြစ်နိုင်တယ်။
UAP တွေဟာ အမေရိကန်လေကြောင်းပျံသန်းမှုတွေအတွက် အန္တရာယ်ပဲ။ ဒါ့အပြင် National Security ကိုလည်း စိန်ခေါ်နေတယ်။
တချို့ UAP တွေဟာ တရုတ်၊ ရုရှားနဲ့ အခြားနိုင်ငံတွေ၊ အစိုးရမဟုတ်တဲ့ အဖွဲ့အစည်းတွေကနေ လွှတ်တင်ထားတာ ဖြစ်နိုင်တယ်။”
ဒီတော့ UFO တွေရှိတာသေချာပေမယ့် ဘယ်သူပိုင်ဆိုင်တာလဲဆိုတာ ဝေခွဲမရသေးတဲ့ အနေအထားဖြစ်နေပါတယ်။ UFO Research လို့အပေါ်မှာ ပြောခဲ့ပေမယ့် သူတို့လေ့လာတဲ့နည်းလမ်းတွေဟာ သိပ္ပံနည်းမကျဘဲ Pseudoscience ဆန်တယ်လို့ ဝေဖန်ကြတာတွေလည်း ရှိပါတယ်။
![](https://sciencenuts.science.blog/wp-content/uploads/2021/07/pseudoscience-1.jpg?w=500)
Milky Way Galaxy မှာတင် လူတွေနေလို့ရလောက်မယ့် ကမ္ဘာနဲ့တူတဲ့ဂြိုလ်ပေါင်း သန်း ၃၀၀ လောက်ရှိပါတယ်။ ဒီတော့ လူတွေအပြင် အခြားသက်ရှိတွေ ရှိကောင်းရှိနိုင်တယ်ဆိုတာ ငြင်းမရပါဘူး။
ဒီအကြောင်းကို ဆက်ဖတ်ချင်ရင် အောက်က Link ကိုဝင်လိုက်ပါ။
စကြဝဠာက အကျယ်ကြီးဆိုရင် ဂြိုလ်သားတွေဘယ်မှာလဲ?
https://ouo.io/YZewKM
ကျွန်တော်တို့အနေနဲ့ ခုချိန်မှာ ပြောလို့ရတာက UFO တွေတကယ်ရှိပါတယ်။ ဒါပေမယ့် ဂြိုလ်သားတွေရှိနေတယ်ဆိုတာ ကံသေကံမ မပြောနိုင်ပါဘူး။ နောက်ပိုင်းမှာတော့ သတင်းတစ်ခုခု ထူးလာကောင်းပါရဲ့လို့ မျှော်လင့်မိပါတယ်။
SAGAN
Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။
Yeah indeed
LikeLike