ခုလိုခေါင်းစဉ်မျိုးကိုရေးရတာ ကြိုးတန်းလမ်းလျှောက်ရသလိုပါပဲ။

ဘာသာမဲ့တွေရော ဗုဒ္ဓဘာသာဝင်တွေရော ဆဲတာခံရဖို့များပါတယ်။

ဒါပေမယ့် စိတ်ဝင်စားစရာကောင်းတဲ့အတွက် ကျွန်တော်ရေးသားရခြင်းဖြစ်ပါတယ်။
စိတ်ရှင်းရှင်းနဲ့ဖတ်ပေးပါ။ အတွေးတစ်ခုရသွားမယ်လို့မျှော်လင့်ပါတယ်။

တာဝတိံသာနတ်ပြည်မှာရှိတဲ့နတ်သားတစ်ပါးဟာ ရံရွှေတော်နတ်သမီးတစ်ထောင်နဲ့ ဥယျာဉ်ထဲမှာပျော်ပါးနေတယ်။
အဲ့ထဲက နတ်သမီးတစ်ပါးဟာ နတ်သက်ကြွေပြီး လူ့ပြည်မှာလူဖြစ်သွားတယ်။
လူ့ပြည်မှာ အိမ်ထောင်ပြုပြီး ကလေး ၅ယောက်တောင်ရခဲ့တယ်။
အဲ့ဒီအမျိုးသမီးသေတဲ့အခါ နတ်ပြန်ဖြစ်သွားပြီး နတ်ပြည်ပြန်ရောက်သွားတယ်။
အဲ့ဒီအချိန်မှာ နတ်သားက “စောစောက သင်ဘယ်ရောက်နေသလဲ” လို့မေးတယ်။
ကျမ်းဂန်တွေအရဆို တာဝတိံသာတစ်ရက်ဟာ လူ့ပြည်ရဲ့ နှစ် ၁၀၀ နဲ့ညီတယ်လို့ဆိုတယ်။
ဘုရားက လူ့ပြည်မှာ ဝါတွင်း ၃လပတ်လုံး အဘိဓမ္မာတရားဟောကြားခဲ့ပေမယ့် နတ်ပြည်မှာတော့ ၄မိနစ်ပဲကြာခဲ့တယ်။
(ဒီအချက်တွေကို ဘုရားက အမှန်တကယ်ဟောကြားခဲ့လားဆိုတာကတော့ ကျွန်တော့အနေနဲ့မသေချာပါ)

ခုလို အချိန်တွေမတူညီရခြင်းကို Einstein ရဲ့ Relativity Theory နဲ့နည်းနည်းလောက်ရှင်းပြချင်ပါတယ်။
(General နဲ့ Special ဆိုပြီး ၂ခုရှိပါတယ်၊ General ကိုအရင်ရှင်းမှ Special ကိုနားလည်ပြီး ဘုရားဟောနဲ့ချိတ်ဆက်လို့ရမှာပါ)

ရွှေ့လျားနေတဲ့ ရထားတစ်စင်းပေါ်မှာ လူနှစ်ယောက်ရှိတယ်လို့မြင်ကြည့်ပါ။ ရထားက Constant Velocity နဲ့ရွေ့နေပါတယ်။ (တစ်စက္ကန့်ကို မီတာ ၆၀ နဲ့ရွေ့နေတယ်ဆိုပါစို့)
ရထားပေါ်က လူနှစ်ယောက်က ရထားရွေ့နေတာကို အပြင်ဘက်က ပုံရိပ်တွေကို ကြည့်ပြီးသိနိုင်ပါတယ်။
ဒါပေမယ့် သူတို့အချင်းချင်းကြည့်တဲ့အခါမှာ ငြိမ်နေတယ်လို့ပဲ ထင်ကြပါတယ်။
ရထားက ရွေ့လျားနေပေမယ့် လူတွေကငြိမ်နေတဲ့အတွက် မြေပြင်ပေါ်မှာရပ်နေကြသလိုပဲ Law of Physics က ရှိမှာပါ။

အဲ့ဒီအချိန်မှာ တတိယလူက မြေပြင်ကနေ ရထားဖြတ်သွားတာကို လှမ်းကြည့်နေတယ်ဆိုကြပါစို့။
ရထားပေါ်ကလူတွေရော၊ ရထားရော အရှိန်တစ်ခုခုနဲ့ရွေ့လျားနေတာကို မြင်ရမှာပါ။ ကိုယ့်ကိုယ်ကိုတော့ ငြိမ်နေတယ်လို့ ထင်မှာပါ။

ဒါဆို မြေပြင်ပေါ်က တတိယလူကရော တကယ်ငြိမ်နေတယ်ဆိုတာဟုတ်ရဲ့လား။
ကမ္ဘာကြီးက နေကို ၁နှစ်၁ခါ ၁ ပတ်ပြည့်အောင်ပတ်နေတာပဲ။
ဒါဆို နေကရော ငြိမ်နေတာလားဆို မငြိမ်ပါဘူး။
ကမ္ဘာအပါအဝင် ကျွန်တော်တို့ရဲ့ Solar System တစ်ခုလုံးက နဂါးငွေ့တန်းဂလက်ဆီ (Milky Way Galaxy) ပတ်နေတာပါပဲ။
Galaxy တွေလည်း မငြိမ်နေပါဘူး။
ဒီလောက်ဆိုရင် လောကကြီးမှာ ဘယ်အရာကမှ လုံးလုံးလျားလျားငြိမ်နေတယ် (Absolute Rest) ၊ လုံးလုံးလျားလျား ရွှေ့လျားနေတယ် (Absolute Motion) ဆိုတာမရှိမှန်း နားလည်နိုင်မယ်ထင်ပါတယ်။
အရာရာဟာ နှိုင်းရတန်ဖိုးတွေချည်းပါပဲ။ (Everything is relative)
ဒါက General Theory of Relativity ပါပဲ။

ဒါဆိုရင် Special Theory of Relativity ကို ရှင်းလို့ရပါပြီ။
မရှင်းခင် လောကကြီးမှာ အလင်းရဲ့အမြန်နှုန်းသည် အမြဲတမ်း မပြောင်းလဲဘဲ Constant ဖြစ်တယ်ဆိုတာကို လက်ခံရပါမယ်။

ဥပမာပြရရင် ကားတစ်စီးက တစ်နာရီ မိုင် ၄ဝနှုန်းနဲ့သွားနေတဲ့အချိန်မှာ ရှေ့မီးထိုးလိုက်တဲ့အခါ ကားရဲ့အရှိန်နဲ့ အလင်းရဲ့အရှိန်ပေါင်းပြီး အလင်းကပုံမှန်ထက် မြန်သွားမည်မဟုတ်ပါ။

ငယ်ငယ်က ရူပဗေဒမှာသင်ခဲ့ရတဲ့ Formula ကိုမှတ်မိကြဦးမယ်ထင်ပါတယ်။

Velocity = Distance / Time

ဒီ Formula ကိုသုံးပြီး ရွေ့လျားနေတဲ့အရာမှန်သမျှရဲ့ Velocity ကိုတွက်လို့ရပါတယ်။
အလင်းကလည်း ရွေ့နေတာပဲဆိုတော့ Velocity နေရာမှာ အလင်းကိုထည့်လိုက်လို့ရပါတယ်။

Speed of Light = Distance / Time

ကားမီးထိုးတဲ့ဥပမာကို ပြန်စဉ်းစားကြည့်ပါ။
ကားမောင်းနေတဲ့သူအတွက် ကားရွေ့နေပေမယ့် သူက ငြိမ်နေတဲ့အတွက် အလင်းရဲ့အမြန်နှုန်းက ပုံမှန်ပဲဖြစ်နေမှာပါ။
အဲ့ဒီလိုဖြစ်ဖို့အတွက် ကားမောင်းနေတဲ့သူရဲ့အချိန်ဟာ နှေးကွေးသွားပါတယ်။ (မဟုတ်တာတွေ စလာပါပြီလို့ မတွေးခင်ဆက်ဖတ်ပေးပါဦး)

အချိန်နှေးတယ်ဆိုလို့ ဇာတ်လမ်းတွေထဲကလို နှေးကွေးလေးလံသွားတယ်လို့မထင်ပါနဲ့။
ကားမောင်းနေတဲ့သူက ပုံမှန်အတိုင်းပါပဲ။ သူ့ရဲ့ Perception of Time ကလည်း ပုံမှန်ပါပဲ။ ငါ့အချိန်ကြီးကတော့ နှေးသွားပြီဟေ့ဆိုပြီး ခံစားရမှာမဟုတ်ပါဘူး။

နားလည်အောင် Formula ထဲထည့်ပြရရင် အလင်းက အမြဲ Constant ဖြစ်တဲ့အတွက် ပိုလာတာ Distance ကို cover ဖြစ်ဖို့ Time ကပါ လိုက်တိုးလာရတဲ့သဘောပါပဲ။
ဒါကို Time Dilation (အသက်ပိုရှည်ခြင်း) လို့ခေါ်ပါတယ်။
Everything is relative ဆိုတဲ့အတိုင်းပဲ အချိန်သည်လည်း တသမတ်တည်း ရှိမနေပါဘူး။

Speed of Light (constant) = Distance (increase) / Time (increase)

ဒီအချက်ကို စမ်းသပ်ပြီး အတည်ပြုပြီးပါပြီး။ အချိန်က တကယ်နှေးသွားတာပါ။
ကမ္ဘာတစ်ဝှမ်းကို အရှိန်အမျိုးမျိုးနဲ့ ပျံတဲ့လေယာဉ်ပျံတွေပေါ်မှာ Atomic Clock (အချိန်အလွန်တိကျပြီး Nano second အထိပြပေးနိုင်တဲ့နာရီ) တစ်လုံးစီကိုတင်ပြီး သွားလိုရာကို သွားကြတယ်။ နေရာတစ်ခုရောက်တဲ့အချိန်မှာ နာရီတွေကို စစ်ကြည့်တော့ အစက အချိန်တူခဲ့တဲ့နာရီတွေဟာ မတူတော့ဘူး။
Nano second လောက်လွဲနေကြတယ်။
ကျွန်တော်တို့တွေ ကားစီး၊ လေယာဉ်စီးရင်လည်း အချိန်တွေနှေးသွားတာပါပဲ။ နှေးသွားတာက Nano second လောက်ပဲဆိုတော့ မသိသာဘူးပေါ့။

Time Dilation ကို Interstellar Movie မှာမြင်ဖူးကြမှာပါ။
ဇာတ်လိုက်ရဲ့အသက်က သိပ်မကြီးသွားပေမယ့် ကမ္ဘာမှာကျန်ခဲ့တဲ့သူ့သမီးကတော့ အဖွားကြီးဖြစ်သွားခဲ့ပါပြီ။

ကမ္ဘာမှာနေရင်တော့ ဒီအချက်ကိုမသိလည်း ဘာမှမဖြစ်ပေမယ့် အာကာသထဲခရီးသွားမယ်ဆိုရင်တော့ Time Dilation ကိုမဖြစ်မနေထည့်စဉ်းစားရမှာပါ။

Time Dilation က အလင်းအလျှင်ရဲ့ 70% ကိုကျော်လာမှ သိသိသာသာအကျိုးသက်ရောက်မှု ရှိမှာဖြစ်တဲ့အတွက် နေ့စဉ်ဘဝမှာတော့ မသိသာပါဘူး။

Length Contraction ဆိုတာလည်းရှိပါသေးတယ်။ ဒါပေမယ့် ဒီနေ့ Topic နဲ့မဆိုင်လို့ထားခဲ့ပါပြီ။

Thanks for reading.

SAGAN

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။

Sloth ဆိုတာနဲ့ ဘာကောင်လေးလဲဆိုတာ မျက်စိထဲမှာပေါ်လာကြမယ်ထင်ပါတယ်။
မမှတ်မိတော့တဲ့သူတွေအတွက် အစဖော်ပေးရမယ်ဆိုရင် Zootopia ဇာတ်လမ်းထဲက အရမ်းကိုနှေးကွေးတဲ့ ရုံးစာရေးကိုပြောချင်တာပါ။
အဲ့ဒီ Scene လေးက တော်တော်ကို Memorable ဖြစ်၊ ရယ်လည်းရယ်ရတဲ့အတွက် Sloth ဆိုတာ ဘာကောင်လေးလဲ လူတွေစိတ်ဝင်စားသွားကြပါတယ်။
တကယ့်လက်တွေ့ဘဝမှာလည်း ဒီကောင်လေးတွေက တော်တော်ကြီးကို နှေးကွေးကြပါတယ်။
သူတို့ဘာလို့ ဒီလောက်နှေးကွေးနေရလဲ အပါအဝင် သူတို့ရဲ့အကြောင်းစုံကို ပြောပြချင်ပါတယ်။

Sloth ကို ဘာသာပြန်ရင် ငပျင်းလို့ အဓိပ္ပါယ်ရပါတယ်။

Sloth တွေဟာလွန်ခဲ့တဲ့ နှစ်သန်းပေါင်း ၃၅သန်း-၆ဝသန်း ကတည်းက ကမ္ဘာမှာရှိနေကြပါပြီ။
အဲ့တုန်းကရှိခဲ့တဲ့ Sloth တွေဟာ အကြီးကြီးတွေပါ။ Giant Sloth လို့ခေါ်ပါတယ်။ ၆တန်လောက်လေးတဲ့အကောင်ကြီးတွေတောင် ရှိခဲ့ပါတယ်။ (ဆင်လောက်ကြီးတဲ့ အကောင်တွေဆိုတော့ တော်တော်ကိုချစ်စရာကောင်းမှာပါ)
သူတို့က သစ်ပင်တွေပေါ်တက်ပြီး အသီးတွေ၊ အရွက်တွေစားကြတဲ့အပြင် မြက်တွေကိုလည်းစားကြပါတယ်။

ပညာရှင်တွေကတော့ Giant Sloth တွေကြောင့်သာမဟုတ်ရင် ဒီနေ့ခေတ်မှာ ထောပတ်သီးဆိုတာ ရှိချင်မှတောင်ရှိလိမ့်မယ်လို့ဆိုပါတယ်။
ဘာလို့လဲဆိုရင် လွန်ခဲ့တဲ့နှစ်သန်းပေါင်းများစွာက ထောပတ်သီးအရိုင်းရဲ့အစေ့တွေဟာ မာကြောလွန်းတဲ့အတွက် သာမန်တိရစ္ဆာန်တွေက မစားနိုင်ဘဲ Giant Sloth ကပဲ စားနိုင်ခဲ့လို့ပါ။
သူတို့ကြောင့် ထောပတ်သီးအစေ့တွေ နေရာစုံမှာ ပျံကျဲသွားခဲ့တယ်လို့ဆိုပါတယ်။

ဒါပေမယ့် ခုခေတ်မှာ Giant Sloth တွေမရှိတော့ပါဘူး။ မျိုးတုန်းကုန်ကြပြီဖြစ်ပါတယ်။
(လူတွေကြောင့်ဖြစ်နိုင်တယ်လို့လည်း ပညာရှင်တွေကပြောကြတယ်)

Sloth အသေးလေးတွေကတော့ ခုချိန်ထိ ကျန်နေပါသေးတယ်။ လက်ရှိမှာ မျိုးစိတ် ၆ ခု ရှိတယ်လို့ဆိုတယ်။ အမေရိကတိုက် အလယ်ပိုင်းနဲ့ တောင်ပိုင်းမှာ အဓိကတွေ့ရတယ်။

သူတို့အသက်ရှင်ရပ်တည်ဖို့အတွက် သစ်ပင်ပေါ်မှာ အများဆုံး နေထိုင်ကြပါတယ်။
သစ်ပင်ပေါ်မှာနေတာက သူတို့အတွက် အန္တရာယ်ကင်းသလို စားဖို့အတွက်လည်း အရွက်တွေအများကြီးရှိနေပါတယ်။ (ရေကန်အသင့် ကြာအသင့်ပေါ့)

သူတို့ရဲ့ အဓိက Diet က အရွက်တွေဖြစ်ပါတယ်။
အရွက်စားတာကျန်းမာတယ်လို့ လူတွေကနားလည်ကြပေမယ့် အရွက်ချည်းပဲစားမယ်ဆိုရင်တော့ (သားသတ်လွတ်စားတာကို ပြောလိုခြင်းမဟုတ်ပါ) အသက်ရှင်ရပ်တည်ဖို့ မလွယ်ကူလှပါဘူး။
သတ္တဝါတိုင်းက သူတို့နေ့စဉ်လိုအပ်တဲ့စွမ်းအင်ကို ကစီဓာတ်၊ အသားဓာတ်နဲ့ အဆီဓာတ်ကနေ ရကြပါတယ်။
အရွက်မှာ Calories တော်တော်နည်းပါတယ်။
အခြား အရွက်စားသတ္တဝါတွေဆိုရင် အရွက်ကိုသာမက Calorie များများပါတဲ့ အစေ့အဆံတွေ၊ အသီးအနှံတွေကိုပါ စားကြပါတယ်။
Sloth ကတော့ အရွက်မှအရွက်ပါပဲ။ (သစ္စာရှိသူကြီးပါ)

အရွက်တွေဟာ ချေဖျက်ရခက်တဲ့အတွက် လူဆိုရင် အရွက်စားတဲ့အခါ ဝမ်းမှန်မှန်သွားပါတယ်။
ဒါပေမယ့် Sloth တွေက အရွက်ပဲစားပြီး ၁ပတ်နေမှ ဝမ်း ၁ခါပဲသွားပါတယ်။
ဘာကြောင့်လဲဆို သူတို့အစာအိမ်က ခန္ဓာကိုယ်ရဲ့ ၃ပုံ၁ပုံတောင်ရှိလို့ပါ။
အစာတွေကို ၅ရက်ကနေ ၁ပတ်ထိ အစာအိမ်ထဲမှာ သိုလှောင်နိုင်ကြတယ်။
အရွက်ကနေ ရနိုင်သလောက် Calories ကို ယူနေတာမို့ပါ။ (ခြောက်ကပ်နေပြီဖြစ်တဲ့ ကြံရိုးတစ်ရိုးကနေ အရည်တစ်စက်ဖြစ်ဖြစ်ပိုရအောင် အချိန်အကြာကြီး ကြိတ်နေတာမျိုးပါ)

Calories ရတာနည်းတဲ့အတွက် အသက်ရှင်ရပ်တည်ဖို့ နောက်တစ်နည်းနဲ့ဘယ်လိုဖြေရှင်းလဲဆို လှုပ်ရှားမှုတွေကို လျှော့ချပစ်လိုက်တာပါ။
သူတို့ရဲ့အချိန်တွေ တော်တော်များများကို သစ်ပင်ပေါ်မှာပဲ စားလိုက်၊ အိပ်လိုက်၊ အနားယူလိုက်နဲ့ပဲ ကုန်ဆုံးကြပါတယ်။ (အားကျစရာကြီးပါ)

တစ်ပတ်တစ်ခါတော့ အိမ်သာတက်ဖို့ သစ်ပင်ပေါ်ကနေ ဆင်းလာလေ့ရှိပါတယ်။ အပင်ပန်းခံပြီးများ ဆင်းလာနေသေးတယ်၊ သစ်ပင်ပေါ်ကပဲ ပါချလိုက်ပါတော့လားလို့ မေးစရာရှိပါတယ်။
ဟုတ်ကဲ့… ပညာရှင်တွေလည်း ဒီမေးခွန်းကို မေးခဲ့ကြပါတယ်။

ပထမ အယူအဆကတော့ အပင်ပေါ်ကနေ ပါချလိုက်ရင် အသံကျယ်ပြီး သူ့ကိုစားမယ့်အကောင်တွေရောက်လာနိုင်တော့ အန္တရာယ်ကျရောက်နိုင်လို့ပါတဲ့။ (ဒီအယူအဆက သိပ်တော့ မနိပ်လှဘူး)
ဒုတိယ အယူအဆကတော့ အပင်ခြေရင်းမှာ ပါလိုက်ခြင်းအားဖြင့် အပင်အတွက်လိုအပ်တဲ့ မြေသြဇာကို ပေးလိုက်တာပါပဲတဲ့။ (သဘာဝရဲ့ မြေသြဇာပေါ့…)
တတိယ အယူအဆကတော့ သူ့ကိုယ်ပေါ်မှာနေကြတဲ့ ပိုးဖလန်တွေ ဥအုဖို့အတွက် ရေခံမြေခံကောင်းအောင် လုပ်ပေးတာပါတဲ့။
စတုတ္ထ အယူအဆကတော့ အပင်ပေါ်ကနေဆင်းလိုက်ခြင်းအားဖြင့် ပတ်ဝန်းကျင်က Sloth တွေနဲ့တွေ့ခွင့်ရပြီး မျိုးပွားဖို့အတွက် အခွင့်အလမ်းတိုးစေပါတယ်တဲ့။ (ရည်းစားရဖို့အတွက် ငပျင်းဘဝကို တစ်ပတ်တစ်ခါ စွန့်လွှတ်သူကြီးပါ)

Sloth တွေက တော်တော်ကြီးကို နှေးကွေးကြတဲ့အတွက် သူတို့အတွက် ကြွက်သားတွေသိပ်မလိုအပ်ပါဘူး။ သူတို့မှာ သူတို့နဲ့အရွယ်အစားတူ အခြားတိရစ္တာန်တွေထက် ကြွက်သားထုထည် 25-30% နည်းနေပါတယ်။
(ဗလမတောင့်ပေမယ့် ရုပ်ကလေးကချစ်စရာလေးမို့ အချစ်ခံရတဲ့အကောင်လေးပါ)

ဘယ်လောက်တောင် နှေးလဲဆို မြေပေါ်မှာဆို တစ်မိနစ်မှ ၂မီတာပဲ ရွေ့ပါတယ်။
အန္တရာယ်နဲ့တွေ့ရင် လိပ်တွေလို ခပ်မြန်မြန်ထပြေးနိုင်လိမ့်မယ် မထင်ပါနဲ့။ တစ်မိနစ်ကို ၄မီတာထိ တိုးပြီးပြေးပါတယ်။
ရေထဲမှာတော့ ၃ဆလောက်မြန်အောင် ရေကူးနိုင်ပါတယ်။ (၁မိနစ်ကို ၆မီတာ ကြီးများတောင် ရွေ့သွားတာပါ…)

သူတို့ဟာ နို့တိုက်သတ္တဝါအနွယ်ဝင်ဖြစ်ပြီး သွေးနွေးသတ္တဝါထဲမှာ ပါဝင်ပေမယ့် သူတို့ခန္ဓာကိုယ် အပူချိန်ကို 5° Celsius ထိပြောင်းလဲနိုင်ပါတယ်။ (လူတွေဟာ 0.5° Celsius ထိပဲပြောင်းလဲနိုင်ကြပါတယ်)
ဒါဟာ သွေးနွေးသတ္တဝါအနွယ်ဝင်တွေထဲမှာ ထူးထူးခြားခြားပါပဲ။

သူတို့ရဲ့ ဇီဝရုပ်ဖြစ်ပျက်မှု (Metabolism) က သွေးနွေးသတ္တဝါထဲမှာတော့ အနှေးဆုံးပါပဲ။
ဒုတိယလိုက်တာကတော့ Panda ငပျင်းတွေပါ။

သူတို့ရဲ့နှေးကွေးမှုကြောင့် သူတို့ကိုယ်ပေါ်မှာ ရေညှိတွေ၊ ပိုးဖလန်တွေ ကပ်နေလေ့ရှိပါတယ်။
ပိုးဖလန်တွေက Sloth မှ Sloth တန်းတန်းစွဲဖြစ်တဲ့အတွက် Sloth Moth ဆိုပြီးတော့တောင် နာမည်ပေးထားရပါတယ်။ အခြားအကောင်တွေပေါ်မှာ မနေပါ။
သူတို့ကိုယ်မှာ ရေညှိတွေကပ်နေတဲ့အတွက် သစ်ပင်တွေနဲ့ရောပြီး ပျောက်နေတတ်ပါတယ်။
(အပျင်းထူလွန်းလာရင်တော့ ကိုယ်မှာကပ်နေတဲ့ရေညှိတွေကို ခွာစားလို့လည်းရပါသေးတယ်)

ဒီလောက်ဆို Sloth အကြောင်းသိရတာ ကျေနပ်ကြမယ်ထင်ပါတယ်။

SAGAN

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။

(အောက်ပါအကြောင်းအရာများတွင် ယောကျာ်းနှင့်မိန်းမအသုံးသည် Husband & Wife သဘောမျိုးမဟုတ်ဘဲ Male & Female သဘောကိုသာဆောင်ပါသည်။
ယေဘုယျသဘောများကိုသာ ဖော်ပြခြင်းဖြစ်သဖြင့် အဖြူအမည်းသဲကွဲသလိုဖြစ်နေသော်လည်း Grey area များများစွာရှိကြောင်း သတိပြုစေချင်ပါသည်။ အတိအကျမယူစေလိုပါ။ ဗဟုသုတအတွက်သာ ဖတ်ပါ။)

ယောကျာ်းတို့ကို ဝေဖန်အကြံပေးရာတွင် မိန်းမတို့ ဂရုပြုသင့်များရှိသည်။
အများအားဖြင့် ဝေဖန်အကြံပေးခြင်းကို ယောကျာ်းတို့မကြိုက်တတ်ကြပါ။
အဲ့ဒီလိုဆို ဖိနပ်ရှပ်တိုက်စီးနေတာကိုမပြောရတော့ဘူးလား၊ ထမင်းစားရင် ပလုတ်ပလောင်းစားပြီး အသံတွေမြည်နေတာကိုရော မဝေဖန်ရတော့ဘူးလားလို့ မေးစရာရှိလာသည်။

အကြံမတောင်းဘဲနဲ့မပေးပါနဲ့၊ ထင်မြင်ချက်တွေမတောင်းဘဲနဲ့ မပေးပါနဲ့၊ အရမ်းအရမ်းမဝေဖန်ပါနဲ့ လို့ ခပ်လွယ်လွယ်ပြောရမည်ဖြစ်သည်။
အရှိအတိုင်း လက်ခံပေးနိုင်အောင်ကြိုးစားသင့်သည်။
ယောကျာ်းတို့လိုချင်တာ သူတို့ရဲ့မကောင်းခြင်းတွေကို လက်ချာရိုက်နေတာမဟုတ်၊ နားလည်လက်ခံပေးခြင်းဖြစ်သည်။

ကိုယ့်ကို နားလည်လက်ခံပေးနေပြီလို့ ခံစားရရင် ဘယ်အချက်ကိုမကြိုက်ဖူးလဲဆိုတာ ထုတ်ပြီးမေးလာတတ်ကြသည်။ (မကြိုက်တာကို ပြောင်းလဲပေးလိမ့်မယ်လို့ ဆိုလိုချင်တာမဟုတ်ပါ)

အဲ့လိုမဟုတ်ဘဲ ပြောင်းလဲဖို့အတင်း တွန်းအာပေးခံရတဲ့အခါ မိန်းမဆီက အကြံဉာဏ်တွေ၊ ထင်မြင်ချက်တွေ မတောင်းတော့ပါ။ (စကားအကောင်းကြားရလိမ့်မယ်မထင်လို့ ဖြစ်သည်)
Relationship တစ်ခုမှာ ယောကျာ်းတို့ မိန်းမဆီက အကြံဉာဏ်တွေ၊ ထင်မြင်ချက်တွေတောင်းနေခြင်းသည် ယုံကြည်မှုရှိလို့သာဖြစ်သည်။

ဒီလိုဆိုရင် မိန်းမက သူမကြိုက်တာကို လုံးဝထုတ်မပြောသင့်တော့ဘူးလားလို့ မေးစရာရှိလာသည်။
ဒါကတော့ တစ်ဖက်က ယောကျာ်းရဲ့အပြုအမူပေါ်မှာ များစွာမူတည်ပါသည်။
မိမိမကြိုက်သော ယောကျာ်းရဲ့အပြုအမူတစ်ခုကို မကြိုက်ကြောင်း အပြစ်မတင်ဘဲ စမ်းသပ်ပြောဆိုကြည့်သင့်သည်။

ဥပမာ ခုဝတ်ထားတဲ့ အင်္ကျီအရောင်က ယောကျာ်းမဆန်ဘူး။ တခြားအရောင်ပြောင်းဝတ်ပါလားလို့ မိန်းမကပြောတယ်ဆိုပါစို့။
ယောကျာ်းအနေနဲ့ စိတ်အနှောင့်အယှက်ဖြစ်သွားတယ်လို့ ခံစားမိရင် မိန်းမကပြန်တောင်းပန်သင့်သည်။
နောက်တစ်ခါ ဒီကိစ္စကို ထပ်မပြောသင့်၊ မပြောသင့်ဆိုတာ မိမိကိုယ်တိုင်ပဲသိမည်ဖြစ်သည်။
(ဒီလောက်ကလေးပြောတာနဲ့ စိတ်ကွက်စရာလားလို့ မေးစရာရှိပါတယ်၊ တချို့တွေ တကယ်စိတ်ကွက်တတ်ပါတယ်)

ဒီပြဿနာကိုပဲ မိန်းမက တခြားနည်းနဲ့ချည်းကပ်တယ်ဆိုပါစို့။
Shopping ထွက်ကြမလား၊ အင်္ကျီလေးတစ်ထည်လောက်ရွေးပေးချင်လို့ ဆိုပြီး ပြောလိုက်လည်း ကိုယ်လိုချင်တဲ့အရာကို ယောကျာ်းအငြိုငြင်မခံရဘဲ ရသွားနိုင်သည်။
ဒါကိုမှ ယောကျာ်းက မဝယ်ချင်ဘူးလို့ဆိုရင် ထပ်ပြီးမပြောပါနှင့်။
သူ့အနေနဲ့ အမေတစ်ယောက် ထပ်မလိုချင်တာလည်း ဖြစ်နိုင်သည်။

ယောကျာ်းက မိန်းမရဲ့ complaint ကိုနားထောင်လိုသော်လည်း ကာလံဒေသံလွဲသွားတဲ့အခါ စိတ်ငြိုငြင်သွားတတ်သည်။
ဥပမာ အင်္ကျီအရောင်က ယောကျာ်းမဆန်ဘူးဆိုတဲ့စကားကို သူငယ်ချင်းတွေရှေ့မှာ ပြောမိတယ်ဆိုကြပါစို့။
အရမ်း Sensitive မဖြစ်တဲ့ယောကျာ်းတောင် ထိုအခြေအနေမျိုးတွင် စိတ်ငြိုငြင်သွားတတ်ကြသည်။
အကောင်းဆုံးကတော့ နှစ်ယောက်တည်းရှိချိန်မှ မိမိ မကြိုက်တာများကို ပြောဆိုခြင်းဖြစ်သည်။

အကြံပေးခြင်း၊ အကူအညီပေးခြင်းကို ယောကျာ်းတို့မကြိုက်ရခြင်းမှာ သူတို့၏ဝသီပင် ဖြစ်သည်။
ယောကျာ်းကို ပြောင်းလဲဖို့ကြိုးစားခြင်းသည် မိန်းမဘက်ကကြည့်လျှင် ပိုမိုကောင်းမွန်အောင် အမွှန်းတင်ပေးနေခြင်းဖြစ်ပေမယ့် ယောကျာ်းဘက်ကကြည့်လျှင် မိမိကို ထိန်းချုပ်လိုခြင်း၊ ကလေးကဲ့သို့ သဘောထားခြင်းလို့ မြင်၏။
လက်ရှိအနေအထားနှင့်မလုံလောက်သောကြောင့်၊ မိန်းမလိုချင်သောသူ မဖြစ်သေးသောကြောင့်သာ ပြောင်းလဲဖို့ကြိုးစားနေခြင်းဖြစ်ရမည်ဟု တွေးထင်တတ်ကြသည်။

ဒီလိုဆိုရင် ယောကျာ်းတို့ကို ဂရုစိုက်မှု၊ ကြင်နာမှုပေးစရာမလိုတော့ဘူးလားလို့ ထင်စရာရှိသည်။
အဲ့ဒီလိုလည်းမဟုတ်ပါ။ ဂရုစိုက်မှုကို လိုအပ်ပါသည်။
ဒါပေမယ့် အရာရာကို စစ်စစ်ပေါက်ပေါက်လိုက်ပြီး ပြုပြင်ပေးတာကို ဂရုစိုက်တာပါဆိုပြီး ခေါင်းစဉ်တပ်တဲ့မိန်းမတို့ရဲ့ ဂရုစိုက်ခြင်းမျိုးမဟုတ်ပါ။
(မိန်းမတွေတင်ရှုပ်ထွေးတာမဟုတ်ပါ၊ ယောကျာ်းတွေလည်း သူ့နည်းသူ့ဟန်နဲ့ ရှုတ်ထွေးကြပါတယ်)

ယောကျာ်းတို့သည် သူတို့ဘာသာ ပြဿနာကိုဖြေရှင်းတတ်ကြသည်။ မဖြေရှင်းနိုင်မှသာ အကြံဉာဏ်တောင်းခံတတ်သည်။
မိန်းမက အကြံတစ်ခုပေးလိုက်ခြင်းသည် သူ့ရဲ့လုပ်ဆောင်ရည်ကို မယုံကြည်လို့ဆိုပြီး အဓိပ္ပါယ်ဖွင့်ကြတဲ့သူတွေလည်း ရှိသည်။
ကိစ္စတိုင်းမှာ အကြံဉာဏ်ပေးနေခြင်းသည် ယောကျာ်းတို့၏ အားသာချက်ဖြစ်သော ပြဿနာဖြေရှင်းခြင်းကို အနှောင့်အယှက်ဖြစ်စေသည်။
ကြာလာသောအခါ လူပျင်းတစ်ယောက် (သို့) ကိုယ့်ကိုယ်ကို ယုံကြည်ချက်မရှိသော ယောကျာ်းတစ်ယောက် ဖြစ်သွားစေနိုင်သည်။

ယောကျာ်းတို့သည် အယုံကြည်ခံချင်ကြပြီး မိန်းမတို့သည် ဂရုစိုက်ခံလိုကြသည်။
မျက်နှာလည်းမကောင်းပါလား၊ ဘာဖြစ်လို့လဲလို့ အမေးခံရတဲ့မိန်းမက စိတ်ကျေနပ်သွားမှာ ဖြစ်ပေမယ့် ယောကျာ်းကိုမေးမိရင်တော့ မကြိုက်နှစ်သက်တာမျိုးဖြစ်သွားနိုင်သည်။

အသနားခံရမှာကိုလည်း ယောကျာ်းတို့မကြိုက်ကြပါ။
ထိခိုက်မိလို့ နာသွားလား အမေးခံရရင် ယောကျာ်းတို့က တကယ်နာသွားတယ်ဆိုရင်တောင် ဘာမှမဖြစ်ဘူးလို့ ပြောကြမှာဖြစ်ပြီး မိန်းမတို့က ဂရုစိုက်ခံရတဲ့အတွက်ကြောင့် ပျော်ရွှင်သွားမှာဖြစ်သည်။

(Part 7 ဆက်ပါဦးမည်)

SAGAN

အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။