အရင်တစ်ပိုင်းတုန်းက အလင်းထက်မြန်အောင် ဘယ်လိုသွားလို့ရမလဲဆိုတာကို ပြောပြီးပါပြီ။

အလင်းထက်မြန်အောင် တကယ်ပဲသွားလို့မရဘူးလား?
https://ouo.io/hA5Avn

အဲ့ဒီမှာ Alcubierre Drive အကြောင်းပြောခဲ့ပါတယ်။ သူက Negative Energy လိုတဲ့အတွက် လက်တွေ့မှာမဖြစ်နိုင်ဘူးလို့ ပညာရှင်တွေက ဆိုပါတယ်။ အကြောင်းကတော့ Negative Energy ဆိုတာ သီအိုရီထဲမှာပဲရှိပြီး လက်တွေ့မှာ ရှာမတွေ့သေးလို့ပါ။

Alcubierre တင်ခဲ့တဲ့ Paper ကနေ Inspire ဖြစ်သွားပြီး လက်တွေ့မှာလည်း ဖြစ်နိုင်တဲ့ Warp Drive တစ်ခုကို ပညာရှင်တွေက ထပ်ပြီးစဉ်းစားလိုက်ကြပါတယ်။ အခု အဲ့ဒီအကြောင်း ပြောချင်တာပါ။

Alcubierre Drive မှာတုန်းက Spaceship ပတ်ပတ်လည်မှာ ပူပေါင်း (Bubble) တစ်ခုဖြစ်လာအောင် လုပ်ခိုင်းပါတယ်။ ဘာလို့လဲဆိုတော့ Spaceship တည်ရှိနေတဲ့ Bubble ထဲက Spacetime ကို Constant ထားချင်လို့ပါ။ ဒါကို Flat Spacetime Bubble လို့ခေါ်ပါတယ်။

Bubble ရဲ့အပြင်မှာရှိတဲ့ Spacetime ကိုတော့ ကွေးညွတ်ခြင်း၊ ခုံးထခြင်းတွေ ဖြစ်လာအောင် လုပ်မှာပါ။ အပြင်မှာ ဘာတွေဖြစ်နေဖြစ်နေ Bubble ထဲမှာ အေးဆေးဖြစ်နေအောင် ရည်ရွယ်ပါတယ်။ (အရင် Post မှာ ဒီအကြောင်းထည့်ရေးရင် ရှုပ်ကုန်မှာ ကြောက်လို့ချန်ခဲ့တာပါ)

အရင် Post မှာတုန်းက လှိုင်းစီးသလိုပဲ… နောက်မှာ ခုံးထလာတဲ့ Spacetime က Spaceship ကိုတွန်းမယ်လို့ ပြောခဲ့ပါတယ်။ ဒါပေမယ့် သိလာရတာက အဲ့လိုမဖြစ်စေပါဘူး။ Spacetime တွေပြောင်းလဲမှုရှိပေမယ့် ကိုယ့်ရဲ့ယာဉ်ကိုရွေ့စေချင်ရင် ဒုံးပျံလိုမျိုးတစ်ခုခုနဲ့ တွန်းကန်ရမှာပါ။ ဥပမာ အာကာသထဲကို သွားဖို့ ကမ္ဘာရဲ့ဆွဲအားကို လွန်ဆန်ပြီး တွန်းကန်ပေးမယ့် ဒုံးပျံတွေလိုသလိုပေါ့။

• 

အောက်က Graph ကိုကြည့်ပါ။

အရာဝတ္ထုတစ်ခုဟာ အလင်းအလျင်နဲ့ နီးလာလေလေ Energy လိုလေလေပါပဲ။ Einstein ရဲ့အဆိုအရပြောရရင် အလင်းအလျင်ကို ရောက်ဖို့ Energy Infinity လိုမှာပါ။ (မဖြစ်နိုင်ဘူးပေါ့…)
အခုပြောတဲ့ Paper ထဲမှာလည်း အလင်းအလျင်ကိုကျော်ဖို့ Superluminal Matter ဆိုတာကိုလိုပါတယ်။ (လက်တွေ့မှာ မရှိပါဘူး… ဒါကြောင့် အလင်းအလျင်ကို ကျော်ဖို့မဖြစ်နိုင်ပါဘူး)

အလင်းအလျင်ထက်မြန်မှာလည်း မဟုတ်ဘဲနဲ့ ရေးနေသေးတယ်လို့ မပြောခင်ဆက်ဖတ်ပေးပါဦး။
အခုပြောနေတဲ့ Paper မှာ Warp Drive ကို ၄မျိုးခွဲလိုက်ပါတယ်။ Alcubierre ပြောခဲ့တဲ့ Warp Drive ဟာ Class III ထဲမှာပါပါတယ်။
Bubble ထဲကမြန်နှုန်း (Speed) က အလင်းအလျှင်အောက် ငယ်နေပေမယ့် အပြင်က Spacetime ကတော့ အလင်းအလျှင်ထက်မြန်နေပါတယ်။

အခုပြောချင်တဲ့ Warp Drive ကတော့ Bubble ထဲက မြန်နှုန်းရော အပြင်က Spacetime ရဲ့မြန်နှုန်းရောက အလင်းအလျှင်ထက်နှေးနေတာပါ။ ဒါကတော့ Class I ပါ။

ပုံကိုကြည့်လိုက်ရင် အလင်းအလျှင်ထက်မမြန်တာ Class I တစ်ခုပဲရှိပါတယ်။ ဒါကြောင့် ဒါကပဲ လက်တွေ့မှာဖြစ်နိုင်ပါတယ်။ Superluminal Matter လည်းမလိုသလို Negative Energy လည်းမလိုပါဘူး။

Proxima Centauri ကိုအလင်းအလျှင်နဲ့သွားမယ်ဆိုရင် အလင်းနှစ် ၄.၂ နှစ်နီးပါကြာမှာပါ။ အလင်းအလျှင်ရဲ့ ၅ဆနဲ့သာသွားနိုင်ရင် ၁ဝလပဲကြာမှာပါ။ (ဒါဟာ မဖြစ်နိုင်ပါဘူး)

• 

ဒီတော့ အလင်းအလျှင်ရဲ့ ၅ဆနဲ့မသွားပေမယ့် ၁ဝလပဲကြာအောင် သွားမရဘူးလားဆိုပြီး ပညာရှင်တွေက ကြံဆကြည့်ကြပါတယ်။ Einstein ကတော့ General Theory of Relativity မှာ Time Dilation ကိုခွင့်ပြုထားပါတယ်။ Time Dilation ဆိုတာ အသက်ပိုရှည်ခြင်းလို့ လွယ်လွယ်ပြောရမလိုပါပဲ။ ကိုယ့်မှာ Time Dilation ဖြစ်တဲ့အခါ ကိုယ်ခံစားရတဲ့အချိန်က ၁နှစ်ဖြစ်ပေမယ့် အခြား ၁နေရာက လူတွေ ခံစားရတာက ၁ဝနှစ်ဖြစ်နေတာမျိုးပေါ့။

Time Dilation ကို ၂နည်းနဲ့လုပ်လို့ရပါတယ်။ ပထမ ၁နည်းကတော့ အလင်းအလျှင်ရဲ့ တစ်စိတ်တစ်ပိုင်းလောက်ထိ (90% နှင့်အထက်) မြန်အောင်သွားခြင်းပါ။ နောက်တစ်နည်းကတော့ Gravity အရမ်းများတဲ့ Spaceship ထဲမှာဝင်နေလိုက်ခြင်းပါ။
ပထမနည်းကတော့ သိပ်ရှင်းစရာမလိုဘဲ သိကြမယ်ထင်ပါတယ်။

ဒုတိယနည်းကို မြင်သာအောင် Interstellar ဇာတ်လမ်းနဲ့ ဥပမာပေးနိုင်ပါတယ်။ Supermassive Black Hole တစ်ခုနားရောက်တဲ့အခါ သူတို့အချိန်တွေဟာ ကမ္ဘာနဲ့တော်တော်ကို ကွာခြားသွားပြီး သမီးက အဖေထက် အသက်ကြီးသွားတာမျိုး ဖြစ်သွားတာပါ။
လက်တွေ့မှာ စမ်းသပ်ပြီးပါပြီ… ဒါတွေက အမှန်တရားတွေပါ။

• 

အလင်းအလျှင်ရဲ့ 90% လောက်မြန်အောင်သွားနိုင်ဖို့ သိပ်မလွယ်ဘူး။ ဒီတော့ ဒုတိယနည်းကို စဉ်းစားလိုက်ကြတယ်။ Spaceship ကို တည်ဆောက်တဲ့အခါမှာ Density အရမ်းများတဲ့အရာဝတ္ထုတစ်ခုနဲ့ တည်ဆောက်ဖို့ တွေးမိကြတယ်။ Density များတဲ့ပစ္စည်းကို ခပ်ဝေးဝေးရှာစရာမလိုပါဘူး။ Neutron Star တွေရှိပါတယ်။

ဒီအကြောင်းကိုပိုသိချင်ရင် အောက်မှာဖတ်ပေးပါ။

လူတွေအတွက် အကျိုးရှိစေသော ကြယ်သေဆုံးမှုများ (ကြယ်တွေဘယ်လို သေဆုံးကြသလဲ, Part 2)
https://ouo.io/G8Ohaph

Paper ထဲမှာ ပြောထားတဲ့ Spaceship က အဝိုင်းပုံစံရှိပါတယ်။ အဲ့ဒီ Spaceship ကို Neutron Star ကရတဲ့ ပစ္စည်းတွေနဲ့ တည်ဆောက်မှာပေါ့။
အချင်း ၆၂၀ မီတာရှိပြီး နေရဲ့ ၁၀% လောက် Mass ရှိတဲ့ Spaceship တစ်ခုတည်ဆောက်လိုက်တယ် ဆိုပါစို့။ အဲ့ဒီအခါမှာ Spaceship ထဲလိုက်ပါစီးနင်းသူတွေသည် အပြင်ကလူတွေရဲ့ ၁ဝပုံ ၁ပုံ Time Dilation ဖြစ်သွားမှာပါ။

မြင်အောင်ပြောရရင် အဲ့ဒီ Spaceship နဲ့ Proxima Centauri ကိုသွားမယ်ဆိုကြပါစို့။ အလင်းအလျှင်ရဲ့ တစ်ဝက်နဲ့ပဲ သွားမယ်ဆိုရင်တောင် Spaceship ထဲကလူတွေအတွက် အချိန် ၁ဝလပဲကြာမှာပါ။ ဒါပေမယ့် ကမ္ဘာမှာကျန်ခဲ့တဲ့လူတွေကတော့ အချိန် ၉နှစ်ကုန်သွားပါပြီ။ ဒါဟာ Time Dilation ပါပဲ။

အဲ့ဒါကတော့ဟုတ်ပါပြီ။ ခုချိန်မှာ အမြန်ဆုံးသွားနိုင်တဲ့ Juno Probe တောင် အလင်းအလျှင်ရဲ့ 0.0002% ပဲရှိတယ်။ (၁စက္ကန့်ကို ၄၆မိုင်လောက်ပေါ့)

• 

ဘယ်လိုလုပ်ပြီး အလင်းအလျှင်ရဲ့ 50% ရအောင် လုပ်မလဲ သိချင်ကြမှာပါ။

ယာဉ်ပျံရဲ့ Mass ကို Energy အဖြစ်နဲ့ပြောင်းသုံးနိုင်အောင် လုပ်လို့ရပါတယ်။ ငယ်ငယ်က သင်ခဲ့ရတဲ့ Kinetic Energy Formula ကိုမှတ်မိကြဦးမှာပါ။

KE = ½ mv2

ဒီ Formula ထဲထည့်တွက်တဲ့အခါ ကျွန်တော်တို့လိုတဲ့စွမ်းအင်ကို ရလာပါတယ်။ ယာဉ်ပျံ Mass 13% ကို Energy အဖြစ်ပြောင်းသုံးနိုင်ရင် ရပါပြီ။

လက်တွေ့မှာ Nuclear Fusion နည်းပညာနဲ့ 1% of Mass ကို Energy ပြောင်းနိုင်နေပါပြီ။ 13% ကတော့ ဝေးပါသေးတယ်။
ဒါပေမယ့် Spaceship ပတ်ပတ်လည်မှာ Accretion Disk တစ်ခုရအောင်လုပ်နိုင်ရင် 10% of Mass ကို Energy ပြောင်းလို့ရပါပြီ။

• 

ဒီတော့ ဒါကိုဖတ်ပြီး မဖြစ်နိုင်ဘူးလို့ တွေးမိကောင်းတွေးမိနိုင်ပါတယ်။ ဒါပေမယ့် သေချာစဉ်းစားကြည့်ရင် Alcubierre Drive လို Negative Energy မလိုပါဘူး။ သူလိုတာက Neutron Star ထဲက ပစ္စည်းတွေရယ်၊ Spaceship ကို တွန်းဖို့လိုအပ်တဲ့ Energy ရယ်ပါပဲ။

Neutron Star တွေ စကြဝဠာထဲမှာ တကယ်ရှိပါတယ်။ Time Dilation ဘယ်လိုအလုပ်လုပ်လဲဆိုတာလည်း စမ်းသပ်ထားပြီးပါပြီ။ Energy များများရဖို့ကလည်း သီအိုရီအရ ဖြစ်နိုင်နေပါတယ်။ ဒီတော့ ဒါဟာ လက်တွေ့ပိုကျတဲ့ အဖြေတစ်ခုပါ။ နည်းပညာအဆင့်အတန်း တော်တော်မြင့်မားလာမှ ဒါဟာဖြစ်နိုင်မှာပါ။

ဒီတော့ စကြဝဠာထဲချေဆန့်ချင်တယ်ဆိုရင်… စိတ်ကူးယဉ်တာ မဟုတ်တော့ပါဘူး။ လက်တွေ့မှာ တကယ်ဖြစ်နိုင်ပါတယ်။ အချိန်ကာလတစ်ခုပဲ စောင့်ရတော့မှာပါ။

SAGAN

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။

ဆရာကြီးလုပ်ပြီး အောင်မြင်တိုးတက်ရေးအကြောင်း ၂ပုဒ်ရေးထားပြီဆိုတော့ ရေးလက်စနဲ့ နောက်တစ်ပုဒ်ဆက်ရေးချင်ပါသေးတယ်။ အခုတစ်ခေါက်ရေးချင်တာက အပျင်းထူတာကို ဘယ်လိုဖြေရှင်းကြမလဲဆိုတာပါ။

ရှေ့မှာရေးထားတဲ့ ၂ပုဒ်ကိုဖတ်ချင်ရင် ဒီမှာဖတ်ပါ။

အတွေးမလွန်ဘဲ လုပ်မလား၊ အလွန်တွေးပြီး ထိုင်နေမလား?
https://ouo.io/vZ5H4D

Motivation မရှိခြင်းပြဿနာ
https://ouo.io/IG5iDtw

ဘဝမှာ အမြဲတမ်း ၂ခုထဲက ၁ခုကို ရွေးချယ်ရတတ်ပါတယ်။ စာမေးပွဲအတွက် စာဖတ်မလား… ဇာတ်လမ်းကြည့်မလား…။ ဂိမ်းဆော့မလား… စာထိုင်ရေးမလား… စသဖြင့်ပေါ့။ နေ့တိုင်း ၂ခုထဲက ၁ခုကိုရွေးနေရတော့ အမြဲတန်းစိတ်ထဲမှာ လွန်ဆွဲနေရပါတယ်။
ဒီတော့ ဒီလိုမဖြစ်အောင် တစ်ခုခု ကြံစည်သင့်တာပေါ့။
အဲ့ဒီအခါမှာ စည်းမျဉ်း (Rules) တွေက အသုံးဝင်လာပါတယ်။ (တရားဟောပါတော့မယ်…)

စိတ်ခံစားချက်အတိုင်းသာ သွားနေလို့ကတော့ ဘာအလုပ်မှ ပြီးမှာမဟုတ်ဘဲ ရုပ်ရှင်တွေပဲ တစ်ကားပြီးတစ်ကား ပြီးနေမှာပါ။ Rules တွေကို လိုက်နာလိုက်ခြင်းအားဖြင့် လုပ်ရမလား၊ မလုပ်ရဘူးလား သိပ်ပြီးတော့ အာရုံနောက်နေစရာ မလိုတော့ပါဘူး။ “ဒါကိုလုပ်ရမယ်… ဘာလို့လဲဆိုတော့ Rule ကြောင့်…” ဆိုပြီး ကိစ္စပြတ်သွားပါတယ်။

ဥပမာ ကိုယ့်ရည်မှန်းချက်ကို ရှေ့ရောက်စေမယ့် အရာတွေကို တစ်ရက် ၂ခုလောက်လုပ်မယ်ဆိုပြီး Rule တစ်ခုချထားတာမျိုးပေါ့။ ကိုယ်က ကျောင်းသားဆိုရင် စာ ၂ခန်းပြီးအောင် ဖတ်မယ်… စာရေးတဲ့သူဆိုရင် စာ ၂ပုဒ်ပြီးအောင် ရေးမယ်… ဆိုပါတော့။
ဒီတော့ မေးစရာရှိတာက ကျောင်းက၊ အလုပ်ကနေအပြန် ပင်ပန်းလာရင်ရော ဒီ Rule ကိုလိုက်နာရမှာပါပဲလား ဆိုတာပါ။ ရှင်းရှင်းပြောရရင် သေရေးရှင်ရေး မဟုတ်သ၍ လိုက်နာရပါမယ်။ ဘာလို့လဲဆိုတာ ရှင်းပြပါမယ်။

တစ်ရက်ကို စာ ၂ခန်းပြီးအောင် ဖတ်မယ်လို့ရည်ရွယ်ထားတဲ့သူက မဖတ်မိတဲ့အခါ နောက်ရက်ရောက်သွားရင် ၄ခန်း ဖတ်ရပါတော့မယ်။ အဲ့ဒါဆိုရင် ၂ခန်းတောင် ပင်ပန်းတယ်ဆိုပြီး မဖတ်တဲ့သူက ၄ခန်းဖတ်ဖို့ဆိုတာ မလွယ်တော့ပါဘူး။

ဒါဆိုလည်း “အကြွေးအတင်မခံဘူးကွာ… နောက်ရက်လည်း ၂ခန်းပဲဖတ်မယ်… ကြားထဲကတစ်ရက်ကို ဖျောက်လိုက်မယ်…” ဆိုပါတော့။ ဒီအခါမှာ တစ်နေ့ ၂ပုဒ်ဖတ်ရမယ်ဆိုတဲ့ Rule ပျက်သွားနိုင်ပါတယ်။
ပင်ပန်းရင် နားလိုက်မှာပေါ့… ဆိုတာက အကျင့်တစ်ခုဖြစ်သွားနိုင်ပါတယ်။ ဒါဆိုရင် နည်းနည်းလောက် ပင်ပန်းတာနဲ့တင် “နားလိုက်ပြီ… ရုပ်ရှင်ကြည့်လိုက်ပြီ…” ဆိုတာတွေ ဖြစ်လာနိုင်တာပေါ့။
ဒါကြောင့် လူကြီးတွေက “အစရှိ အနောင်နောင်” လို့ ပြောကြတာပါ။ စမိသွားရင် အပျင်းထူဖို့ လွယ်သွားပါတယ်။ နောက်ဆုံးမှာတော့ အကျင့်တစ်ခုကို မပျိုးထောင်ရသေးဘူး… ပျက်သွားပြီဆိုတာမျိုးတွေ ဖြစ်လာမှာပါ။

ဒီအခါမှာ အလုပ်တစ်ခုကို ဆက်မလုပ်တော့ဘူးလို့ ဆုံးဖြတ်ရင် ကိုယ့်ဘာသာပြန်မေးရပါတယ်။ “ငါပျင်းနေတာလား… အပြောခံရမှာ ကြောက်လို့လား… ဒါတွေကြောင့်များ ငါဆက်မလုပ်ချင်တာလား” ဆိုတာ မေးသင့်ပါတယ်။ ဘာလို့လဲဆိုတော့ ကိုယ်နဲ့မအပ်စပ်တဲ့အလုပ်သာဆိုရင် ဒီနေရာမှာ “မဟုတ်ဘူး” ဆိုတဲ့အဖြေကို ရမှာပါ။
ကိုယ့်ရဲ့ အဖြေက “ဟုတ်တယ်… ပျင်းလို့… ဝါသနာတော့ပါတယ်” ဆိုပြီး ထွက်လာရင်တော့ အောက်မှာဆက်ပြောမယ့် အကြောင်းတွေက အသုံးဝင်မှာပါ။

ကိုယ့်ရဲ့ပျင်းရိမှုက အလုပ်မတွင်အောင် တားဆီးနေပြီဆိုရင်တော့ Rule တစ်ခုချရပါတော့မယ်။ တစ်နေ့လုံးမှာ အရေးကြီးဆုံးအလုပ် ၃ခုကို Priority ထားလိုက်သင့်ပါတယ်။ ဘယ်ဟာက ကိုယ့်အတွက် ပိုအရေးကြီးလဲဆိုတာ ကိုယ့်ဘာသာခွဲခြားရမှာပါ။

ဒီနေရာမှာ တစ်ခုအရေးကြီးတာက “ပြာသာပြာတယ်… ဖွဲမထွက်” တာမျိုးတွေ မဖြစ်ရပါဘူး။ ကိုယ်လုပ်တဲ့အလုပ်တိုင်းဟာ ကိုယ်ဖြစ်ချင်တာကို သက်ရောက်မှုရှိနေရပါမယ်။
ဥပမာ စာဖတ်တာက အဓိကပေမယ့် စာမဖတ်ခင် လက်ဖက်သုပ်သုတ်ပြီး ကော်ဖီဖျော်နေတာ နာရီဝက်လောက် ကြာနေတာမျိုး၊ စာရေးမယ်ဆိုပြီး စားပွဲပေါ်က အမှိုက်တွေကို ရှင်းတာ၊ စာအုပ်တွေကို စီနေတာမျိုးပေါ့။

ဒီလိုလုပ်လိုက်ခြင်းအားဖြင့် ဘယ်ဟာကို Focus လုပ်ရမလဲ သိနိုင်သွားပါတယ်။ ဒီ ၃ခုထဲမပါတာတွေဟာ အပရိကတွေပါပဲ။
ကိုယ်က စာမေးပွဲမှာ အမှတ်ကောင်းချင်တယ်ဆိုရင် စာပုံမှန်ဖတ်တာကို Priority ထဲထည့်ထားရမှာပါ။ အဲ့ဒီအခါမှာ သူငယ်ချင်းတွေက တစ်ခုခုသွားစားရအောင်လို့ ခေါ်လည်း မလိုက်သင့်ပါဘူး။ သူတို့က ကိုယ့်ရဲ့ Priority ၃ခုထဲမှာ မပါဘူးဆိုရင် စာမေးပွဲပြီးတဲ့အထိ ခေါက်ထားလိုက်သင့်ပါတယ်။

ဒါပေမယ့် အရေးကြီးတာက မဖြစ်နိုင်တာတွေ မမှန်းသင့်ပါဘူး။ ဒါကြောင့် Priority ၃ခုကို ထိန်းချုပ်မယ့် နောက်တစ်ခုလိုလာပါတယ်။
ဒါကတော့ တစ်နေ့ကို ကိုယ်မလုပ်ရမယ့် အရာ ၅မျိုး၊ လုပ်ရမယ့် အရာ ၅မျိုး ကြိုတွေးထားတာမျိုးပါ။ ဥပမာ ငါ ၁နာရီထက်ပိုမနားဘူး…၊ Facebook နာရီဝက်ပဲ ပွတ်မယ်…၊ ဇာတ်လမ်းကြည့်ရင် ၂ပိုင်းထက်ပိုမကြည့်ဘူး… စတာတွေပေါ့။ ဒါတွေက မလုပ်ရမယ့် အရာတွေပါ။

လုပ်ရမယ့်အရာကတော့ ကိုယ့်ရဲ့ Priority နဲ့ဆိုင်ပါတယ်။ Body တောင့်ချင်တယ်ဆို ပုံမှန်လေ့ကျင့်ခန်းလုပ်ရမှာပါ။ (ဒါက Priority ပေါ့)
ဒါကိုထောက်ပံ့ဖို့အတွက် ကြိုက်ကြိုက်၊ မကြိုက်ကြိုက် Protein ဓာတ်များတာရွေးစားမယ်…၊ နို့ပုံမှန်သောက်မယ်…၊ အာဟာရပြည့်ပြည့်ဝဝရအောင်စားမယ်… စတာတွေကို လုပ်ရမယ့် အရာထဲထည့်ထားရမှာပါ။

လက်တွေ့မှာ ဒီလောက်တော့ မလွယ်ပါဘူး။ Rule တွေထားထားပေမယ့် တခါတခါ ၂ခုထဲက ၁ခုကို ရွေးချယ်ဖို့ ဖြစ်လာတတ်ပါတယ်။ ဒီအခါမှာ 10-10-10 Rule ကိုသုံးလို့ရပါတယ်။ ဘာလဲဆိုတော့ ကိုယ်လုပ်ချင်တာကို ချက်ချင်းထမလုပ်ဘဲ ကိုယ့်ဘာသာမေးခွန်း ပြန်ထုတ်ခိုင်းတာပါ။

“ငါသာ ခုချိန် စာမဖတ်ဘဲ ဇာတ်လမ်းကြည့်လိုက်ရင် နောက် ၁၀ မိနစ်နေရင် ဘယ်လိုနေမလဲ (ပျော်နေမှာပေါ့…) ၊ ၁ဝနာရီနေရင် ဘယ်လိုနေမလဲ (အပြစ်ရှိသလို ခံစားလာရမှာပါ…) ၊ ၁ဝရက်နေရင် ဘယ်လိုနေမလဲ (စာပုံမှန်ဖတ်မယ်ဆိုတဲ့ အကျင့်ပျက်သွားလောက်တယ်လို့ တွေးမိနိုင်ပါတယ်…)”

ဒီလိုတွေးလိုက်ခြင်းအားဖြင့် အနာဂတ်ကိုမြင်သွားတဲ့အတွက် လုပ်ဖို့ နည်းနည်းတော့ တွန့်သွားတတ်ပါတယ်။ လက်ရှိခဏတာ စိတ်ပျော်ရွှင်ဖို့ အနာဂတ်မှာ Guilty ဖြစ်နေမလား… ကိုယ့်ရဲ့ Goal ကပိုအရေးမကြီးဘူးလား… ဆိုတာမျိုးတွေ တွေးမိလာနိုင်ပါတယ်။

ဘာလို့ဒီလောက်တောင် လိုက်ပြောနေရတာလဲလို့ မေးချင်ကြမှာပါ။ ကိုယ့်မှာ အလေ့အထတစ်ခု (Habit) ဖြစ်မလာသေးခင်မှာ ဒီ Habit ကိုပျက်စီးစေတဲ့ အကြောင်းတွေအကုန်လုံးဟာ ရန်သူပါပဲ။
ဥပမာ ဝိတ်ချမယ်… ဘာမှမစားတော့ဘူး တွေးထားပေမယ့် အစပိုင်းမှာ နည်းနည်းလောက် Cheat လုပ်မိတဲ့အခါ Habit က ပျက်စီးသွားနိုင်ပါတယ်။ ဒါ့အပြင် ရေတိုပဲကြည့်ပြီး ခဏတဖြုတ် အငတ်ခံနေရင်လည်း တချိန်မှာ ပြန်စားတဲ့အခါ ဝိတ်ပြန်တက်လာမှာပါပဲ။

ဒါပေမယ့် ဒီ Diet အတိုင်းစားနေတာ ကာလတစ်ခုကြာလာပြီ ဆိုရင်တော့ ဒါဟာ Habit တစ်ခုဖြစ်လာပါပြီ။ ဒီအခါမှာ တခါတလေ နည်းနည်းလောက် Cheat လုပ်လိုက်တာက ပြဿနာသိပ်မရှိတော့ပါဘူး။ Habit ပျက်စီးဖို့ နည်းနည်းပိုခက်ခဲသွားပါတယ်။

ပြောရတာလွယ်ပေမယ့် စိတ်ဓာတ်ပိုင်းက အရေးကြီးပါတယ်။ အရေးကြီးဆုံးကတော့ ကိုယ့်ကိုကိုယ် ရိုးသားဖို့ပါပဲ။ “တစ်ခါလောက်နဲ့တော့ ဘာမှမဖြစ်ပါဘူးကွာ” ဆိုတာ ကောင်းတဲ့ Habit တွေပျက်စီးခြင်း၊ မကောင်းတဲ့ Habit တွေစတင်ခြင်းရဲ့ နိဒါန်းပါပဲ။

နောက်ဆုံးတစ်ချက်ပြောချင်တာက 10-10-10 နဲ့တွေးကြည့်ပြီးပြီ ဒါပေမယ့် ဒီအလုပ်ကို ဆက်လုပ်ချင်နေသေးတယ် ဆိုပါတော့။ ဒီအခါမှာ နောက်ဆုံးကျည်ဆန်တစ်တောင့် အနေနဲ့ ဒါကို ဆက်မလုပ်ခင် ၁၀ မိနစ်စောင့်လိုက်ပါ။
ဥပမာ “မရတော့ဘူး… Delivery နဲ့မာလရှမ်းကော မှာစားမှကို ရတော့မယ်…” လို့ Diet လုပ်နေတဲ့အချိန်မှာတွေးမိရင် မမှာစားခင် ၁ဝမိနစ် စောင့်ပါ။

စောင့်ပြီးလို့မှ စားချင်သေးရင်တော့ စားလိုက်ပါတော့။ ဒီလိုမဟုတ်လည်း နောက် ၁ဝမိနစ်ထပ်စောင့်ကြည့်သင့်ပါတယ်။ ဘာလို့လဲဆိုတော့ ၁၀ မိနစ်တောင် သည်းခံနိုင်သေးတာပဲ… နောက် ၁၀ မိနစ်ကို ဘာလို့ သည်းမခံနိုင်ရမလဲ… ဟုတ်တယ်မလား။
ဒီလိုလုပ်တဲ့အခါ ကိုယ့်ရဲ့သည်းခံနိုင်စွမ်းတွေ တက်လာပါလိမ့်မယ်။ နောက်ကျရင် ကိုယ့်ရဲ့ Priority ၃ခုထဲမပါတဲ့ အရာတွေအတွက် အချိန်ပေးမိမှာ မဟုတ်တော့ပါဘူး။

အခုပြောနေတာတွေ အကုန်လုံးက ကိုယ့်စိတ်ကို ထိန်းချုပ်နိုင်ဖို့တွေချည်းပါပဲ။ ပျော်ရွှင်ခြင်းကို ထည့်မစဉ်းစားထားပါဘူး။
ကိုယ်လုပ်ချင်တာ လုပ်လိုက်ရလို့ စိတ်ပျော်ရွှင်သွားပေမယ့် ကိုယ့်ရဲ့ရည်မှန်းချက်တွေနဲ့ လာတိုက်နေရင် မကောင်းပါဘူး။ ဒါပေမယ့် ကိုယ်ဘာလိုချင်လဲဆိုတာ ကိုယ့်ဘာသာပဲ ရွေးချယ်ရမှာပါ။ ပျော်ရွှင်ခြင်းလား… အောင်မြင်ခြင်းလား… ၂ခုလုံး ၁၀၀% ရဖို့ကတော့ ခက်ခဲပါတယ်…။

SAGAN

Next Post, Previous Post မနှိပ်ဘဲ OUO Link ကနေ ၁ပုဒ်ချင်းဝင်ဖတ်ပြီး ကူညီပါ။
အသိအမြင်၊ အတွေးအခေါ် အသစ်တစ်ခုခုရသွားလို့ လှူဒါန်းလိုပါက Science Nuts (Facebook Page) ကို ဆက်သွယ်လှူဒါန်းနိုင်ပါတယ်။
လှူသမျှငွေအကုန်လုံးကို လိုအပ်တဲ့နေရာတွေမှာ ပြန်လည်လှူဒါန်းပေးသွားမှာပါ။